Su Bagu a Tebi a Watu a Sinulatan kanu Kasuguan
34
Na pidtalu bun nu Kadenan a Mapulu kanu Musa i “Tebi ka kanu watu sa dua timan a isambi kanu nauna a inenggay ku sa leka, ka sulatan ku kanu manga kadtalu ku a inisulat ku kanu nauna a manga watu a migkalat'engka. 2 Na mapita a entu na adil ka i ginawa nengka, ka takedeg ka kanu puntiuk'u palaw a nia ka iadap'engka i ginawa nengka sa laki. 3 Na nia dait na apia sakataw na dala munut sa leka enggu dala ped a taw a mailay kanu nia a palaw, apia su manga pangangayamen a bili-bili enggu sapi na di dait a papanadtaben kanu nia a palaw.” 4 Na tinemebi den mambu su Musa sa dua timan a watu a mana bun kanu nauna a inenggay sa lekanin. Na kanu mapita na mibpanay temakedeg su Musa kanu palaw sa Sinai sia luyud kanu ngin i inisugu nu Kadenan a Mapulu. Na pidtapik'in su dua timan a entu a tinebi nin a watu.5-6 Na nangalimbaba kanu gabun su Kadenan a Mapulu a pedtindeg kanu kaadapan nu Musa ka inipayag'in su ingala nin sa nia nin pidtalu na “Saki su Kadenan a Mapulu a malimu, aden lat a nanam ku kanu manga taw, malegen aku malipunget, su limu ku na di embagu enggu matidtu aku. 7 Ipegkalimu ku su ngibu-ngibuan a tupu, mangampun aku kanu manga galebekan a mawag, ampunen ku bun su pedsungkang enggu su pembaladusa. Ugaid'a pidsan ka maitu na siksan ku su manga taw a pendusa taman den kanu manga muliataw nilan iganat kanilan taman kanu ikatelu enggu ikapat a tupu nilan.”
8 Na daka sinemugiud su Musa ka sinimba nin su Kadenan. 9 Na nia nin pidtalu na “Hu Mapulu ku, amaika 'gkasuatan aku nengka na 'bpangenin ku sa leka i tapid kami. Apia mangategas i ulu nu manga taw a nia na ampun kami kanu manga kadusan nami enggu talima kami a manga taw nengka a inibida.”
Su Kinabpaluman kanu Kasuguan
10 Na pidtalu nu Kadenan a Mapulu i “Pakikineg ka, mumbal aku sa kapasadan sa lekanu. Na sia kanu adapan nu manga taw a Israil na enggula aku sa manga kangagaipan a da pamun manggula sia sa dunia. Mailay nu manga taw sia kanu embala-bala sa lekanu su manga pakagaip-gaip a enggulan ku sa lekanu. 11 Na su ipedsugu ku sa leka saguna na enggula nu. Na paawan ku su manga taw a Amur, manga taw a Kanaan, manga taw a Hit, manga taw a Piris, manga taw a Hib, enggu su manga taw a Hibus kanu kalupan a kabpawangan nu. 12 Na talanged ka i di kanu mumbal sa apia ngin a kapasadan kanu manga taw a kauman nu kanu kalupan a 'bpawangan nu, kagina mabaluy i entu a makalitag sa lekanu. 13 Na geba nu su manga pegkurbanan nilan, lupet'u su manga watu a pedsimban nilan enggu udtang'u su manga palaus'u pegkakadenanen nilan a si Asirah. 14 Na da kanu semimba sa pegkakadenanen ka saki su Kadenan a Mapulu a di malilini sa aden tumpuk'in. 15 Na da kanu a benal mumbal sa kapasadan kanu manga taw a entu, ka aden a entu na mapangenggat kanu nilan keman kanu manga iniapal'ilan kanu manga pegkakadenanen nilan sia kanu kasimba nilan sa entu. 16 Na di nu semuguti a makagkaluma su manga wata nu a mama kanu manga babay nu entu a dalepa. Ka aden a entu na madtatanggit silan nu manga kaluma nilan sa kasimba nilan kanu pegkakadenanen nilan.a
17 “Na da kanu mumbal sa balahala a magkakadenan.
18 “Idsela-sela nu su Kanduli nu Pan a Dala Pakembang'in sia luyud kanu inisugu ku sa lekanu a sia kanu dalem'u pitu gay na kan kanu sa pan a da pakembang'in. Enggula nu i nia sia kanu initandu a gay kanu ulan-ulan nu Abib kagina entu ba su ulan-ulan a kinaliu nu sa dalepa a Egypt.
19 “Na su langun nu kaka sa langun a embatan a mama na laki, maitu bun su paganayan a mama a pipis'u pangangayamen nu a sapi enggu bili-bili. 20 Na su paganayan a pipis'u kimar'u na mapakay a maaun sa manguda a bili-bili. Na amaika di maaun na dait a lepun su lig'in. Na su kaka sa langun a manga wata nu a mama na nasisita a maaun nu.
“Na dala makasupeg sa laki amaika dala mait'in a kurban.
21 “Kanu dalem'u nem gay na mapakay kanu a enggalebek. Ugaid'a kanu ikapitu nin gay na pangintelenen kanu apia sia kanu timpu a kapendadu nu atawa ka kabpagagani nu.
22 “Na idsela-sela nu su Kanduli nu Muna-muna a Masabpet'u a bantad. Idsela-sela nu bun su Kanduli nu Mauli a Masabpet'u kanu dalem'u salagun. 23 Na uman lagun na su manga mama nu na nia dait na makatelu silan makalu sa kanu kagkanduli nilan sa laki a Kadenan nu a Mapulu a Kadenan nu manga taw a Israil. 24 Na paawan ku su manga taw kanu kalupan a ibpagenggay ku sa lekanu enggu pagkauladen ku su sakup'u. Na uman nu ganatan su kalupan a masakup'u ka 'gkanduli kanu sa laki a Kadenan a Mapulu sa makatelu sa dalem'u salagun na dala makaagaw kanu entu a kalupan nu. 25 Na amaika 'gkurban kanu sa laki sa lugu na di nu den munuti sa apia ngin a aden pakembang'in. Da kanu semama kanu temundug a gay sa kanu inigkurban sa kanu Kanduli nu Kalipuas.
26 “Pananggit'u lu kanu walay nu Kadenan nu a Mapulu su mapia sa langun kanu muna-muna a unga nu masabpet'u.
“Di nu lemabuani su pipis a kambing kanu gatas'u ina nin.”b
27 Na pidtalu nu Kadenan a Mapulu kanu Musa i “Isulat'engka su manga pidtalu ku ba a entu sa leka kagina nia ba i atulan nu kapasadan ku sa leka enggu kanu manga taw a Israil.” 28 Na midtangen lu su Musa a pedtapiden nu Kadenan a Mapulu kanu dalem'u patpulu kamagabi enggu patpulu kamalamag a dala kinan nin enggu ininem'in. Na inisulat'u Kadenan kanu tebi a watu su Sapulu a Kasuguan a atulan nu kapasadan.
Su Kinasigay nu Beneng'u Musa
29 Na kanu kinambaba nu Musa kanu palaw a Sinai na nadtapik'in den su dua timan a tebi a watu a sinulatan kanu manga kasuguan nu Kadenan. Na da kasipati nu Musa i pedsigay su beneng'in sabap sa su Kadenan a Mapulu i inimbitiala nin. 30 Na guna mailay nu Harun enggu su manga taw a Israil su kapedsigay nu beneng'u Musa na 'gkagilekan silan pedsupeg kanu Musa. 31 Ugaid'a tinawag silan nu Musa, daka linemulud si Harun enggu su 'gkangaunutan nu manga taw a Israil ka inimbitiala silan nu Musa. 32 Na entu pan ka linemulud menem sa lekanin su langun nu manga taw a Israil. Na pidtalu nin kanilan su langun nu kasuguan nu Kadenan a Mapulu a inipayag'in sa lekanin lu kanu palaw a Sinai. 33 Na guna mapasad'u Musa silan embitiala na tinangguban nu Musa su beneng'in. 34 Ugaid'a uman lemudep su Musa kanu Tuleda a pinatindeg'in a 'bpangadapan nin kanu Kadenan a Mapulu na ibpagawa nin su tanggub'u beneng'in taman sa kaliu nin kanu entu. Na amaika pakaliu den sekanin na pedtalun nin kanu manga taw a Israil su langun nu pidtalu sa lekanin nu Kadenan a Mapulu. 35 Na 'gkailay menem'u manga taw a Israil su beneng'u Musa a pedsigay. Na pendapengan menem'u Musa su beneng'in taman kanu kambalingan nin kanu Tuleda sa kanu kapembitiala nin kanu Kadenan.