Su Atulan kanu Gay nu Kabpangintelenen
35
Na linimud'u Musa su langun nu taw a Israil ka pidtalu nin kanilan i “Nia su kasuguan nu Kadenan a Mapulu sa lekanu: 2 Enggalebek'u den su langun nu dait a enggalebeken nu kanu dalem'u nem gay ka su ikapitu nin gay na pangintelenen kanu ka suti i entu a gay sa laki. Na apia entain i enggalebek kanu nia ba a gay na dait a imatayan. 3 Na apia su kakagat'u sa apuy lu kanu manga dapulan nu kanu Gay nu Kabpangintelenen na di nu penggula.”Su manga Ibpagenggay a Mausal kanu Balung-balung a Tuleda a 'Bpangadapan kanu Kadenan
4 Na pidtalu pan nu Musa kanu langun nu manga taw a Israil i “Nia su kasuguan nu Kadenan a Mapulu sa lekanu: 5 Enggay kanu kanu Kadenan a Mapulu sa kanu manga kaaden nu sa maluwag kanu ginawa nu, mapakay i bulawan, pilak atawa ka galang. 6 Mapakay bun i tanul a nia nin suga na bilu, lambayung enggu maliga, mapia a ginis enggu pinadtatambil a bumbul'a kambing, 7 upis'a mama a bili-bili a pidsugan sa maliga apeg'u mapia a manga upis'a binatang enggu kayu a pansiu. 8 Mapakay bun i lana a 'bpagusalen sa palitan, manga ibpanimbul kanu lana a 'bpagusalen sa kapedsuti enggu su manga ibpanimbul kanu mamut a pedtutungen. 9 Maitu bun su manga palamata a watu a uniks enggu su manga ped pan a palamata a watu a ibpaneket kanu liu nu uyut a nakalapis kanu laleb'u pidsugan a balegkas enggu lu kanu untul'u salay kanu waga nu balegkas a entu.
Su manga Igagama kanu Balung-balung a Tuleda
10 “Na su langun nu aden kategelan nin enggalebek na temabang kanu inisugu nu Kadenan a Mapulu a galebekan 11 a mana su kanggalebek kanu Balung-balung a Tuleda apeg'u ibpamelapis lun, su manga sangkatan nin, su manga palaus a papan, su manga balawagen nin enggu su manga palaus'in apeg'u udsadan nin. 12 Maitu bun su Kaun nu Kapasadan apeg'u dapeng'in, su manga bantial'in enggu su ginis a ipendalinding a makapagelet lun. 13 Silan bun i makaumbal kanu lamisan enggu su manga igagama nin apeg'u manga bantial'in enggu su pan a ipembetad kanu adapan nu Kadenan a Mapulu, 14 su 'bpametadan sa palitan enggu su palitan apeg'u tenggung'in enggu su langun nu igagama nin. 15 Silan bun i mumbal kanu pedtutungan kanu mamut a tutungen enggu su manga bantial'in apeg'u mamut a tutungen enggu su lana a 'bpagusalen kanu kapedsuti apeg'u ginis a dalinding'u bengawan nu Balung-balung a Tuleda, 16 su pegkurbanan kanu pedtutungen a kurban, su galang a salalan enggu su manga igagama nin, su manga bantial'in enggu su palanggan a galang apeg'u 'bpaguntulan lun a galang bun, 17 su manga dalinding a pakabalibet kanu lama-lama enggu su dalinding'u bengawan nin, su manga palaus'in enggu su manga udsadan nin, 18 su langun nu budsud a 'bpagiketan kanu manga ginis enggu su ibpagiket lun magidsan pan i lu sa liu enggu ludep'u lama-lama, 19 apeg'u suti a balegkas'u 'bpangurban a si Harun enggu su balegkas'u manga wata nin a mama a mapia i kinaumbal lun. Na embalegkasen nilan su entu sa kanggulalan nilan kanu galebekan nilan sa laki kanu Balung-balung a Tuleda.”
20 Daka ginanatan den nu manga taw a Israil su Musa 21-22 ka su langun nu babay-mama a pegkiug 'bpagenggay kanu Kadenan a Mapulu na nananggit sa bulawan a pamalang, sising, balig, balusu enggu su ped pan a bulawan nilan a 'bpagusalen kanu kapapedtindeg kanu Balung-balung a Tuleda a 'Bpangadapan kanu Kadenan a Mapulu enggu 'bpagusalen kanu kabpagumbal kanu suti a balegkas'u manga 'bpamangurban. Na su langun nu pinananggit'ilan a entu a manga bulawan na inipalad'ilan a kurban kanu Kadenan a Mapulu. 23 Aden bun nananggit sa tanul a nia nin suga na bilu, lambayung enggu maliga. Aden bun mapia a ginis enggu pinadtatambil a bumbul'a kambing, aden bun upis'a mama a bili-bili a pidsugan sa maliga enggu su ped pan a mapia a manga upis'a binatang. 24 Aden bun migkurban kanu Kadenan a Mapulu sa pilak, galang enggu manga kayu a pansiu. 25 Na su manga babay menem a mategel maul na inigkurban nilan su manga naul'ilan a pidsugan sa bilu, lambayung enggu maliga apeg den nu mapia a ginis. 26 Na su langun nu babay a aden kategelan nin mumbal sa pinadtatambil a bumbul'a kambing na entu ba menem i inenggay nilan kanu Kadenan a Mapulu. 27 Su manga 'gkaunutan menem na minenggay sa manga palamata a watu a uniks enggu su manga ped pan a manga watu a palamata a ibpaneket kanu uyut a nakalapis kanu laleb'u pidsugan a balegkas enggu lu kanu untul'u salay kanu waga nu balegkas a entu. 28 Na minenggay bun silan sa lana na ulibus a mausal kanu palitan enggu ibpanimbul a mausal kanu lana a 'bpagusalen sa kapedsuti enggu kanu mamut a tutungen. 29 Kagina ka maitu na su langun nu manga taw a Israil magidsan i babay-mama a miniug menggay sa makadtabang'in kanu ipapenggalebek'u Kadenan a Mapulu sia nakanggulalan kanu Musa na namananggit silan sa entu a kurban nilan kanu Kadenan.
Si Bisalil enggu si Uhuliyab
30 Na pidtalu bun nu Musa kanu manga taw a Israil i “Pinamili nu Kadenan a Mapulu si Bisalil a wata ni Udi a apu ni Hur a tupu nu Yahuda. 31 Na pinalangkapan sekanin nu Kadenan kanu Ruh nin enggu inenggan nin sa tidtu-tidtu a kapegkagaga sa katuntay nin kanu langun nu galebekan 32 sa kabpanday sa manga mapia i palas'in a bulawan, pilak enggu galang, 33 apeg'u kabpangukil sa watu, kayu enggu su langun nu embalangan pan a kapebpanday. 34 Na inenggan nu Kadenan si Bisalil enggu si Uhuliyab a wata ni Ahisamak a tupu ni Dan sa kategelan sa kapamandu kanu manga natawan nilan. 35 Inenggan silan nu Kadenan sa kategelan sa kanggalebek kanu langun nu galebekan a mana su kapangukil, kapapebpalas, kabpagaul enggu kabpamurda sa mapia a ginis a ebpun sa tanul a bilu, lambayung enggu maliga. Na 'gkagaga nilan penggula su langun nu embalangan nu galebekan enggu mategel silan enggalebek.