36
Na si Bisalil enggu si Uhuliyab apeg'u manga inenggan nu Kadenan a Mapulu sa kataw enggu kategelan sa kanggalebek kanu langun na galebekan sa kapatindeg kanu Balung-balung a Tuleda a 'Bpangadapan kanu Kadenan na silan i enggalebek lun sia luyud kanu inisugu nu Kadenan a Mapulu.”
2 Na inipatawag'u Musa si Bisalil enggu si Uhuliyab apeg'u miniug temabang a inenggan nu Kadenan a Mapulu sa kataw enggu kategelan sa kanggalebek kanu langun na galebekan a entu. 3 Na inenggay nu Musa kanilan su langun nu inenggay nu manga taw a Israil a mausal kanu kapatindeg kanu Balung-balung a Tuleda a 'Bpangadapan kanu Kadenan. Na uman mapita na 'bpananggit bun su manga taw a Israil sa ibpagenggay nilan sa maluwag kanu ginawa nilan. 4 Na guna su maitu na su langun nu 'bpamenggalebek kanu Balung-balung a Tuleda a 'Bpangadapan kanu Kadenan na tinemelen pan silan kanu galebek'ilan ka linemu silan kanu Musa 5 ka pidtalu nilan i “Su pinananggit'u manga taw na midsubela den kanu nasisita tanu kanu galebekan a inisugu nu Kadenan a Mapulu.” 6 Daka pinasuguan nu Musa su manga taw lu kanu pegkampuan nilan sa nia nin katigan na “Da kanu den 'bpagenggay sa mausal kanu Balung-balung a Tuleda a 'Bpangadapan kanu Kadenan.” Na tinemelen den mambu silan mananggit sa entu 7 kagina midsubela den su inenggay nilan a manga igagama.
Su Kapapedtindeg kanu Balung-balung a Tuleda
8 Na su langun nu aden kategelan nin sa kanggalebek na nia nilan inusal sa kapatindeg'ilan kanu Balung-balung a Tuleda a 'Bpangadapan kanu Kadenan na sawati a mapia a ginis a ebpun sa tanul a bilu, lambayung enggu maliga. Pinamurdan sa pibpia-pianan a buntal'a malaikat a aden papak'in. 9 Na su uman i ginis na mamagidsan i kaulad'in, nia nin tilenduan na sapulu enggu pat kamitru enggu nia nin balawagan na dua kamitru. 10 Na pinadtatambil'ilan su sawati a entu a ginis sa enggaga-lima timan. 11 Na pidtangilan nilan sa ginis a nia nin suga na bilu su sakaligid kanu sakatambilan, na maitu bun ba i pinakaidan kanu sakaligid kanu ikadua a sakatambilan. 12 Na nia kadakel'u inidtangila nilan kanu sakaligid kanu uman i sakatambilan na lima-wati a tangila. Na pinadsangula su inipadtangila kanu sakatambilan lu kanu inipadtangila kanu ikadua a sakatambilan. 13 Na minumbal bun silan sa lima-wati a sangkatan a bulawan a makapadsumpat kanu dua timan a entu a pinadtatambil a manga ginis. Na kanu maitu ba a ukit na nakadsumpat su entu ka enggu nasatiman su manga ginis'u Balung-balung a Tuleda a 'Bpangadapan kanu Kadenan.
14 Na minumbal bun silan sa sawati enggu isa a ginis a ebpun sa bumbul'a kambing a ilapis kanu mapia a entu a ginis'u Balung-balung a Tuleda. 15 Na nia tilenduan nu uman i satiman kanu entu na sapulu enggu lima kamitru enggu nia nin menem balawagan na dua kamitru. 16 Na pinadtatambil'ilan su lima timan kanu entu a ginis a ebpun sa bumbul'a kambing enggu su nem timan menem a nasama na pinadtatambil'ilan bun. 17 Na pidtangilan nilan sa lima-wati a ginis su sakaligid kanu sakatambilan, na maitu bun ba i pinakaidan kanu sakaligid kanu ikadua a sakatambilan. 18 Na minumbal bun silan sa lima-wati a sangkatan a galang a makapadsumpat kanu pinadtatambil a entu a manga ginis a ebpun sa bumbul'a kambing ka enggu masatiman bu. 19 Na su manga ibpelapis lun na inumbalan pamun sa lapis a ebpun sa upis a mama a bili-bili a pidsugan sa maliga. Na inumbalan pamun su entu sa lapis a ebpun sa mapia i embalangan nin a upis'a binatang. 20 Na inumbalan nilan sa manga palaus su Balung-balung a Tuleda a nia nilan inusal na papan a kayu a pansiu. 21 Na nia kalendu nu uman i palaus a papan na lima kamitru enggu nia nin menem balawagan na duapulu enggu pitu kapulgada. 22 Na uman i palaus a papan na binasayan sa mana sapa i pudit'in ka enggu mapia i kakapet'in. Na maitu ba i pinakaidan kanu langun nu palaus'u Balung-balung a Tuleda. 23 Na dua-wati i kadakel'u palaus a papan a inumbal'ilan a ibetad lu tampal sa laya. 24 Na minumbal bun silan sa pat-wati a udsadan a pilak a kapaudsadan kanu manga palaus a papan, dua timan a udsadan sa kanu uman i palaus. 25 Na dua-wati menem a palaus a papan i inumbal'ilan a ibetad lu tampal sa ilud. 26 Na minumbal bun silan sa pat-wati a udsadan a pilak a kapaudsadan kanu manga palaus a papan, dua timan a udsadan sa kanu uman i palaus.
27 Na minumbal bun silan sa nem timan a palaus a papan a ibetad lu tampal sa sedepan kanu taligkudan nu Balung-balung a Tuleda 28 enggu minumbal bun silan sa dua timan a palaus a papan a lu ipembetad kanu duakambala a pisuk'in. 29 Su manga palaus a papan sa kanu duakambala a pisuk'in na pinabpipikit enggu sineluban sa mana balusu lu sa pulu nin. 30 Na nabaluy a walu timan su palaus a entu a papan. Na pebpagudsaden sa sawati enggu nem a udsadan a pilak, na dua timan a udsadan i uman i sakapalaus.
31-32 Minumbal bun silan sa enggaga-lima timan a balawagen a kayu a pansiu kanu telu timan a ligid'u Balung-balung a Tuleda. Enggaga-lima timan kanu tampal sa ilud enggu laya, lima timan bun kanu tampal sa sedepan kanu taligkudan nu Balung-balung a Tuleda. 33 Na su balawagen a ipembetad sia sa luk na makasabpet kanu duakambala a ligid'in. 34 Na linumbus'ilan sa bulawan su manga palaus a papan enggu minumbal bun silan sa bulawan a mana balusu a kaseluban kanu manga balawagen a linumbus bun sa bulawan.
35 Minumbal bun silan sa dalinding a mapia a ginis a ebpun sa tanul a bilu, lambayung enggu maliga enggu pinamurdan sa pibpia-pianan a benal a buntal'a malaikat a aden papak'in. 36 Minumbal bun silan sa pat timan a palaus a kayu a pansiu a linumbus sa bulawan enggu sangkatan a bulawan ka lu nilan ba isangkat su dalinding. Su pat timan a entu a palaus na nakaudsad sa udsadan a pilak. 37 Na inumbalan nilan bun sa dalinding su bengawan nu Balung-balung a Tuleda a 'Bpangadapan kanu Kadenan sa mapia a ginis a ebpun sa tanul a bilu, lambayung enggu maliga a pibpia-pianan i kinaburda lun. 38 Minumbal bun silan sa lima timan a palaus a kayu a pansiu a linumbus sa bulawan su pundu nin enggu aden sangkatan nin. Na linumbus bun sa bulawan su balawagen nin. Ugaid'a su inumbal'ilan a lima timan a udsadan nu palaus na galang.