Su Kinaumbal kanu Kaun nu Kapasadan
37
Na inumbal'u Bisalil su Kaun nu Kapasadan nu Kadenan a nia nin inusal na kayu a pansiu. Na patpulu enggu lima kapulgada i tilenduan nin enggu duapulu enggu pitu kapulgada i balawagan nin maitu bun ba su kalambeg'in. 2 Na linumbus sa bulawan a dala simbul'in su liu enggu ludep'in enggu binalibetan bun sa pibpalasan a bulawan su manga ligid'in. 3 Na binetadan nin bun sa pat timan a bulawan a mana balusu enggu inideket'in kanu pat timan a palaus'u Kaun nu Kapasadan nu Kadenan. 4 Na inumbalan nin bun sa manga bantial a kayu a pansiu a linumbus sa bulawan. 5 Na iniselub'in kanu bulawan a mana balusu su manga bantial ka enggu masapuat su Kaun nu Kapasadan nu Kadenan. 6 Na inumbalan nin bun sa dapeng a bulawan a da simbul'in su Kaun nu Kapasadan. Na patpulu enggu lima kapulgada i kalendu nin enggu duapulu enggu pitu kapulgada i kaulad'in. 7-8 Na inumbalan nin bun sa dua timan a buntal'a malaikat a bulawan a aden papak'in kanu duakambala kanu ligid'u dapeng'u Kaun. 9 Na nakadsangula su entu enggu su papak'ilan na 'gkasilungan nin su dapeng'u Kaun nu Kapasadan enggu 'gkatulungan nilan su entu.Su Kinaumbal sa Lamisan a Pembetadan kanu Pan a Kurban
10 Na minumbal bun sekanin sa lamisan a kayu a pansiu a nia nin kalendu na telupulu enggu nem kapulgada. Na nia nin kaulad na sapulu enggu walu kapulgada enggu duapulu enggu pitu kapulgada menem i kalambeg'in. 11 Na linumbus'in sa bulawan a dala simbul'in enggu su manga ligid'in na binalibetan nin bun sa pibpalasan a bulawan. 12 Na linendingan nin sa pat kapulgada i kaulad'in a kayu enggu binalibet'in sa pibpalasan a bulawan. 13 Na guna su maitu na minumbal sekanin sa pat timan a bulawan a mana balusu ka inibetad'in kanu pat a pisuk'u lamisan a masupeg kanu manga palaus'in, 14 na su bulawan a entu a mana balusu a pedseluban sa bantial na masupeg lu kanu pat kapulgada a entu a inilending. 15 Na minumbal bun sekanin sa manga bantial a kayu a pansiu a linumbus sa bulawan a makasapuat kanu lamisan. 16 Na minumbal bun sekanin sa manga igagama nu lamisan a lampay enggu tagayan a bulawan a dala simbul'in. Minumbal bun sekanin sa ladia enggu binangga a bulawan a dala simbul'in a mausal kanu kurban a ipembubus.
Su Kinaumbal sa 'Bpametadan sa Palitan
17 Na minumbal bun sekanin sa 'bpametadan sa palitan a bulawan a dala simbul'in. Na su 'bpaguntulan lun enggu su pibpalasan sa ulak a mimbekad na dikena nakapitas i kinaumbal lun kanu lawas'u 'bpametadan sa palitan. 18 Na pinadsapak su entu sa nem timan na enggaga-telu timan i uman i sabala. 19 Na uman i sakasapak kanu entu na pibpalasan sa telu timan a ulak a almun a mimbekad. 20 Na su lawas'u entu a 'bpametadan sa palitan na pibpalasan sa pat timan a ulak a almun a mimbekad. 21 Na su telu timan kanu entu a manga ulak na lu inibetad kanu atag'u uman i edsumpatan nu sapak'in. 22 Na dikena nakapitas i kinaumbal kanu manga ulak a entu enggu kanu manga sapak'in kanu lawas'u 'bpametadan sa palitan a bulawan a da simbul'in. 23 Na minumbal bun sekanin sa pitu timan a palitan enggu ibpanipit kanu manga pus'in enggu ipedsalulung lun. Na langun nu entu na bulawan a dala simbul'in. 24 Na manga telupulu enggu lima kakilu i nausal a bulawan a dala simbul'in kanu kinaumbal kanu 'bpametadan sa palitan apeg'u langun nu igagama nin.
Su Kinaumbal kanu Tutungan kanu Mamut a Tutungen
25 Na minumbal bun sekanin sa tutungan a kayu a pansiu a pedtutungan kanu mamut a tutungen a edsulung-sulung i kasela nin, su kalendu nin enggu su balawagan nin na sapulu enggu walu kapulgada, na su kalambeg'in menem na telupulu enggu nem kapulgada. Na uman i pisuk'in na pibpalasan sa mana sidung. 26 Na linumbus'in sa bulawan a dala simbul'in su entu magidsan i sia sa untul'in enggu kanu manga ligid'in apeg'u pinabpalas sa mana sidung. Na binalibetan nin bun sa pibpalasan a bulawan su manga ligid'in a mag sa pulu. 27 Na binetadan nin bun sa bulawan a mana balusu su atag'u nakabalibet a entu kanu duakambala a ligid'in ka enggu kaseluban sa bantial amaika sapuaten. 28 Na su bantial na kayu a pansiu enggu linumbus sa bulawan.
29 Na minumbal bun sekanin sa lana a 'bpagusalen sa kapedsuti enggu mamut a pedtutungen a mana bun su kinaumbal'u mategel mangumbal sa kamutan.