Su Kinaumbal kanu Pegkurbanan
38
Na minumbal bun si Bisalil sa pegkurbanan a pedtutungan kanu manga kurban. Na nia nin lun inusal na kayu a pansiu. Na nia kasela nu entu na subela dua kamitru a edsulung-sulung. Na nia nin menem kalambeg na subela sakamitru. 2 Na pibpalasan nin sa mana sidung su pat a pisuk'in a dikena inipitas i kinaumbal'in lun kanu pegkurbanan enggu linumbus'in su entu sa galang. 3 Na su langun nu igagama nu pegkurbanan na galang a mana su 'bpametadan sa aw, ibpamala sa aw, matikungkung a lampay apeg'u masela a tinidur a 'bpagusalen kanu sapu nu binatang enggu su 'bpametadan sa waga na apuy. 4 Na inumbalan nin sa mana salalan a galang su pegkurbanan enggu iniansad'in lu ba. 5 Na minumbal bun sekanin sa pat timan a mana balusu a galang ka inikapet'in lu kanu manga pisuk'u pegkurbanan lu kanu baba nu nakabalibet lun. Na su mana balusu a entu a galang na pedseluban kanu bantial'u pegkurbanan. 6 Na inumbal'in bun su dua timan a bantial'u pegkurbanan a kayu a pansiu a linumbus'in sa galang. 7 Na iniselub'in su entu kanu mana balusu kanu pat a pisuk'u pegkurbanan ka enggu masapuat. Na su pegkurbanan a entu na nia nin inusal na papan a kayu a pansiu enggu kinaung i ludep'in.8 Na minumbal bun sekanin sa palanggan a galang enggu 'bpaguntulan lun a galang. Na su manga galang a inusal sa entu na ebpun kanu galang'u pagalungan nu manga babay a 'bpananabangan lu kanu bengawan nu Balung-balung a Tuleda.
Su Kinaumbal kanu Lama-lama enggu Alad'u Balung-balung a Tuleda
9-11 Inumbalan nin sa lama-lama su Balung-balung a Tuleda a 'Bpangadapan kanu Kadenan. Inumbalan nin bun su entu sa mapia a ginis a ibalibet'in lun, na su sia mag sa laya na patpulu enggu pat kamitru enggu maitu bun su sia mag sa ilud na patpulu enggu pat kamitru bun i kalendu nin. Na su palaus'in a sia mag sa laya na dua-wati enggu linumbus su entu sa galang. Na su udsadan nin menem a dua-wati na galang a dala simbul'in. Na maitu bun ba i pinakaidan kanu dua-wati a palaus'in enggu udsadan nin a sia mag sa ilud. Ugaid'a su manga sangkatan nin enggu su manga balawagen nin na pilak.
12 Na su alad a ginis a lu mag sa sedepan na nia nin kalendu na duapulu enggu dua kamitru a ipedsangkat kanu sawati a palaus a pebpagudsaden kanu sawati a udsadan. Minumbal bun sa sangkatan a pilak enggu balawagen a pilak. 13 Na su lu menem mag sa sebangan a kasangulan nu Balung-balung a Tuleda na duapulu enggu dua kamitru bun i balawagan nin. 14-15 Na su ginis a sia mag sa kanu kawanan nu bengawan na nem kamitru enggu tenga, maitu bun ba su sia mag sa biwang na nem kamitru bun enggu tenga. Na enggaga-telu timan i palaus'in enggu enggaga-telu timan bun i udsadan nin.
16 Na su langun nu ipembalibet kanu lama-lama na mapia a ginis. 17 Na su 'gkaudsadan nu manga palaus'in na galang. Na su manga sangkatan nin menem enggu su balawagen nin na pilak. Linumbus bun sa pilak su pundu nu palaus taman den kanu manga balawagen nu langun nu palaus a ipembalibet kanu lama-lama na pilak bun. 18 Na su ginis a ibetad kanu bengawan nu lama-lama na mapia enggu binurdan sa tanul a bilu, lambayung enggu maliga. Na nia nin balawagan na manga siyawa kamitru enggu nia nin kalambeg na subela dua kamitru a mana bun su kalambeg'u manga ped a ginis a pakabalibet kanu lama-lama. 19 Na ipendeket su entu kanu pat timan a palaus a pebpagudsaden kanu pat timan a udsadan a galang. Na su manga sangkatan nin enggu su manga balawagen nin na pilak enggu su pundu nu palaus na linumbus bun sa pilak. 20 Na minumbal bun sa manga budsud a galang a 'bpagiketan kanu manga ginis magidsan pan i lu sa liu enggu ludep'u lama-lama nu Balung-balung a Tuleda.
Su Bulawan, Pilak enggu Galang a 'Bpagusalen kanu Kapatindeg kanu Balung-balung a Tuleda
21 Na nia ba i kadakel'u bulawan, pilak enggu galang a inusal kanu Balung-balung a Tuleda a pembetadan kanu manga kasuguan a inisulat kanu tebi na watu.b Na su manga igagama a nia na inisulat'u manga tupu nu Libi a sia luyud kanu inisugu nu Musa. Na nia nangunanan kanu entu na si Itamar a wata nu Harun a 'bpangurban. 22 Na si Bisalil a wata ni Udi a apu ni Hur a ebpun kanu tupu nu Yahuda i nangunanan kanu kinanggalebek kanu langun nu inisugu a entu nu Kadenan a Mapulu kanu Musa. 23 Na nia tinemabang sa lekanin na si Uhuliyab a wata ni Ahisamak a ebpun kanu tupu nu Dan. Na mategel i kapangukil'in enggu kapabpalas'in kanu galebek'in. Mategel bun i kapamurda nin sa mapia a ginis a ebpun sa tanul a bilu, lambayung enggu maliga.
24 Na nia kaugat'u bulawan a nausal kanu kapatindeg kanu Balung-balung a Tuleda a inenggay nu manga taw na sangibu kakilu sia luyud kanu timbangan nu 'bpamangurban. 25 Na su langun nu pilak menem a nalimud na nakasaut sa telu ngibu enggu lima gatus enggu duapulu kakilu sia bun luyud kanu timbangan nu 'bpamangurban. Na su langun nu entu na nakabpun kanu nabilang a manga taw kanu dalepa. 26 Na uman i isa kanu nabilang a entu na minenggay sa nem kagelamus a pilak sia luyud kanu timbangan nu 'bpamangurban. Na su manga taw a entu a nabilang na nia nin umul na iganat sa duapulu lagun 'bpapulu. Na nia kadakel'u nabilang a manga mama bu na nakasaut sa nem gatus enggu telu ngibu enggu lima gatus enggu limapulu kataw. 27 Na nia kadakel'u pilak a nausal kanu magatus a udsadan nu Balung-balung a Tuleda a 'Bpangadapan kanu Kadenan na telu ngibu enggu lima gatus kakilu a pilak a lusud den lu ba su udsadan nu palaus a pembetadan kanu dalinding. Na uman i sakaudsadan na telupulu enggu lima kakilu i nausal lun a pilak. 28 Na su nasama menem a duapulu kakilu a pilak na inumbal a balawagen, sangkatan nu manga palaus enggu inilumbus kanu pundu nu manga palaus. 29 Na su kadakel'u galang menem a nakaenggay nu manga taw na manga dua ngibu enggu lima gatus kakilu i kaugat'in. 30 Na inusal su entu kanu kinaumbal kanu udsadan nu palaus sia kanu bengawan nu Balung-balung a Tuleda. Na su ped menem na inusal kanu kinaumbal kanu pegkurbanan apeg'u mana salalan enggu su manga igagama nin. 31 Na inusal bun su entu kanu manga udsadan sia kanu lama-lama nu Balung-balung a Tuleda enggu lu kanu manga udsadan sia kanu bengawan nu lama-lama taman kanu manga budsud a 'bpagiketan kanu manga ginis magidsan pan i lu sa liu enggu ludep'u lama-lama.