39
Na namanay bun si Bisalil enggu su manga ped'in sa manga balegkas'u 'bpamangurban a nia nin inusal na tanul a bilu, lambayung enggu maliga a embalegkasen nilan amaika inggulalan nilan su galebekan nilan lu kanu Balung-balung a Tuleda a 'Bpangadapan kanu Kadenan. Pinamanayan nilan bun si Harun sa suti a balegkas a sia luyud kanu inisugu nu Kadenan a Mapulu kanu Musa.Su Pidsugan a Balegkas'u 'Bpangurban
2-3 Pinamanay nin su pidsugan a balegkas'u 'bpangurban.a Nia nin inusal na mapia a ginis a ebpun sa tanul a bilu, lambayung enggu maliga. Napagkanipis bun silan sa bulawan ka iniamung'ilan manay kanu tanul a bilu, lambayung enggu maliga. Na pibpia-pianan a benal i kinapanay lun. 4 Binetadan nin sa salay su dua embala a waga nu entu a nakapadsumpat kanu kasangulan nin enggu taligkudan nin. 5 Na su pakut'in menem na maitu bun ba, ebpun bun sa tanul a bilu, lambayung enggu maliga a inamungan bun murda sa bulawan. Na su langun nu entu na inumbal'ilan sia luyud kanu ngin i inisugu nu Kadenan a Mapulu kanu Musa.
6 Na pibpalamatan nilan sa manga watu a uniks a pidtuanganan sa bulawan enggu inukilan nilan su watu a entu kanu manga ngala nu wata a mama nu Israil. 7 Na lu nilan iniuntul su watu kanu waga nu salay nu pidsugan a balegkas a nabaluy a tademan kanu manga tupu nu manga taw a Israil. Na langun nu entu na inumbal'ilan sia luyud kanu ngin i inisugu nu Kadenan a Mapulu kanu Musa.
Su Lapis sia sa Laleb a Aden Uyut'in
8 Minumbal bun silan sa lapis sia sa laleb a aden uyut'in. Nia nilan inusal na mapia a ginis a ebpun sa tanul a bilu, lambayung enggu maliga a inamungan manay sa bulawan a mana bun su inusal kanu pidsugan a balegkas'u 'bpangurban. 9 Na su uyut'in sia sa laleb na siyaw kapulgada a edsulung-sulung i kaulad'in. 10 Pinagkuyug-kuyug'ilan sa pat kuyug i kinabetad'ilan kanu manga watu. Na kanu muna-muna a kuyugan na su watu a bedtuan sa rubi, tupas enggu biril. 11 Na kanu ikadua menem a kuyugan na nia nakabetad a watu na imirald, sapir enggu diamanti. 12 Na kanu ikatelu menem a kuyugan a watu na asintu, agat enggu amitis. 13 Na kanu ikapat menem a kuyugan a watu na krisulitu, uniks enggu yaspir. Na su langun nu entu na pidtuanganan sa bulawan. 14 Na uman i satiman kanu sapulu enggu dua a watu na inukilan kanu ngala nu uman i wata a mama nu Israil a nabaluy a tademan kanu manga tupu nin.
15 Su uyut'in sia sa laleb na inumbalan sa dua timan a sinubid a bulawan a dala simbul'in. 16 Na inumbalan nilan sa dua timan a mana sising a bulawan a pidtuanganan bun sa bulawan. Na inibetad'ilan su entu kanu duakambala a pisuk'in sia sa pulu. 17 Na su dua timan a entu a sinubid a bulawan na iniket'ilan kanu mana a entu sising 18 enggu iniket'ilan bun su sabala a pusan nin kanu tuangan a bulawan a nakadeket kanu waga nu salay nu pidsugan a balegkas'u 'bpangurban. 19 Minumbal pamun silan sa dua timan pan a bulawan a mana sising ka inibetad'ilan lu kanu dua timan a pisuk'u uyut a entu sia sa baba a sia tampal sa didalem. 20 Inumbalan nilan pamun sa dua timan pan a bulawan a mana sising ka inibetad'ilan lu kanu liwawaw nu pidsugan a balegkas lu mag sa pulu nu pebpakutan. Na nakadtipasa sa paidu su mana sising a inibetad sia kanu pisuk sa baba nu lapis a aden uyut'in. 21 Na entu pan ka pinabpikit'ilan malud sa tali a bilu su mana a entu manga sising a bulawan asal'a di 'gkiab-kiab su uyut a inilapis. Na langun nu entu na inumbal'ilan sia luyud kanu inisugu nu Kadenan a Mapulu kanu Musa.
Su Ped pan a Balegkas'u 'Bpamangurban
22 Na minaul bun silan sa lambung a bilu a 'gkalapisan nu pidsugan a balegkas'u 'bpangurban. 23 Na aden 'gkaseluban na ulu nin a linampingan ka asal'a dili makisi. 24 Na pibpalasan nilan bun su manga ligid'u palimping'in sa mana manga unga na kayu a pumigranata a nia inusal lun na mapia a ginis a ebpun sa tanul a bilu, lambayung enggu maliga. 25-26 Na minumbal bun silan sa tungkaling a bulawan a da simbul'in a inipametad'ilan lu kanu pamageletan nu mana a entu pumigranata. Na pembalegkasen ni Harun su entu sa kapenggulalan nin kanu galebekan nin sia kanu adapan nu Kadenan a Mapulu. Na inumbal'ilan i entu sia luyud kanu ngin i inisugu nu Kadenan a Mapulu kanu Musa.
27 Na inumbalan nilan bun si Harun enggu su manga wata nin a mama sa lambung a mapia i ginis'in. 28 Na mapia bun a ginis i inusal'ilan kanu manga suleban enggu kanu manga sangiawa. 29 Na maitu bun su pakut, na mapia bun a ginis i inusal lun enggu binurdan sa tanul a nia nin suga na bilu, lambayung enggu maliga. Na su langun nu entu na inumbal'ilan sia luyud kanu ngin i inisugu nu Kadenan a Mapulu kanu Musa.
30 Na minumbal bun silan sa suti a paliwatu a bulawan a dala simbul'in a inukilan sa kadtalu a “Iniumun kanu Kadenan a Mapulu.” 31 Na iniketan nilan sa tali a bilu su paliwatu asal'a makaiket lu kanu kasangulan nu suleban a mana bun su inisugu nu Kadenan a Mapulu kanu Musa.
Su Nangapasad a Igagama nu Balung-balung a Tuleda
32 Na napasad enggalebek su langun nu igagama nu Balung-balung a Tuleda a 'Bpangadapan kanu Kadenan. Na pinggalebek'u manga taw a Israil su entu sia luyud kanu ngin i inisugu nu Kadenan a Mapulu kanu Musa. 33 Na guna su maitu na inipailay nilan kanu Musa su langun nu igagama nu Balung-balung a Tuleda a mana su manga ibpamelapis lun, su manga sangkatan nin, su manga palaus a papan, su manga balawagen nin, su manga palaus'in enggu su manga udsadan nin. 34 Inipailay nilan bun su ibpamelapis lun a upis'a mama a bili-bili a pidsugan sa maliga enggu su mangapia a upis'a binatang, maitu bun su dalinding a makapagelet kanu Kaun nu Kapasadan, 35 apeg'u Kaun nu Kapasadan enggu su manga bantial'in enggu dapeng'in. 36 Na inipailay nilan bun su lamisan enggu su langun nu igagama nin apeg'u pan a ipembetad kanu adapan nu Kadenan a Mapulu, 37 su 'bpametadan sa palitan a bulawan a dala simbul'in enggu su manga palitan nin apeg'u tenggung'in enggu su langun nu igagama nin, 38 su tutungan a bulawan apeg'u lana a 'bpagusalen sa kapedsuti enggu su mamut a tutungen apeg'u ginis a ipendalinding kanu bengawan nu Balung-balung a Tuleda a 'Bpangadapan kanu Kadenan, 39 su galang a pegkurbanan enggu su galang a salalan, su manga bantial'in enggu su manga igagama nin, su palanggan a galang apeg'u 'bpaguntulan lun a galang, 40 su manga dalinding a pakabalibet kanu lama-lama enggu su dalinding'u bengawan nin, su manga palaus'in apeg'u manga udsadan nin, su manga budsud a 'bpagiketan kanu manga ginis apeg'u manga iket'in enggu su ped pan a 'bpagusalen kanu Balung-balung a Tuleda a 'Bpangadapan kanu Kadenan a Mapulu. 41 Na init'ilan bun su suti a balegkas'u 'bpangurban a si Harun enggu su balegkas'u manga wata nin a mama a mapia i kinaumbal lun a pembalegkasen nilan amaika inggulalan nilan su galebekan nilan lu kanu Balung-balung a Tuleda.