Su Papata nu Kadenan kanu Kapatindeg kanu Balung-balung a Tuleda
40
Na pidtalu nu Kadenan a Mapulu kanu Musa i 2 “Kanu muna-muna a gay kanu muna-muna a ulan-ulan, na patindeg ka su Balung-balung a Tuleda a 'Bpangadapan sa laki. 3 Na entu pan ka iludep'engka lu ba su Kaun nu Kapasadan enggu dalindingi ka sa ginis. 4 Iludep'engka bun su lamisan lu kanu Balung-balung a Tuleda enggu ipametad'engka den su manga igagama nin, iludep'engka bun su 'bpametadan sa palitan enggu ipametad'engka bun su manga palitan nin. 5 Na ibetad'engka bun lu kanu kasangulan nu Kaun nu Kapasadan su bulawan a pedtutungan kanu mamut a tutungen enggu ibetad'engka bun su ginis lu kanu bengawan nu Balung-balung a Tuleda a 'Bpangadapan sa laki. 6 Na ibetad'engka lu kanu kasangulan nu bengawan su pegkurbanan sa pedtutungen a pangangayamen. 7 Ibetad'engka bun su palanggan kanu pageletan nu Balung-balung a Tuleda enggu kanu pegkurbanan, entu pan ka tagui ka sa ig su palanggan. 8 Na ibetad'engka su ginis a alad'u lama-lama nu Balung-balung a Tuleda a 'Bpangadapan sa laki. Na ibetad'engka bun su dalinding'u bengawan nin. 9 Na entu pan ka kua ka su lana a 'bpagusalen kanu kapedsuti ka pamesiki ka su Balung-balung a Tuleda enggu su langun nu igagama nin ka enggu masuti a makasenggay sa laki. 10 Na maitu bun ba i pakaidi ka kanu pegkurbanan kanu pedtutungen a pangangayamen apeg'u manga igagama nin ka enggu mabaluy a suti a benal su pegkurbanan. 11 Pamesiki ka bun su palanggan apeg'u 'bpaguntulan lun ka enggu makasenggay sa laki. 12 Na edtapik ka si Harun enggu su manga wata nin a mama lu kanu bengawan nu Balung-balung a Tuleda a 'Bpangadapan sa laki ka salawati ka silan kanu ig a entu. 13 Na entu pan ka ipambalegkas'engka kani Harun su suti a balegkas enggu bubusi ka sekanin kanu lana a 'bpagusalen sa kapedsuti ka enggu sekanin makasenggay sa laki a mabaluy a 'bpangurban. 14 Edtapik ka bun su manga wata nin a mama enggu ipambalegkas'engka kanilan su lambung'ilan. 15 Na bubusi ka bun silan kanu lana a 'bpagusalen sa kapedsuti a mana bun su kinabubus'engka kanu ama nilan ka enggu silan makapangurban. Na su kinabubus'engka a entu sa kanilan sa lana na mabaluy den silan a mangurban taman kanu manga temundug pan a manga muliataw nilan.”Su Kinapatindeg kanu Balung-balung a Tuleda a 'Bpangadapan kanu Kadenan a Mapulu
16 Na pinggula den nu Musa su langun nu inisugu nu Kadenan a Mapulu sa lekanin. 17 Na pinatindeg'in den su Balung-balung a Tuleda kanu muna-muna a gay kanu muna-muna a ulan-ulan kanu ikadua lagun iganat kanu kinaliu nilan sa dalepa a Egypt. 18 Na maya ba i kinapatindeg'u Musa kanu Balung-balung a Tuleda. Na inibetad'in su manga udsadan nin, su manga palaus a papan, su manga balawagen nin apeg'u manga palaus'in. 19 Na linapisan nin su untul'u Balung-balung a Tuleda kanu manga lapis'in a mana su inisugu nu Kadenan a Mapulu sa lekanin. 20 Na entu pan na iniludep'in kanu Kaun nu Kapasadan su watu a sinulatan kanu kasuguan nu Kadenan a Mapulu enggu iniselub'in su manga bantial kanu mana balusu a nakabetad kanu Kaun enggu dinapengan nin. 21 Iniludep'in bun su Kaun nu Kapasadan kanu Balung-balung a Tuleda enggu dinalindingan nin sa ginis su entu a mana bun su inisugu nu Kadenan a Mapulu. 22 Na inibetad'in su lamisan lu kanu liu nu inidalinding a ginis lu mag sa ilud 23 enggu inibetad'in su pan lu kanu lamisan kanu adapan nu Kadenan a Mapulu a mana bun su inisugu nin. 24 Inibetad'in bun kanu Balung-balung a Tuleda su 'bpametadan sa palitan sia mag sa laya lu kanu 'gkasangulan nu lamisan 25 enggu inipametad'in bun su manga palitan lu kanu 'bpametadan lun kanu adapan nu Kadenan a Mapulu a mana bun su inisugu nin sa lekanin. 26 Inibetad'in bun kanu Balung-balung a Tuleda su bulawan a tutungan lu kanu kasangulan nu ginis a inidalinding 27 enggu tinemutung sekanin lu ba sa mamut a tutungen a mana bun su inisugu nu Kadenan a Mapulu sa lekanin. 28 Na inibetad'in bun su mapia a ginis kanu bengawan nu Balung-balung a Tuleda. 29 Na inibetad'in bun su pegkurbanan sa kurban a pedtutungen kanu ubay nu bengawan nu Balung-balung a Tuleda, entu pan ka migkurban sekanin sa kurban a pedtutungen langun enggu mapia a arina a mana bun su inisugu nu Kadenan a Mapulu. 30 Na inibetad'in bun su palanggan kanu pageletan nu Balung-balung a Tuleda enggu kanu pegkurbanan, na binetadan nin sa ig su entu ka enggu lu ba sekanin makagagas 31 sa ay enggu lima apeg'i Harun taman kanu manga wata nin a mama. 32 Na amaika lemudep silan kanu Balung-balung a Tuleda atawa ka semupeg silan kanu pegkurbanan na mangagas silan muna a mana su inisugu nu Kadenan a Mapulu kanu Musa. 33 Na guna su maitu na inibetad'in su ginis a alad'u lama-lama a nakabalibet kanu Balung-balung a Tuleda enggu kanu pegkurbanan. Na binetadan nin bun sa dalinding su bengawan nu lama-lama. Guna su maitu na napasad'u Musa su langun nu inipanggalebek sa lekanin.
Su Sigay nu Kadenan a Mapulu
34 Daka guna su maitu na nabausan na gabun su Balung-balung a Tuleda enggu linangkapan nu sigay nu Kadenan a Mapulu. 35 Na sabap sa entu na dili pakaludep su Musa kanu Balung-balung a Tuleda. 36 Na uman pebpapulu su gabun kanu Balung-balung a Tuleda na su manga taw a Israil na gemanat menem kanu pegkampuan nilan. 37 Ugaid'a amaika dili pebpapulu su gabun na dili silan pengganat. 38 Na su gabun a sigay nu Kadenan a Mapulu na 'bpamagatag-atag uman malamag ugaid'a amaika magabi menem na mana apuy a pegkaleg. Na entu ba i 'gkailay nu manga taw a Israil apia endaw silan pebpawang.
Wassalam