50
Daka nakakep'u Yusup su ama nin enggu nakauliang taman sa sinium'in. 2 Na inisugu nin kanu manga panunugun nin a taligamut i sapuan nilan sa manga mamut a lana a ipedsapu sa bangkay ka enggu di maledak su bangkay nu ama nin. Na maitu den ba mambu i pinggula nu manga taligamut. 3 Na nakasaut sa patpulu gay i kinanggula nilan lun i entu kagina maitu ba i kauget'u kapedsapu nilan kanu bangkay nu minatay. Na kanu dalem'u pitupulu gay na ginagagawan bu su manga taw a Egypt.4 Na guna su napupus den su gay nu kinagagaw kanu minatay na nia pidtalu nu Yusup kanu 'gkangasaligan nu Piraun na “Amaika saben-sabenal a ipegkalimu aku nu na imbitiala nu pan sa laki su Piraun ka edtalu nu sa lekanin i 5 ‘Kanu mangagan den mauma na limu nu Kadenan su ama ku na pinadsapa aku nin sa lu ku sekanin ilebeng kanu pinagadil'in a 'bpamelebengan a lu kanu kalupan sa Kanaan.’ Na kagina ka maitu, na 'bpangenin ku sa leka i suguti aku a makalebeng ku su ama ku kanu entu a 'bpamelebengan, ugaid'a embalingan aku bun sia.” 6 Na nia inisawal'u Piraun na “Ganat ka den ka ilebeng'engka su ama nengka a mana bun su inidsapa nengka lun.”
7 Na guna su maitu na ginemanat den su Yusup ka enggu nin makalebeng su ama nin kanu entu a 'bpamelebengan. Na minunut bun mambu sa lekanin su langun nu 'gkangasaligan nu Piraun, su manga mapulu i kamal'in kanu tulugan taman den kanu manga kalukesan sa kalupan nu dalepa a Egypt. 8 Minunut bun su manga suled'u Yusup enggu su langun nu sakambinabatan nu ama nin. Nia bu nasama lu sa dalepa a Gusin na su manga wata enggu su manga pangangayamen nilan. 9 Aden bun manga migkukuda enggu migkakalisa a namangunut sa kanilan tembu madakel a benal silan.
10 Na nia nilan kinauma lu kanu tagikan sa dalepa a Atad a tampal sa sebangan nu lawas'a ig'u Jordan na tinemelen silan lu ba ka ginagawana pan a benal silan. Na kanu dalem'u nakapitu gay lu ba na ginagawan bu si Yusup kanu ama nin. 11 Na guna mailay nu dumadalepa a manga taw a Kanaan su kinagagaw lu kanu tagikan sa dalepa a Atad na nia nilan nadtalu na “Sangat besen i kapasang a kagagaw nu manga taw a Egypt.” Tembu nabedtuan sa Abil-Misraimb su dalepa a entu a tampal sa sebangan nu lawas'a ig'u Jordan.
12 Na natuman den mambu nu manga wata nu Yakub su inisugu nin kanilan. 13 Pidtapik'ilan den su bangkay nu ama nilan lu sa kalupan a Kanaan, ka inilebeng'ilan den kanu takub sa kalupan a Makpila a masupeg sa dalepa a Mamri. Entu ba su takub a pinamasa nu Ibrahim kani Iprun a taw a Hit ka enggu nilan kapamelebengan. 14 Na nia kinapasad lemebeng kanu ama nu Yusup na mimbalingan sekanin lu sa dalepa a Egypt kaped'u manga suled'in enggu su langun nu namangunut sa kinalebeng kanu ama nin.
Su Kinapasalig'u Yusup kanu manga Suled'in
15 Na ulian nu kinapatay nu ama nilan na nia nadtalu nu manga suled'u Yusup na “Panun tanu den amaika aden sakit'a ginawa ni Yusup sa lekitanu taman sa pabayaden tanu nin kanu langun nu malat a pinakaidan tanu lun?” 16 Daka napapait silan sa katigan kanu Yusup sa nia nilan pidtalu na “Unan nu da pan matay su ama tanu na aden inipakalimu-limu nin sa lekami sa nia nin pidtalu na 17 ‘Edtalu nu kani Yusup i “'Bpangenin ku sa leka i lipatani ka den su su kadupangan a pinggula nilan sa leka.” ’ Tembu 'bpangenin nami sa leka i ampun kami den a manga ulipen nu Kadenan nu ama nengka.” Na guna makineg'u Yusup su entu na nakauliang sekanin.
18 Daka linemu sa lekanin su manga suled'in enggu namedsugiud lu kanu kaadapan nin sa nia nilan pidtalu na “Manga ulipen kami nengka den.” 19 Ugaid'a nia pidtalu nu Yusup kanilan na “Da kanu 'gkagilek ka dikena saki su Kadenan! 20 Mawag su nangguniat'u sa laki ugaid'a su Kadenan i migkahanda lun i entu kanu kapianan nu madakel a taw ka enggu silan makalipuas a mana su 'gkanggula saguna. 21 Na tembu da kanu 'gkagilek ka tiakapan ku sekanu taman den kanu manga wata nu.” Na maitu ba i kinapasalig'in kanu manga suled'in tembu migkaluag su nanggiginawa nilan.
Su Kinapatay nu Yusup
22 Na lu den ba mindalepa sa Egypt su Yusup taman kanu sakambinabatan nu ama nin. Na nakasaut pamun su umul'u Yusup sa nakamagatus enggu sapulu lagun. 23 Na nasaut'in pamun su manga apu ni Ipraim taman sa nadsasakupuc nin pan su manga apu ni Manasi kanu wata nin a si Makir. Na initimbang'in a wata nin su manga wata ni Makir. 24 Na nia pidtalu nu Yusup kanu manga suled'ind na “Mangagan aku den mauma na limu nu Kadenan. Ugaid'a natatalanged i edtabangan kanu nu Kadenan enggu iawa kanu nin sia, ka pananggiten kanu nin kanu kalupan a inibpasad'in kanu Ibrahim, kanu Iskak enggu kanu Yakub.” 25 Daka pinadsapa nu Yusup su sakambinabatan nu Israil sa “Natatalanged i edtabangan kanu nu Kadenan. Na idsapa nu sa laki i edtapiken nu su bangkay ku sa kaawa nu sia.”
26 Na nakamagatus enggu sapulu lagun i umul'u Yusup kanu kinapatay nin lu sa dalepa a Egypt. Na guna den kasapui sa manga mamut a lana a ipedsapu sa bangkay su bangkay nin na inibetad'ilan den su entu kanu 'bpametadan kanu minatay.
Wassalam