Pinalihalan nu Yakub su manga Wata nin
49
Daka inipatawag'u Yakub su manga wata nin ka nia nin pidtalu na “Pamangubay kanu sa laki ka edtalun ku sa lekanu su mangauma a manggula nu.2 “Sekanu a manga wata ni Yakub, na pamangubay kanu pan
ka pakikineg'u su ama nu a si Israil.
3 “Seka Rubin a su kaka sa langun a wata ku,
su bagel ku enggu su muna-muna a unga nu kamamai ku.
Na dala lemawan sa leka sa kabadtug enggu da bun lemawan sa leka sa kabagel.a
4 Mana ka bun su maleges a kadalem a 'bpaminasakan
ugaid'a di ka bun mabaluy a balapantag a taw
kagina pinggiabuan nengka su ama nengka
ka dinulug'engka su kaluma nin.
5 “Sekanu menem Simiun enggu Libi na edtampil kanu a benal
ka su manga sundang'u na 'bpagusalen nu sa kabpamunu.b
6 Di ku amungan su apia ngin a engguniaten nu,
di ku bun lumbukan su apia ngin a pagumpungan nu,
ka amaika 'gkalipunget kanu na dala padawan-dawan nu mangimatay,
ka apia su binatang na 'gkatiud amaika 'gkasugat'a ginawa nu.
7 Idsinta ku sekanu sabap kanu pakatiawan-tiawan a lipunget'u enggu su libuteng'u atay nu!
Pabpalak-palaken ku sekanu sia kanu manga tupu ni Yakub
enggu mamakatagayak kanu kalupan nu Israil.
8 “Seka menem Yahuda na badtugen ka nu manga suled'engka,
tabanan nengka su manga kuntela nengka,
langun nu manga suled'engka na magadat sa leka.
9 Nia kalagidan sa leka na manguda a alimaw,
ka nia nin kapasad mimatay na embalingan sa lingkab'in.
Nia nengka kalagidan na alimaw a pedtatalegkeb sa kabpangintelenen nin
a dala makatika lun mukaw.
10 Su tungked'u kadatu na di maawa sa leka
atawa ka su tanda nu kamal na di maawa kanu manga tupu nengka
taman sa kauma nu tupu nengka a tidtu a kigkuan kanu tungked'u kadatu.
Na su entu a tupu na paginugutan nu manga bangsa.
11 Na su manguda a mama a kimar nin na lu nin 'bpagiketan kanu manga ubas,
lu kanu pinamili a mapia sa langun a pamumulan na ubas.
Apia su balegkas'in na nia ibpamipi lun na alak a ebpun sa ig'a ubas,
maitu bun, su lambung'in na ig a ubas i ibpamipi lun.
12 Su manga mata nin na migkaliga na alak a ebpun sa ig'a ubasc
enggu su manga ngipen nin na migkaputi na gatas.d
13 “Seka menem Sibulun na lu 'gkakaleben kanu dedsan,
seka i ampilan nu manga kapal.
Su sakup'engka na makauma taman sa Sidun.
14 “Seka menem Isakar na mana ka su mabagel a kimar
a pebpapangintelenen kanu pageletan nu dua timan a lugenan
15 a guna nin mailay i mapia su 'bpangintelenan nin
enggu makalilini a benal su kalupan a entu
na tinalima nin den su kaugat'u 'bpananggiten
ka nia nin pan tinemu i mapapangungulipen.
16 “Seka menem Dan na panguluan nengka su maginged'engka,
makagidsan nengka su ped a manga bangsa nu Israil.
17 Mabaluy ka a mana nipay lu kanu ligid'u lalan
a makagkaid kanu lalan
ka temuka sa palu nu manga kuda a pedsagad
ka enggu 'gkangatapaya sa kangaulug'in su pegkukuda lun.
18 “Hu Kadenan a Mapulu, 'gkapangingalap ku man su kabpamelipuas'engka.
19 “Seka menem Gad na lusudan ka nu manga tulisan
ugaid'a sugkuban nengka silan taman sa edsaluban nengka.
20 “Si Asir menem na su kauyagan lu lekanin na dala pagidsan nin
ka kapangadenan nin sa mangapia a pegken su manga datu.
21 “Si Naptali menem na mana saladeng a pinambaya-baya,
ka katigan a mangapia i mapananggit'in.
22 “Na si Yusup menem na mana sekanin 'bpagunga a benal a ubas
a lu kanu ligid'u bualan.
Su manga sapak'in na 'bpamamusug kanu alad.
23 Lusudan sekanin nu manga talinganup,
taman sa kapasangan a benal sekanin kanu kabusug lun.
24-25 Ugaid'a sabap kanu kabagel'u Kadenan ni Yakub a Barakat sa Langun,
a su mabagel a Watu a Kuta a Pedtuganul kanu Israil,
na di mapalin nu busug'engka
enggu di magkeleng-keleng su ngelay nengka.
Na su Kadenan a Barakat sa Langun a Kadenan nu ama nengka
i temabang sa leka enggu mamalihala sa leka.
Palihalan ka nin sa ig a ebpun sa langit,
palihalan ka nin sa pedsimbual a ig a ebpun kanu manga bualan
enggu palihalan ka nin sa pangangayamen enggu manga muliataw.
26 Su manga palihala nu ama nengka
na minuna pan i kapia nin kanu manga palihala a pakaenggay nu da tedtab'in a kapalawan,
minuna pan kanu langun nu mangapia den sa langun a lu kanu da taman nin a kabakuludan.
Na lemangkap su langun nu entu a palihala kani Yusup
a napamili a mapulu kanu langun nu manga suled'in.
27 “Na si Buniamin menem na mana sekanin su busawn a talaw a asu,
nia nin kagkapita na pembusawan nin su nabunu nin
enggu nia nin menem kagkagabi na pembad-baden nin su nangasama.”
28 Na silan ba a entu su sapulu enggu dua a bangsa nu Israil a manga wata nu Yakub. Na maitu ba i ukit a kinapalihala nu Yakub kanilan. Pinalihalan nin su uman i sakataw kanu palihala a makadait kanilan.
Su Kinapatay nu Yakub
29 Daka nia pidtalu nu Yakub kanilan na “Mangagan aku den mauma na limu nu Kadenan. Na lu aku nu ilebeng kanu takub a linebengan kanu manga lukes ku lu kanu kalupan ni Iprun a taw a Hit. 30 Su takub a entu na lu sa dalepa a Makpila a masupeg sa Mamri a lu kanu kalupan sa Kanaan. Pinamasa i entu nu Ibrahim kani Iprun a taw a Hit ka inumbal'in a 'bpamelebengan. 31 Na lu ba inilebeng su Ibrahim enggu su kaluma nin a su Sara enggu lu bun ba inilebeng su Iskak enggu su kaluma nin a si Ribika taman sa lu ku bun ba mambu inilebeng si Lia. 32 Na su nasakupan nu entu a lupa enggu su takub na napamasa su entu kanu manga taw a Hit.” 33 Na guna den mapasad manutuma nu Yakub su manga wata nin na miniga den sekanin, entu pan ka mibpandus den mambu su napas'in ka midtatangguna den sekanin kanu limu nu Kadenan.