Su Kinapalihala kani Manasi enggu si Ipraim
48
Na guna maipus su langun nu entu na aden nakadtalu kanu Yusup sa di 'gkapia i ginawa nu ama nin. Daka pinaunut'in lemu su dua kataw a wata nin a mama a si Manasi enggu si Ipraim. 2 Na guna katawi nu Yakub i pakauma su wata nin a su Yusup na mibpapalanat sekanin embangun lu kanu 'bpagigan nin ka minayan. 3 Na nia pidtalu nu Yakub kanu Yusup na “Kanu timpu a lu aku sa dalepa a Lus kanu kalupan sa Kanaan na pibpayagan aku nu Kadenan a Barakat sa Langun enggu pinalihalan aku nin lu ba. 4 Nia nin pidtalu sa laki na ‘Pagkadakelen ku su muliataw nengka taman sa mabaluy kanu a bangsa nu manga tribu. Na inggay ku su kalupan a nia a mabpusaka nu tupu nengka taman sa taman.’ 5 Na kagina ka maitu na su wata nengka a si Ipraim enggu si Manasi a sia pimbata sa dalepa a Egypt unan nu kinasia ku na itimbang ku silan a manga wata ku a mana si Rubin enggu si Simiun. 6 Ugaid'a su makatundug sa kanilan a embatan na leka den enggu su kawalisan nilan na sia den matuntul kanu ngala nu manga suled'ilan. 7 Kagina kanu kapembalingan ku lu sa kalupan na Kanaan ebpun sa dalepa a Padan-Aram na nalidu a benal i ginawa ku kagina sia pan sa lalan a masupeg sa dalepa a Iprat na minatay si Rakil. Na lu ku ba sekanin inilebeng kanu ligid'u lalan a ipebpawang sa dalepa a Iprat a bedtuan bun sa Bitlihim.”8 Na endaw i kinailay nu Yakub kanu manga wata nu Yusup na nia nin lun inidsa na “Entain i manga wata a nia?” 9 Na nia inisawal'u Yusup kanu ama nin na “Namba su manga wata ku a inenggay nu Kadenan sa laki sia sa dalepa a Egypt.” Daka nia pidtalu nu Yakub na “Paubay ka silan sa laki ka enggu ku silan 'gkapalihalan.” 10 Na kanu nia ba a timpu na di den gaid pakaalung su Yakub kagina matua den a benal sekanin. Daka iniubay den mambu nu Yusup sa lekanin su manga wata nin, na sinium enggu kinakep den mambu silan nu Yakub. 11 Na nia pidtalu nu Yakub kanu Yusup na “Mawatan sa ginawa ku i makapagilaya ta pamun ugaid'a pigkahanda nu Kadenan i taman kanu manga wata nengka na mailay ku pamun.”
12 Na iniawa nu Yusup su manga wata nin lu kanu kasakupuan nu ama nin a su Yakub a bedtuan bun sa Israil ka sinemugiud sekanin lu kanu kaadapan nu ama nin, 13 entu pan ka iniubay nin menem lu kanu ama nin su dua kataw a manga wata nin. Na nia nin pinadtampal sa biwang na si Ipraim enggu si Manasi menem i pinadtampal'in sa kawanan. 14 Ugaid'a pinadsulangkaya nu Israil su lima nin ka lu nin inidapenet su kawanan kanu ulu nu ali a si Ipraim enggu lu nin menem inidapenet su biwang kanu ulu nu kaka a si Manasi.
15-16 Daka pinalihalan nin su Yusup sa nia nin pidtalu na
“Palihalan nu Kadenan su manga wata a nia.
Palihalan silan nu Kadenan
a su Kadenan a tinapenayan nu manga lukes ku a si Ibrahim enggu si Iskak kanu uyag-uyag'ilan,
su Kadenan a pedtiakap sa laki sampay den sa saguna
enggu su malaikat a linemipuas sa laki.
Sia makanggulalan kanu manga wata a nia na di madadag su ngala ku
enggu su ngala nu manga lukes ku a si Ibrahim enggu si Iskak.
Na mapagkadakel silan sia sa liwawaw na dunia.”
17 Na guna kasipati nu Yusup i lu nakadapenet su kawanan a lima nu ama nin kanu ulu ni Ipraim na da mapia i ginawa nin. Tembu pinukas'in su lima nu ama nin lu kanu ulu ni Ipraim ka lu nin inialat kanu ulu ni Manasi 18 ka nia nin pidtalu kanu ama nin na “Dikena man nan su kaka, ama, ka nia su kaka. San nengka idapenet su kawanan a lima nengka kanu ulu nin.” 19 Ugaid'a da kiug su ama nin taman sa nia nin pidtalu na “Hu wata ku, katawan ku bun. 'Gkadakel bun man su tupu nin taman sa mabaluy bun sekanin a badtug a bangsa ugaid'a kalawanan sekanin nu ali nin sa kabadtug taman sa mabaluy a madakel a bangsa su manga tupu nin.” 20 Na kanu entu demun ba a gay na pinalihalan nin si Ipraim enggu si Manasi sa nia nin pidtalu na
“Sia kanu kapamalihala nu manga taw a Israil
na usalen nilan su ngala nu sa nia nilan edtalun na
‘Palihalan kanu nu Kadenan
a mana bun su kinapalihala kani Ipraim enggu kani Manasi.’ ”
Na maya ba i ukit a kinapagkaka nu Yakub kani Ipraim kumin kani Manasi.
21 Daka nia pidtalu nu Israil kanu Yusup na “Pakikineg ka. Mangagan aku den mauma na limu nu Kadenan ugaid'a tapiden kanu nu Kadenan enggu imbalingan kanu nin lu kanu kalupan nu kaapuan nu. 22 Na langun nu a edsusuled na seka bu i pebpusakan ku kanu takilidan nu palawa a nakua ku ebpun kanu manga taw a Amur sa ukit a kinambunua ku kanilan.”