47
1-2 Daka pinaunut'u Yusup su lima kataw kanu manga suled'in ka nangadap silan lu kanu Piraun sa nia nin lun pidtalu na “Nakauma den sa dalepa a Gusin su ama ku enggu su manga suled ku a ebpun sa kalupan a Kanaan. Pinananggit'ilan su manga ayam'ilan taman den kanu manga tamuk'ilan.” 3 Na nia inidsa nu Piraun kanu manga suled'u Yusup na “Ngin i manga galebekan nu?” Na nia nilan lun nakasawal na “'Bpamedtuganul sa ayam su manga ulipen nengka a mana bun su galebekan nu kaapuan nami. 4 Na minalat kami 'gkakaleben kanu nia a kalupan ka pegkapasang a benal su kapenggutem lu sa dalepa a Kanaan taman sa da den 'gkapanadtaban nu manga ayam'ami. Na 'bpangenin nami sa leka i suguti kami a manga ulipen nengka a lu makagkaleben kanu dalepa a Gusin.”5 Na guna su maitu na nia pidtalu nu Piraun kanu Yusup na “Saguna na naped'engka den su ama nengka enggu su manga suled'engka. 6 Na pagkalebeni ka kanilan su mapia sa langun a lupa a mana su dalepa a Gusin ka leka man su lusud'u Egypt. Na u entain i mailay nengka kanilan a aden kategelan nin sa katuganul sa ayam na sekanin i saligi ka kanu manga ayam ku.”
7 Na pinaadap den nu Yusup su ama nin a su Yakub lu kanu Piraun daka pinalihalana den ba a entu nu Yakub su Piraun. 8 Na inidsan sekanin nu Piraun sa “Nakapila lagun ka den?” 9 Nia inisawal'u Yakub na “Nakamagatus enggu telupulu lagun pamun i umul ku, dikena pamun gaid nauget i kabpaguyag-uyag ku sia sa liwawaw na dunia. Mapasang a benal su kapendadalaug ku ka dala makalepeng kanu kinandadalaug'u manga lukes ku kanu timpu a bibiag pan silan.” 10 Na ulian nu kinaganat'u Yakub na pinalihalan nin 'bpaluman su Piraun.
11 Na pinaginugutan den mambu nu Yusup su inisugu lun nu Piraun ka pinagkalebenan nin kanu ama nin enggu kanu manga suled'in su mapia sa langun a lupa a su dalepa a Gusinb a sakup bun nu kalupan nu Egypt. 12 Na inenggan nin sa kauyagan su ama nin enggu su manga suled'in taman sa tinukel'in bun menggay su sakambinabatan nu ama nin sa endaw i kadakel'u manga wata nilan.
Su Kinagkapasang'u Kinanggutem
13 Na 'bpangilut bun su kapasang'u kapenggutem ka da den kauyagan kanu embala-bala a dalepa tembu 'bpelunusan den su manga taw lu sa kalupan a Kanaan enggu sa dalepa a Egypt. 14 Na guna su maitu na langun nu kuleta a ibpamamasa nu manga taw sa dalepa a Egypt enggu sa kalupan a Kanaan na 'bpamelimuden nu Yusup ka 'bpananggiten nin lu kanu Piraun. 15 Na guna su naibped den su kuleta nu manga taw sa dalepa a Egypt enggu sa kalupan a Kanaan na linemu silan kanu Yusup sa nia nia nilan lun pidtalu na “Enggi kami nengka sa kauyagan, di kami nengka mapadtaday a matay ka langun na kuleta nami na naibped den.” 16 Na nia pidtalu nu Yusup na “Amaika naibpedan kanu den na manga kuleta na pamananggit'u sia su manga ayam'u ka entu den ba i ipamasa nu sa kauyagan.” 17 Na guna su maitu na pinamananggit den nu manga taw su manga ayam'ilan lu kanu Yusup. Daka inenggan nin den mambu silan sa kauyagan a sambi kanu manga kuda nilan, bili-bili, kambing, sapi enggu manga kimar'ilan. Na kanu dalem'u nakasalagun na inenggan nin bu silan sa kauyagan a sambi kanu pangangayamen nilan.
18 Na endaw i kinaipus'u entu a lagun, na minubay 'bpaluman sa lekanin su manga taw ka nia nilan pidtalu na “Hu mapulu, seka i nakataw sa da den nasama sa lekami a kuleta enggu manga ayam ka san den langun sa leka. Da den nasama a makaenggay nami sa leka nia tabia na su badan nami enggu su manga lupa nami. 19 Di kami nengka mapadtaday a matay na gutem ka da den makatuludu kanu manga lupa nami. Pamasa kami den apeg'u manga lupa nami a sambi kanu kauyagan. Na mapangungulipen kami den nu Piraun taman sa lekanin den su manga lupa nami. Na asal a di kami mamamatay na enggi kami sa gunu ka enggu kami 'gkauyag enggu su manga lupa nami na di makadtaday.”
20 Na sabap kanu kapegkapasang'u kapenggutem na nabpapasa nu manga taw su manga lupa nilan lu kanu Yusup. Kagina ka maitu na su Piraun den i kigkuan kanu manga kalupan sa dalepa a Egypt. 21 Na su langun nu taw kanu embala-bala nu dalepa a Egypt na inipapangungulipenc nu Yusup kanu Piraun. 22 Nia nin bu da mapamasa na su lupa nu 'gkangaunutan nu agama kagina aden 'gkatalima nilan a ebpun kanu Piraun a pakapamasa nilan sa kauyagan tembu da nilan mabpasa su manga lupa nilan. 23 Daka nia pidtalu nu Yusup kanu manga taw na “Pakikineg kanu! Pinamasa ku den sekanu enggu su manga lupa nu tembu su Piraun den i kigkuan sa lekanu. Na kua nu su manga uni a nia ka enggu nu 'gkapamulan su manga lupa nu. 24 Ugaid'a uman kanu makasabpet na inggay nu kanu Piraun su sabad kanu lima bad. Kua nu den su masama asal'a makapamula nu enggu makapaguyag'u taman den kanu langun nu sakambinabatan nu.” 25 Na nia nilan nakasawal na “Hu mapulu, inilipuas kami nengka sa kapatay. Mapapangungulipen kami den kanu Piraun kagina inikalimu kami nengka.” 26 Daka inumbal'u Yusup a kitaban i inggay kanu Piraun su sabad kanu lima bad kanu masabpet kanu kalupan sa dalepa a Egypt. Na sampay saguna na maya pamun ba su kitaban lu, nia tabia na su lupa nu 'gkangaunutan nu agama.
Su Kapapedsapa nu Yakub kanu Yusup
27 Kanu kapendadalepa nu manga taw a Israil lu kanu kalupan sa dalepa a Gusin a sakup'u dalepa a Egypt na namakapantiali silan lu ba sa manga tamuk enggu migkadakel a benal silan. 28 Na nakasapulu enggu pitu lagun pan i kinagkakaleben nu Yakub lu, tembu nakagaus pan su umul'in sa magatus enggu patpulu enggu pitu.
29 Na guna su 'gkauma den na limu nu Kadenan su Yakub na inipatawag'in su wata nin a su Yusup ka nia nin lun pidtalu na “Amaika saben-sabenal a ipegkalimu aku nengka na ililip'engka su lima nengka sia kanu didalem'u bubun ku enggu idsapa nengka i 'bpia-pianan aku nengka enggu edtalu ka sa benal. Di aku ibpelebeng sia sa dalepa a Egypt 30 ka lu aku nengka ilebeng kanu linebengan kanu manga lukes ku.” Nia nin mambu inisawal na “Tumanen ku su inidtutuma nengka a nan sa laki.” 31 Na daka nia pan pidtalu nu Yakub sa lekanin na “Idsapa nengka sa laki su entu.” Daka midsapa den mambu su Yusup entu pan ka dinemukum su Yakub ka nangeni-ngeni lu kanu 'bpagigand nin.