Su Manga Awal 46

Su Kinalu nu Yakub a Bedtuan bun sa Israil sa Dalepa a Egypt

Na guna su maitu na ginemanat su Yakub a it'in su manga tamuk'in. Nia nilan kinauma lu sa dalepa a Birsiba na migkurban sekanin kanu Kadenan a Kadenan nu ama nin a su Iskak. 2 Na aden inipayag sa lekanin nu Kadenan sa kutika na magabi sa nia nin pidtalu na “Yakub! Yakub!” Nia nakasawal'u Yakub na “Nia aku bun!” 3 Na nia lun pidtalu nu Kadenan na “Saki su Kadenan, su Kadenan nu ama nengka. Da ka 'gkagilek 'bpelu sa dalepa a Egypt ka pagkadakelen ku lu ba su manga tupu nengka taman sa mabaluy silan a mabagel a bangsa. 4 Na tapiden ku seka lu sa dalepa a Egypt enggu natatalanged a imbalingan ku seka kanu nia a kalupan. Na kanu kapatay nengka na kaped ka nu Yusup.”

5 Daka tinemalus den ba a entu lemalakaw su Yakub lu ebpun sa dalepa a Birsiba a pinapageda nu manga wata nin kanu kalu a inipapait'u Piraun. Na pinapageda nilan bun su manga wata nilan enggu su manga kaluma nilan. 6 Na pinamananggit'ilan su langun nu pangangayamen enggu su langun nu tamuk a nakua nilan sa dalepa a Kanaan kanu kinalu nilan sa dalepa a Egypt. 7 Pinaunut'u Yakub lu sa dalepa a Egypt su langun nu sakambinabatan nin, su manga wata nin enggu su manga apu nin apeg den nu manga mamanugang sa lekanin.

8 Na nia ba su manga ngala nu muliataw nu Yakub a bedtuan bun sa Israil a naped'in lemu sa dalepa a Egypt. Si Rubin na kaka sa langun kanu manga wata nu Yakub 9 a nia nin manga wata a mama na si Hanuk, si Palu, si Hisrun enggu si Karmi. 10 Na nia menem temundug na si Simiun a nia nin manga wata a mama si Himuil, si Hamin, si Uhad, si Yakin, si Suhar enggu si Saul a wata nin kanu babay sa dalepa a Kanaan. 11 Nia menem temundug na si Libi a nia nin manga wata a mama na si Girsun, si Kuat enggu si Mirari. 12 Nia menem temundug na si Yahuda a nin nin manga wata a mama na si Ir, si Unan, si Sila, si Paris enggu si Sira. Nia manga apu ni Yahuda kani Paris na si Hisrun enggu si Hamul. Ugaid'a si Ir enggu si Unan na lu minatay sa dalepa a Kanaan. 13 Na nia menem temundug na si Isakar a nia nin manga wata a mama na si Tula, si Puwa, si Yub enggu si Simrun. 14 Nia menem temundug na si Sibulun a nia nin manga wata a mama na si Sirid, si Ilun enggu si Halil. 15 Na silan ba a entu su nambata nu Yakub kani Lia lu sa dalepa a Padan-Aram apeg den nu wata nin a babay a si Dina. Nia kadakel'u namuliataw nu Yakub kani Lia na telupulu enggu telu langun.

16 Na nia menem temundug na si Gad a nia nin manga wata a mama na si Sipun, si Haggi, si Suni, si Isbun, si Iri, si Arudi enggu si Arili. 17 Nia menem temundug na si Asir a nia nin manga wata a mama na si Imna, si Isba, si Isbi, si Biria enggu su lusud'ilan sa tian a babay a si Sira. Nia menem manga apu ni Asir kani Biria na si Hibir enggu si Malkil. 18 Na si Gad enggu si Asir ba a entu su manga wata ni Silpa a panunugun a inenggay ni Laban kanu wata nin a si Lia. Sapulu enggu nem langun su namuliataw nu Yakub sa lekanin.

19 Na nia menem manga wata a mama nu Yakub kanu kaluma nin a si Rakil na su Yusup enggu si Buniamin. 20 Nia manga wata nu Yusup na si Manasi enggu si Ipraim enggu lu silan pimbata ni Asinat sa dalepa a Egypt. Si Asinat na wata nu Putipira a su 'gkaunutan nu agama lu sa Un. 21 Nia menem manga wata a mama ni Buniamin na si Bila, si Bikir, si Asbil, si Gira, si Naaman, si Ahi, si Rus, si Mupim, si Hupim enggu si Ard. 22 Na su namuliataw nu Yakub kani Rakil na sapulu enggu pat kataw silan langun.

23 Nia menem temundug na si Dan a nia nin wata a mama na si Husim. 24 Nia menem temundug na si Naptali a nia nin manga wata a mama na si Yasil, si Guni, si Yisir enggu si Silim. 25 Na silan ba a entu su manga muliataw nu Yakub kani Bilha a su panunugun a inenggay ni Laban kanu wata nin a si Rakil. Na pitu kataw langun su muliataw nu Yakub sa lekanin.

26-27 Na nia kadakel'u muliataw nu Yakub a nakaunut sa lekanin lemu sa dalepa a Egypt na nempulu enggu nem kataw langun. Na amaika iamung su Yusup enggu su dua kataw a wata a mama nin a lu pimbata sa Egypt na pitupulu kataw silan langun a nangalimud lu, liu pan su manga mamanugang kanu Yakub.

28 Na pinauna nu Yakub si Yahuda lu kanu Yusup ka enggu nin silan 'gkaalaw lu sa dalepa a Gusin. Na guna silan makauma 29 na inipapagadil'u Yusup su kalisa nin ka tinalabuk'in lu sa dalepa a Gusin su ama nin a su Yakub. Na endaw demun i kinailay nu Yusup kanu ama nin na nakakep'in enggu nauget a gay na 'bpaguguliang bu. 30 Na nia nadtalu nu Yakub kanu Yusup na “Saguna a nailay ku den sa matakapala i saben-sabenal a bibiag ka, na apia mauma aku den na limu nu Kadenan na adil aku den.”

31 Daka nia pidtalu nu Yusup kanu manga suled'in taman den kanu langun nu sakambinabatan nu ama nin na “Lemu aku kanu Piraun ka pakatawan ku sa lekanin i nakauma kanu den sia ebpun sa kalupan a Kanaan. 32 Na edtalun ku sa lekanin i patutuganul kanu sa manga ayam enggu langun nu manga ayam'u na pinananggit'u bun taman kanu manga tamuk'u. 33 Amaika idsan kanu nu Piraun u ngin i galebeken nu 34 na nia nu edtalu sa lekanin na ‘Iniganat pan sa wata su manga ulipen nengka na 'bpamedtuganul den sa ayam a mana bun su galebekan nu katupuan nami.’ Na kanu maya ba a ukit na sia kanu makagkaleben sa dalepa a Gusin kagina ipegkangingilu nu manga taw a Egypt su 'bpamedtuganul sa ayam.”