Su Kinapakilala nu Yusup
45
Na guna su di den 'gkagaga pegkumpen nu Yusup su ginawa nin lu kanu kaadapan nu manga panunugun nin na nia nin inilalis edtalu kanilan na “Pameliu kanu pan langun!” Daka nia bu nasama lu na su manga suled'u Yusup sa kanu kinapakilala nin kanilan. 2 Na nakauliang sekanin sa matanug a nakineg'u manga taw sa dalepa a Egypt enggu nakauma i entu lu kanu tulugan nu Piraun. 3 Na nia nadtalu nu Yusup kanu manga suled'in na “Saki si Yusup! Bibiag pamun su ama ku?” Ugaid'a di pakasumpat su manga suled'in a lu kanu kaadapan nin kagina minatay silan na gilek.4 Daka nia pidtalu nu Yusup kanilan na “Ubay kanu pan sia sa laki.” Guna den silan makaubay na nia nin pan pidtalu kanilan na “Saki si Yusup, su suled'u a pibpasa nu sia sa dalepa a Egypt. 5 Ugaid'a di nu 'bpelidua i ginawa nu enggu di nu pedsenditi su ginawa nu sa kinabpasa nu sa laki kagina su Kadenan man i napauna sia sa laki ka enggu makalipuas su madakel a taw. 6 Na namakadua lagun pamun i kapenggutem kanu nia a kalupan. Na aden pamun lima lagun a makatundug lun na da den ba a entu makapangangawid enggu da den makasabpet. 7 Tembu pinauna aku sia nu Kadenan ka enggu aden masama kanu manga tupu nu enggu makapalipuas kanu nin sa da idsan nin a ukit. 8 Saben-sabenal a dikena sekanu i napauna sa laki sia ka su Kadenan. Sekanin i migkahanda sa mabaluy aku a 'bpamapata kanu Piraun enggu 'gkasaligan kanu tulugan nin. Na binaluy aku nin bun a makakamal kanu dalepa a Egypt. 9 Na embalingan kanu mamagayas lu kani ama ka edtalu nu sa lekanin i ‘Ipapedtalu nu wata nengka a si Yusup i pigkahanda nu Kadenan i nabaluy sekanin a pegkamal kanu langun nu nasakupan nu dalepa a Egypt. Na saguna na pamagayas ka kun lemu sa dalepa a Egypt 10 enggu lu ka 'gkaleben kanu kalupan nu dalepa a Gusin taman kanu manga wata nengka enggu su manga apu nengka. Na it ka kun bun su pangangayamen nengka taman den kanu langun nu tamuk'engka. 11 Na tiakapan ka nin lu ba sa mapia ka enggu di kanu lunusan taman den kanu manga sakambinabatan nengka kagina aden pamun pakatingguma a lima lagun a kapenggutem.’
12 “Na naimamanan nu den saguna taman den kanu ali ku a si Buniamin i saben-sabenal a saki si Yusup. 13 Na panudtul'u kani ama su makapantag kanu kabpagadat sa laki sia sa Egypt enggu su langun nu nailay nu sia. Na pananggit'u sekanin sia mamagayas.” 14 Daka kinakep'in su ali nin enggu kinakep bun mambu sekanin ni Buniamin taman sa nakapagulianga silan. 15 Na pinadsakataw nin den ba a entu manium su manga suled'in a da bun pinda nu kabpaguliang'in. Na entu pan ba ka inimbibitiala nilan su Yusup.
16 Na guna makauma su katigan lu kanu tulugan nu Piraun sa nakauma su manga suled'u Yusup na napia gaid i ginawa nu Piraun taman den kanu 'gkangasaligan nin. 17 Na nia pidtalu nu Piraun kanu Yusup na “Edtalu ka kanu manga suled'engka i lulanan nilan sa kauyagan su manga ayam'ilan. Na embalingan silan lu sa dalapea a Kanaan 18 ka ipapananggit'engka sia kanilan su ama nu enggu su sakambinabatan nilan. Na inggay ku kanilan su mapia sa langun a kalupan sia sa dalepa a Egypt ka enggu nilan kandayan su kapianan nu nia a kalupan. 19 Edtalu ka bun kanilan i pananggitan nilan sa manga kalu ebpun sia sa dalepa a Egypt a kapagedan nu manga wata nilan enggu su manga kaluma nilan sa kalapit'ilan kanu ama nu. 20 Di nilan den pakinugunan su langun nu tamuk'ilan ka ibpagenggay ku bun kanilan su langun nu mangapia sia sa dalepa a Egypt.”
21 Na maitu den ba mambu i pinggula nu manga wata nu Yakub a bedtuan bun sa Israil. Inenggan silan nu Yusup sa manga kalu enggu pinambalutu nin bun silan sa makan kanu kabpelalakaw nilan a mana bun su inisugu nu Piraun. 22 Uman i sakataw kanu manga suled'in na pinangenggan nin sa bagu a mambalegkas'ilan ugaid'a si Buniamin na telu gatus timan a pilak enggu lima timan a mangabagu a balegkas i inenggay lun. 23 Na nia nin menem inipapait kanu ama nin na sawati a kimar a linulanan kanu manga mapia a langun-taman a ganat sa dalepa a Egypt enggu sawati a babay a kimar a linulanan sa manga bantad, manga kauyagan enggu ped pan a mambalutu nu ama nilan sa kabpelalakaw. 24 Daka pinaganat'in den mambu su manga suled'in enggu nia nin pinakalimu-limu kanilan na “Da kanu den pebpapalawa sia sa lalan.”
25 Na ginemanat den mambu su manga suled'in ebpun sa dalepa a Egypt. Na nia nilan kinauma sa kalupan a Kanaan lu kanu ama nilan 26 na nia nilan pidtalu sa lekanin na “Ama, bibiag si Yusup! Sekanin saguna i pegkamal kanu langun na nasakupan nu kalupan sa dalepa a Egypt.” Na nakeduan a benal i ginawa ni Yakub enggu di nin silan 'gkapaginugutan. 27 Ugaid'a guna nilan den mapanudtul sa lekanin su inidtutuma nu Yusup taman sa nailay nin su manga kalu a ibpelapit kanilan sa kabpelu sa dalepa a Egypt na naadenan na inam su ama nilan a su Yakub. 28 Nia nin nadtalu kanilan na “'Bpaginugut aku den sa bibiag su wata ku a si Yusup! Lemu aku ka enggu ku sekanin mailay gagalu na bibiag aku pan.”