Su Tagayan nu Yusup
44
Guna maipus su entu na nia inisugu nu Yusup kanu 'gkasaligan nin kanu walay nin na “Penu ka sa bantad su manga saku nilan sa endaw taman i magaga nilan mananggit enggu idiken nengka bun su kuleta nilan lu kanu manga saku nilan. 2 Idiken nengka su tagayan ku a pilak lu kanu saku nu ali sa langun apeg den nu kuleta a inibayad'in.” Daka pinggula nin den mambu su inisugu nu Yusup. 3 Nia nin kinagkapita na pinaganat den silan a inipadtapik bun kanilan su manga kimar'ilan. 4 Ugaid'a da pan gaid silan makawatan na sinugu den nu Yusup su 'gkasaligan nin sa “Tundug ka silan mamagayas ka u masaut'engka na edtalu ka sa kanilan i ‘Ngintu ka malat i inibalas'u kanu kapianan a pinggula nami sa lekanu? Ngintu ka tinegkaw nu su tagayan nu mapulu ku? 5 Katawan nu i namba su tagayan a 'bpangineman nu mapulu ku enggu 'bpagusalen nin sa kabpangingilayan nin! Na dikena a benal mapia su pinggula nu.’ ”6 Na guna nin silan masaut na maitu den ba mambu i pidtalu nin kanilan. 7 Ugaid'a nia nilan inisawal na “Hu mapulu, ngintu ka maitu i nadtalu nengka? Di makatika enggula su manga ulipen nengka sa maitu! 8 Na seka bun i nakataw lun sa apia su kuleta a nabungkal'ami kanu manga saku nami na iniuli nami bun sa leka ebpun sa kalupan na Kanaan. Na panun i katika nami manegkaw sa pilak atawa ka bulawan lu kanu walay nu mapulu nengka? 9 Na u entain sa lekami a manga ulipen nengka i katunan lun na imatayan enggu su ped menem na mapangungulipen nu, mapulu.” 10 Na nia pidtalu nu 'gkasaligan na “Ayun aku kanu pidtalu nu ugaid'a su katunan bu i ulipenen ku ka su ped na di makalalagit.”
11 Daka inipamaba nilan mamagayas su manga saku nilan ka inukan nilan. 12 Na linudsuan den mambu mangilay nu 'gkasaligan su entu, iniganat'in kanu kaka sa langun taman den kanu ali sa langun a si Buniamin. Na lu natun su tagayan kanu saku ni Buniamin. 13 Na guna su maitu na kinisi nilan su balegkas'ilan enggu inipamelulan nilan 'bpaluman su manga it'ilan lu kanu manga kimar ka mimbalingan silan lu kanu siudad.
14 Na lu pamun su Yusup kanu walay nin kanu kinambalingan ni Yahuda enggu su manga suled'in. Daka ginemebpa den silan semugiud lu kanu kaadapan nin. 15 Na nia pidtalu nu Yusup kanilan na “Ngin i pinggula nu a nia? Di nu katawan i su taw a maya ba sa laki na mataw mangingilayan?” 16 Na nia nakasawal'i Yahuda na “Ngin pan i madtalu nami sa leka mapulu? Da den makadalin nami sa kapaamad sa dikena kami 'gkabenalan. Su Kadenan i minayag kanu kabaladusan nami a manga ulipen nengka. Saguna na dikena bu su natunan kanu tagayan i maulipen nu gubilnadul ka apeg'ami.” 17 Ugaid'a nia pidtalu nu Yusup na “Di ku matika enggula i maitu! Su natunan bu kanu tagayan ku i dait a ulipenen ku. Embalingan kanu den a dala bun manga baya-baya nin lu kanu ama nu.”
18 Daka inubay sekanin ni Yahuda sa nia nin pidtalu na “Hu mapulu, ampun aku bu. U mapakay bu na suguti ka a makadtalu su ulipen nengka. Na kagina ka mana ka bun su Piraun na di ka bu semakit i ginawa nengka. 19 Hu mapulu, inidsan kami nengka u aden pamun ama atawa ka suled'ami. 20 Na pidtalu nami sa leka mapulu i matua den su ama nami enggu aden bun ali nami sa langun a mama a pimbata kanu timpu a matua den gaid su ama nami. Minatay den su tebped'in sa pused na sekanin bu i 'gkauyag a wata nu ina nin tembu pinadtaya sekanin nu ama nami. 21 Daka pidtalu nengka kanu manga ulipen nengka i pananggiten nami sekanin sia ka enggu nengka sekanin 'gkailay. 22 Na pidtalu nami sa leka mapulu i di mapakay a makapitas su wata kanu ama nin ka punan a ipatay nu ama nin. 23 Ugaid'a nia nengka pidtalu sa lekami a manga ulipen nengka na di kami mapailay sa leka taman a di nami madtapik su ali nami sa langun. 24 Na endaw i kinauli nami na pidtalu nami kanu ama nami a ulipen nengka su langun nu kadtalu nengka. 25 Na guna kami pedsugua 'bpaluman nu ama nami mapapamasa sa paidu a kauyagan sia 26 na pidtalu nami sa lekanin i di kami kapakayan a embalingan sia enggu di kami kapakayan a mapailay sa leka amaika di makaunut sa lekami su ali nami sa langun. 27 Na nia pidtalu nu ulipen nengka a su ama nami na ‘Katawan nu bun i dua kataw bu i nambata ku kanu kaluma ku a si Rakil. 28 Na nadala den sa laki su sakataw ka saben-sabenal a pidsalupet den sekanin nu talaw a binatang ka sampay den saguna na da ku den mailay sekanin.’ 29 Na amaika paunuten nami kun pan su sakataw taman sa aden manggula nin sia sa lalan na madtapik'in den kun sa kapatay su lidu na ginawa.
30-31 “Na amaika muli kami lu kanu ulipen nengka a su ama nami a di nami maped su ali nami sa langun na ipatay nin i entu sa lidu na ginawa kagina mana sumpat'a umul'in den su wata a nan. 32 Na liu san na nakapasalig ku kanu ama ku i dala manggula nu wata sa nia ku lun pidtalu na ‘Amaika di ku sekanin makambalingan sia kanu kaadapan nengka na saki den i edtempui ka taman sa taman.’ 33 Na saguna na 'bpangenin ku sa leka mapulu i saki den i pagkalidtabun ka a mapangungulipen a sambi kanu wata a nan. Suguti ka den a makaunut su wata kanu manga kaka nin. 34 Ka panun man i kambalingan ku lu kanu ama nami amaika di nami maped su wata? Na di ku lagen milay amaika aden manggula nu ama nami a dikena mapia.”