Su Kinambalingan nu manga Suled'u Yusup lu sa Dalepa a Egypt
43
Na pegkapasang bun a benal su kapenggutem lu sa dalepa a Kanaan. 2 Guna nilan den maibped su bantad a pinamasa nilan lu sa dalepa a Egypt na nia pidtalu nu ama nilan na “Embalingan kanu lu, ka pamasa kanu 'bpaluman sa apia paidu bu a makan tanu.” 3 Ugaid'a pinatademan ni Yahuda sa lekanin i “Inipakalimu-limu sa lekami nu mama i di kami mapailay sa lekanin u di nami madtapik su ali nami sa langun. 4 Na makalu kami bu amaika paunuten nengka sekanin ka enggu kami makapamasa sa makan nengka. 5 Ugaid'a amaika di ka miug na di kami lemu kagina inipakalimu-limu nu mama i di kami mapailay sa lekanin amaika di nami madtapik su ali nami sa langun.” 6 Nia nadtalu nu ama nin a su Yakub a bedtuan bun sa Israil na “Nginan ka papegkapasangan aku nu a benal ka pidtalu nu pan kanu mama i aden pamun ali nu?” 7 Nia nilan inisawal na “Pidtangga nin mangingidsa sa lekami su makapantag kanu sakambinabatan tanu. Inidsa nin u bibiag pamun i ama nami. Aden kun pamun ali nami? Na sinawal'ami bu su inipangingidsa nin sa lekami. Dala sinabut-sabut'ami sa ipadtapik'in besen sa lekami su ali nami?”8 Daka nia inipamagayuk'u Yahuda kanu ama nin na “Paunut ka sa laki su ali nami ka enggu kami makambalingan lu mamagayas ka enggu di tanu maibped mamamatay. 9 Nia ku makapasalig sa leka na su ginawa ku. Amaika di ku sekanin makambalingan sia kanu kaadapan nengka na idtempu nengka den sa laki taman sa taman. 10 Nia nin kabantang na u da kami bu man maangga na nakadua kami den basi nakambalingan lu.”
11 Guna su maitu na nia pidtalu nu ama nilan na “Amaika entu ba i kapia nin na maitu den ba. Nia nu enggula na pamananggit kanu sa langun na mapia a ebpun kanu nia a kalupan a mana su teneb, embalang-balang a manga mamut enggu su manga unga na kayu a pistasiu enggu almun ka entu ba i inggay nu kanu entu a mama. 12 Na takep'u su kuleta a 'bpananggiten nu ka iuli nu su kuleta a inibetad lu kanu manga saku nu ka di kalu-kalu a nalimban bu silan. 13 Na paunut'u den su ali nu ka embalingan kanu mamagayas lu kanu mama a entu. 14 Pangeni-ngenin tanu kanu Kadenan a Mapulu a Barakat sa Langun i latan kanu nu mama a entu sa nanam ka enggu nin makapaunut muli sa lekanu su natabun a suled'u enggu si Buniamin. Nia den sia sa laki na amaika bagi ku den i kadalan na manga wata na pila ginawa.”
15 Daka pinananggit'ilan den mambu su manga ibpagenggay nilan enggu tinakep'ilan su kuleta a it'ilan taman sa pinaunut'ilan bun si Buniamin ka namagayas den silan lemu sa dalepa a Egypt ka pinangadap'ilan su Yusup. 16 Na guna mailay nu Yusup i kaped'ilan si Buniamin na sinekat'in su 'gkasaligan kanu walay nin sa “Paunut ka silan lu sa walay enggu sumbali ka sa ayam. Na pagadil kanu ka nia ku kiug na maped ku silan keman amay maudtu.” 17 Na pinaginugutan den mambu nu 'gkasaligan su manga inisugu sa lekanin ka pinaunut'in silan lu kanu walay nu Yusup.
18 Na guna den silan mapananggit lu kanu walay nu Yusup na sangat den a nagilek silan ka nia nilan napagitung na “Pinananggit tanu guna sia sabap kanu manga kuleta a inibetad lu kanu manga saku tanu kanu nauna a kinasia tanu ka enggu tanu nin kadtetebuan taman sa ipasigkem tanu nin. Na entu pan ka pangungulipen tanu nin taman sa panguan nin su manga kimar tanu.”
19 Guna su maitu na inubay nilan su 'gkasaligan nu Yusup ka inimbitiala nilan lu kanu bengawan nu walay. 20 Nia nilan lun pidtalu na “Ampun ka bu mapulu! Kanu nauna a kinasia nami a namasa kami sa kauyagan 21 na guna nami ukai su manga saku nami kanu kinapangintelenen nami na nailay nami a lu kanu ludep'u manga saku nami su manga kuleta a inibayad'ami. Na pidtapik'ami i entu saguna ka ibpaguli nami 22 enggu nananggit kami bun sa ped a kuleta a ibpamasa nami sa kauyagan. Na di nami a benal katawan u entain i minetad kanu manga kuleta lu kanu manga saku nami.” 23 Na nia pidtalu nu 'gkasaligan nu Yusup sa kanilan na “Patana kanu den! Da kanu 'gkagilek ka natalima ku bun su inibayad'u ugaid'a su Kadenan nu a Kadenan bun nu ama nu i dinemiken lun i entu lu kanu manga saku nu.” Daka iniadap'in den ba a entu si Simiun lu sa kanilan.
24 Na pinaludep silan nu 'gkasaligan lu kanu walay nu Yusup enggu inenggan nin silan sa ig a makapangagas'ilan sa aya taman sa inenggan nin bun sa makan su manga kimar'ilan. 25 Na kagina ka nakineg'ilan i kiugan silan nu Yusup maped keman sa maudtu na iniadil'ilan su manga ibpagenggay nilan lun.
26 Na guna den makauli su Yusup na inenggay nilan lun su pinamananggit'ilan a ibpagenggay sa lekanin enggu sinemugiud silan kanu kaadapan nin. 27 Na pinangingidsan silan nu Yusup u ngin i 'gkambebetad'ilan sa nia nin pidtalu na “Ngin i betad'u matua a pidtalu nu sa laki a ama nu? Bibiag pamun sekanin?” 28 Nia nilan inisawal na “Da bun baya-baya nu ama nami a ulipen nengka. Bibiag pamun sekanin.” Na sinemugiud silan kanu kaadapan nu Yusup.
29 Na pidtulikan nin si Buniamin a tebped'in sa pused sa ama enggu ina ka nia nin inidsan na “Nia ba su ali nu sa langun a pidtalu nu sa laki? Hu datu, palihalan ka nu Kadenan.” 30 Na namagayas sekanin lemiu ka sangat a ginagawan sekanin kanu ali nin, daka linemu sekanin kanu bilik'in ka lu ba minuliang.
31 Na daka nanagup sekanin ka pimbalinganan nin su manga suled'in a pegkumpenen nin bu i ginawa nin. Na nia nin pidtalu kanu 'gkasaligan nin na “Talagadi nu silan sa makan.” 32 Na inisenggay nilan magatul su Yusup kanu manga suled'in. Na sinemenggay bun mambu su manga taw a Egypt sabap sa di 'gkapakayan a makapagatuang su manga taw a Hibru kanu manga taw a Egypt kagina dikena mapiab kanu manga taw a Egypt su entu. 33 Na lu pinamapagagayan su manga suled'u Yusup kanu kasangulan nin a mapia a benal i kinadtundug-tundug'ilan iganat sa kaka taman sa kanu ali. Na namakadtutulikai silan sa kinagaip'ilan sa entu. 34 Na tinalagadan silan makan a lu pakabpun kanu lamisan nu Yusup. Ugaid'a nakalima natakep i kadakel'u kani Buniamin kumin kanu manga suled'in. Na namagatuang den silan enggu namanginem a 'gkangagalaw a benal.