Su Nauna a Kinaangay nu manga Suled'u Yusup sa Dalepa a Egypt
42
Na guna katawi nu Yakub i aden kauyagan lu sa dalepa a Egypt na sinugu nin su manga wata nin a mama sa nia nin pidtalu na “Nginan ka pedtatalipenda kanu san? 2 Nakineg ku i aden kun kauyagan lu sa dalepa a Egypt. Na angay kanu lu ka pamasa kanu sa makan tanu ka enggu di tanu matay na gutem.” 3 Daka linemakaw den mambu su sapulu kataw a manga suled'u Yusup ka 'bpamasa silan sa makan lu sa dalepa a Egypt. 4 Ugaid'a da paunuta nu Yakub kanu manga kaka a wata nin su suled'u Yusup sa ina a si Buniamin sabap sa 'gkagilekan sekanin sa aden mawag a manggula nin. 5 Na ginemanat su manga wata nu Yakub a kaped'u ped a 'bpamasa sa makan lu sa dalepa a Egypt kagina nakagaus den sa kalupan na Kanaan su kapenggutem.6 Na kagina ka su Yusup i gubilnadul kanu lusud'u dalepa a Egypt taman sa sekanin bun i pegkakataw kanu kapebpasa sa kauyagan, na lu sinemupeg sa lekanin su manga suled'in ka sinemugiud silan kanu kaadapan nin. 7 Na endaw demun i kinailay nu Yusup kanu manga suled'in na nakilala nin ugaid'a da sekanin pakilala taman sa mapasang i kinapangingidsa nin kanilan sa nia nin pidtalu na “Endaw kanu a nan nakabpun?” Nia nilan nakasawal na “Ebpun kami sa kalupan na Kanaan. Sinemia kami ka 'bpamasa kami sa kauyagan.”
8 Na di a benal sekanin 'gkakilala nu manga suled'in ugaid'a 'gkakilala silan nu Yusup. 9 Daka natademan nu Yusup su manga taginepen nin makapantag sa kanilan, na nia nin pidtalu sa kanilan na “'Bpamanininting kanu! Sinemia kanu, ka asal bu a mapanininting'u su kalubayan nu dalepa a nia.”
10 Na nia nilan nakasawal na “Hu mapulu, sinemia su manga ulipen nengka ka 'bpamasa bu sa kauyagan. 11 Edsusuled kami sa ama enggu mangatidtu kami a taw, saben-sabenal a dikena kami 'bpamanininting.” 12 Ugaid'a nia nin pidtalu kanilan na “Dikena, ka saben-sabenal a sinemia kanu, ka asal bu a mapanininting'u su kalubayan nu dalepa nami!”
13 Na nia nilan inisawal na “Sekami a manga ulipen nengka na sapulu enggu dua a edsusuled enggu lu saguna su ama nami sa dalepa a Kanaan a kaped'in su ali nami sa langun. Su sakataw menem a ali nami na minatay den.” 14 Ugaid'a ipedtegel bun a benal'u Yusup i 'bpamanininting silan sa nia pidtalu kanilan na 15 “Maya ba i ukit a kaamad ku u benal su kadtalu nu. Ipedsapa ku sia makanggulalan kanu bagel'u Piraun i di kanu makaawa sia taman sa di makasia su ali nu sa langun. 16 Pauli nu i sakataw sa lekanu ka enggu nin 'gkalapit su ali nu. Bilanggun menem su masama sia ka enggu maamad u benal su pidtalu nu. U pembudtud kanu menem na idsapa ku sia makanggulalan kanu bagel'u Piraun i saben-sabenal a 'bpamanininting kanu.”
17 Na binilanggu nin silan sa nakatelu gay. 18 Nia nin kinatelu gay na nia pidtalu nu Yusup sa kanilan na “Kagina ka aden gilek ku sa Kadenan na enggula nu i nia ka enggu di kanu kaimatayan. 19 'Gkalidtabun i sakataw sia sa bilangguan enggu muli su ped ka pananggitan nilan sa makan su penggutemen a sakambinabatan nilan. Na u mangatidtu kanu a mama na 20 edtapik'u sia su ali nu sa langun ka enggu ku maamad i pedtalu kanu sa benal asal'a di kanu matay.”
Na minayun mambu silan sa entu. 21 Nia nadtalu nu uman i isa na “Saben-sabenal a tiuba i nia sabap kanu pinakaidan tanu kanu suled tanu. Apia nailay tanu bun su kapegkalasay nu 'gkanggiginawa nin kanu kapebpalat-lat'in sa nanam sa lekitanu na da tanu bun sekanin pakikinega tembu saguna na sekitanu menem i 'gkalasay.” 22 Nia inisumpat'i Rubin sa kanilan na “Kena ba pidtalu ku sa lekanu i di nu papegkasakiti su wata? Ugaid'a da kanu pakikineg. Na saguna na nasabpet tanu den ba su kinaimatay tanu lun.” 23 Na di nilan katawan i 'gkasabutan besen silan nu Yusup kagina kinemua pan sekanin sa taw a papenggumaena kanu langun nu manga bitiala nilan. 24 Daka tinagak silan nu Yusup ka minuliang ugaid'a pimbalinganan nin bun silan ka inimbitiala nin. Na inipakua nin si Simiun ka pinaiketan nin a lu demun kanu kasangulan nilan.
25 Na inisugu nu Yusup i dikenan sa bantad su manga saku nilan enggu idiken bun lu ba su manga kuleta nilan taman sa pinambalutu nin pan silan sa makan sia sa lalan. Daka pinggula den mambu nu manga panunugun su entu. 26 Na inipamelulan den mambu nu edsusuled su bantad lu kanu manga kimar'ilan ka ginemanat silan.
27 Ugaid'a guna 'bpagukai nu sakataw kanilan su saku nin ka papegkanen nin su kimar'in lu kanu pinangintelenan nilan na nailay nin su kuleta nin lu kanu ludep'u saku. 28 Na nia nin pidtalu kanu manga suled'in na “Nakambalingan su kuleta ku! Ilay nu ka nia bun kanu saku ku!” Na nakakedu i ginawa nilan enggu nangagilekan a benal silan sa nia nilan nadtalu na “Ngin guna i ipapedtala nu Kadenan a nia sa lekitanu?”
29 Na guna den silan makauma lu kanu kalupan nu dalepa a Kanaan na pinanudtul'ilan den kanu ama nilan a su Yakub su langun nu nanggula nilan. 30 Nia nilan pidtalu na “Mapasang a benal i kinambitiala sa lekami nu mama a gubilnadul kanu entu a kalupan ka sinenditan kami nin sa 'bpamanininting kanu dalepa nilan. 31 Ugaid'a pidtalu nami sa lekanin i mangatidtu kami a manga taw enggu dikena kami 'bpamanininting. 32 Pidtalu nami bun sa lekanin i sapulu enggu dua kami a edsusuled a isa bu sa ama. Ugaid'a minatay den i sakataw sa lekami enggu su ali menem sa langun na kaped saguna nu ama nami lu kanu kalupan nu dalepa a Kanaan. 33 Daka pidtalu sa lekami nu mama a gubilnadul kanu dalepa a Egypt i amaden nin kun u benal ba a mangatidtu kami a manga taw. Pinagkalidtabun nin i sakataw sa lekami enggu pinauli kami nin a pinadtapik sa makan nu penggutemen a sakambinabatan tanu. 34 Ugaid'a inipakalimu-limu nin i edtapiken nami su ali nami sa langun ka enggu nin 'gkaamad i mangatidtu kami a manga taw enggu dikena 'bpamanininting. Na imbalingan nin kun su suled'ami taman sa di den ba a entu mapinda i kapamasa tanu lu sa kauyagan.”
35 Na guna nilan den ipembubus su dalem'u manga saku nilan na nailay nilan su manga kuleta nilan a lu bun kanu ludep'u manga saku nilan. Daka nangagilekan a benal silan apeg'u ama nilan. 36 Na nia pidtalu nu Yakub kanilan na “Mana su pegkiugan nu a benal a madala sa laki su manga wata ku. Na da den su Yusup maitu bun si Simiun. Saguna menem na kiugan nu edtapik si Buniamin. Na langun na namba na mapasang a benal sa laki.”
37 Daka nia pidtalu ni Rubin kanu ama nin na “Amaika di ku sekanin makambalingan sa leka na nia ka imatayi na su dua kataw a manga wata ku a mama. Isalig'engka sa laki si Buniamin ka imbalingan ku man sekanin sa leka.” 38 Ugaid'a nia inisumpat'u Yakub na “Di ku paunuten sa leka su wata ku! Minatay den su kaka nin na sekanin bun den i nasama. Matua aku den na amaika aden manggula nin sia sa lalan na madtapik ku den matay su lidu na ginawa ku.”