Su Taginepen nu Piraun
41
Kanu kinaipus'u dua lagun na su Piraun menem i midtaginep. Nia nin taginepen na pedtindeg kun sekanin lu kanu adteban nu pulangi sa Nilu. 2 Na nakatekaw kun demun temepad kanu pulangi su pitu timan a mangapia enggu mangasebud a sapi ka nanadtab lu kanu adteban. 3 Daka nakatundug menem temepad kanu pulangi su pitu timan a mawag enggu mangagasa a sapi ka sinemimbul silan lu kanu mangasebud a sapi a lu kanu adteban. 4 Na kinan nu manga mawag enggu mangagasa a sapi su mapia enggu mangasebud a sapi. Daka nakagedam su Piraun. 5 Ugaid'a nakatulug 'bpaluman su Piraun enggu midtaginep menem sekanin sa aden kun pitu timan a tiugkayan na bantad a mapia enggu namamesul. Na minetu su entu sa satiman bu i lawas'in. 6 Aden kun bun minetu kanu entu bun ba a lawas'u bantad a pitu timan a tiugkayan a kipes a nalanes'a mayaw a sambel a ebpun sa sebangan. 7 Na linamed'u kipes a manga tiugkayan su manga namamesul a tiugkayan. Daka nakagedam menem su Piraun taman sa naimamanan nin i pedtaginep besen sekanin.8 Guna pegkapita na pakasimuket kanu manggiginawa nu Piraun su entu a taginepen nin. Daka inipatawag'in su langun nu manga mategel sa kagaipan enggu su manga alim sa dalepa a Egypt ka pinanudtul'in kanilan su taginepen nin. Ugaid'a dala isa bu kanilan i nakatargium lun. 9 Daka pidtalu nu 'gkaunutan nu 'bpanalagad kanu 'bpanginginemen lu kanu Piraun i “'Gkagkalendem ku su kinasungkang ku. 10 Na kanu kinalipunget'u Piraun sa lekami kanu 'gkaunutan nu 'bpangumbal sa pan na inipabilanggu kami nu Piraun lu kanu walay nu 'gkaunutan nu pedtameng kanu tulugan. 11 Na aden isa a magabi a nakandaledsang kami edtaginep ugaid'a embidaya su targiuman kanu taginepen nami. 12 Na aden kaped'ami lu a manguda a taw a Hibru a panunugun nu 'gkaunutan nu pedtameng kanu tulugan. Pinanudtul'ami lun su pidtaginep'ami na tinargium'in mambu sa lekami su maena nu entu. 13 Na nasugat'in temargium su taginepen nami ka nanggula su langun na pidtalu nin, saki na nakambalingan aku kanu galebekan ku enggu inipabitin menem su 'bpangumbal sa pan.”
14 Daka inipatawag'u Piraun su Yusup. Na pinaliu nilan mambu sekanin mamagayas lu kanu bilangguan. Na guna sekanin makapamulungus enggu makapadsambi sa balegkas na iniadap'ilan sekanin kanu Piraun. 15 Na nia pidtalu nu Piraun kanu Yusup na “Midtaginep aku ugaid'a apia sakataw na dala pakagaga lun pedtargium. Na nakineg ku i amaika makineg'engka kun su taginepen na katawan nengka temargium.” 16 Nia inisawal'u Yusup kanu Piraun na “Dikena saki i makagaga lun temargium ugaid'a su Kadenan bu i makagaga lun menggay sa maena kanu Piraun.”
17 Daka nia menem pidtalu nu Piraun kanu Yusup na “Sia kanu taginepen ku na pedtindeg aku kun lu kanu adteban nu pulangi sa Nilu. 18 Na tinemepad kanu pulangi su pitu timan a mangapia enggu mangasebud a sapi ka nanadtab lu kanu adteban. 19 Nia menem nakatundug temepad na su pitu timan a mawag enggu mangagasa a sapi. Na da pamun nailay ku a maitu ba i kangawag'a palas'in a sapi sia kanu sakup'u dalepa a Egypt. 20 Na kinan nu mangagasa a sapi su pitu timan a mangasebud a sapi. 21 Ugaid'a guna nilan den makan su mangasebud a sapi na mana da bun silan makakan ka maitu bun ba i palas'ilan. Daka nakagedam aku. 22 Na nakatulug aku menem 'bpaluman enggu midtaginep aku menem sa nailay ku i aden kun pitu timan a tiugkayan na bantad a mapia enggu namamesul i minetu sia kanu satiman bu a lawas'u bantad. 23 Na minetu bun kanu entu bun ba a lawas'u bantad su pitu timan a tiugkayan a kipes a nalanes'a mayaw a sambel a ebpun sa sebangan. 24 Na linamed'u manga kipes a tiugkayan su namamesul a tiugkayan. Na pinanudtul ku i nia kanu manga patatargium ugaid'a apia sakataw na dala demun nakatargium lun kanilan.”
25 Na daka nia mambu pidtalu nu Yusup kanu Piraun na “Su taginepen nengka na isa bu i maena nin. Inipayag sa leka nu Kadenan su pegkahandan nin. 26 Satiman bu i maena nu manga taginepen nengka ka su pitu timan a mangasebud a sapi enggu su pitu timan a tiugkayan a namamesul na nia nin maena na su pitu lagun a mangapia a kasabpet. 27 Na su pitu timan menem a mawag enggu mangagasa a sapi enggu su pitu timan a tiugkayan a kipes a nalanes'a mayaw a sambel a ebpun sa sebangan na nia nin maena na su pitu lagun a kanggutem. 28 Na mana bun su pidtalu ku sa leka, na inipailay sa leka nu Kadenan su pegkahandan nin. 29 Na aden makauma a pitu lagun a sangat i kapia na kasabpet sia sa dalepa a Egypt. 30 Ugaid'a nia menem makasukeli sa entu na su pitu lagun a kanggutem. Na su kanggutem a entu na makalapat kanu kalupan taman sa kalipatanan den nu manga taw su mapia a kinasabpet sa lusud'u dalepa a Egypt. 31 Sabap kanu kapasang'u makasukeli a kanggutem na su timpu nu mapia a kinasabpet kanu inged na da den 'bpagilayan lun. 32 Na su nakadua a kinadtaginep'u Piraun na nia nin maena na tinantu den nu Kadenan su kahanda nin taman sa mangagan den i nia mauma.
33 “Na dait a mamili su Piraun sa taw a balaitungan enggu aden sabut'in ka sekanin i patuganulen nin kanu lusud'u dalepa a Egypt. 34 Dait bun a mamili su Piraun sa makakamal kanu manga kalupan. Na silan i temimu kanu sabad kanu ikalima bad a 'gkasabpet kanu dalem'u pitu lagun a mapia a kapedsabpet sia kanu lusud'u dalepa a Egypt. 35 Na sia makanggulalan kanu bagel'u Piraun na ipalimud kanilan su langun nu mangasabpet kanu mangauma a nia a mapia a ilalagun enggu ipatagu kanilan su langun nu manga gunu ka enggu aden kauyagan lu kanu manga siudad. 36 Na su entu a manga kauyagan na ibpagadil kanu mauma a pitu lagun a kanggutem a makatingguma kanu lusud'u dalepa a Egypt ka enggu di matay na lunus su manga taw.”
37 Na nalinian nu Piraun enggu su 'gkangasaligan nin su antangan a entu nu Yusup. 38 Na nia pidtalu nu Piraun kanu 'gkangasaligan nin na “Aden pan ba matun tanu a pagidsan nu mama a nia a pedtapiden nu Ruh nu Kadenan?” 39 Daka nia mambu pidtalu nu Piraun kanu Yusup na “Kagina ka san sa leka inipayag'u Kadenan su langun nu nia na da den ped a pagidsan nengka sa kabalaitungan enggu kasabut. 40 Na seka den i kemamal kanu pendatuan ku enggu paginugutan nu langun nu manga taw ku su manga isugu nengka kanilan. Ugaid'a mapulu aku bun sa leka sabap kanu kulesi ku.”
41 Na pidtalu pamun nu Piraun kanu Yusup i “Saguna na papegkamalan ku sa leka su langun nu nasakupan nu dalepa a Egypt.” 42 Daka pinukas'u Piraun kanu lima nin su sising'in a inukilan sa kasultan ka inipadsising'in kanu Yusup enggu pinambalegkas'in sa mapia a ginis taman sa pinambalig'in sa bulawan. 43 Na pinapageda nin su Yusup kanu ikadua a kalisaa nin. Na nia ibpamelalis'u manga taw kanu lalan na “Kalagi nu!” Na maitu ba i kinapakamal kanu Yusup kanu dalepa a Egypt.
44 Na liu pan sa entu na pidtalu pamun nu Piraun kanu Yusup i “Saki su Piraun ugaid'a dala isa bu a makanggalebek sia sa lusud'u dalepa a Egypt nia tabia na kiug'engka.” 45 Na binedtuan nu Piraun su Yusup sa ngala a Sapinat-Paniab enggu inipapangaluma nin lun si Asinat a wata nu Putipira a 'gkaunutan nu agama lu sa dalepa a Un.c Guna su maitu na linibet'u Yusup su embala-bala kanu dalepa a Egypt.
Su Kapegkamal'u Yusup kanu Dalepa a Egypt
46 Na telupulu lagun i umul'u Yusup kanu kinapaludsu sa lekanin mapakamal'u Piraun. Na linemiu sekanin kanu tulugan nu Piraun ka linibet'in su langun nu sakup'u dalepa a Egypt. 47 Na kanu dalem'u pitu lagun na tinemidtu a benal su kinasabpet kanu dalepa a Egypt. 48 Na langun nu 'gkangasabpet kanu dalem'u mangapia a lagun lu sa dalepa a Egypt na pinamelimud'u Yusup enggu initagu nin lu kanu manga siudad. Uman i sakasiudad na tinaguan nin kanu manga pegken a lu bun nasabpet kanu embala-bala nu uman i siudad. 49 Na madakel a benal i nalimud'in ka inidtambaka den taman sa tinelenan nin den mapapangasad kagina di den 'gkagaga.
50 Na kanu da pan mauma su timpu nu kapenggutem na aden den dua kataw a wata a mama nu Yusup kani Asinat a wata a babay nu Putipira a 'gkaunutan nu agama lu sa dalepa a Un. 51 Nia inibedtu nu Yusup kanu kaka a wata nin na Manasid ka nia nin pidtalu na “Pinalipatanan sa laki nu Kadenan su langun nu manga kamalasayan ku, maitu bun su sakambinabatan nu ama ku.” 52 Nia nin menem inibedtu kanu ali a wata nin na Ipraime ka nia nin pidtalu na “Su Kadenan i minenggay sa laki sa muliataw sia kanu dalepa a nalasayan ku.”
53 Guna den mauma su tedtab'u mapia a kapedsabpet kanu dalepa a Egypt 54 na nia menem nakasukeli na su timpu nu kapenggutem a mana bun su targiuman nu Yusup. Na langun nu bangsa na penggutem den ugaid'a lu kanu dalepa a Egypt na aden kauyagan nin. 55 Na guna den penggutema su manga taw sa lusud'u dalepa a Egypt na mimbuku silan kanu Piraun. Daka nia pidtalu nu Piraun kanu manga taw sa Egypt na “Lu kanu angay kani Yusup enggu paginuguti nu u ngin i edtalun nin sa lekanu.” 56 Guna den makapayapat su kapenggutem kanu entu a dalepa na pinaukan nu Yusup su manga kamalig enggu pibpasan nin sa makan su manga taw a Egypt kagina pegkapasang bun su kapenggutem lu sa dalepa a Egypt. 57 Daka su manga taw kanu embala-bala a dalepa na 'bpagangay lu sa dalepa a Egypt ka 'bpamasa sa makan lu kanu Yusup kagina 'bpangilut bun a benal su kapasang'u kapenggutem sa lusud'u dunia.