Su Kinatargium kanu manga Taginepen
40
1-2 Na guna maipus su entu a nanggula na nakasungkang su 'gkaunutan nu 'bpanalagad sa panginginemen enggu su 'gkaunutan nu 'bpangumbal sa pan kanu mapulu nilan a su sultan nu dalepa a Egypt a su Piraun. Na nasakit a benal i ginawa nu Piraun kanu dua kataw a entu a 'gkangaunutan. 3 Daka inipabilanggu nin silan lu kanu walay nu mapulu nu manga pedtameng kanu tulugan nu Piraun a lu bun ba binilanggu su Yusup. 4 Na kanu Yusup inisalig'u mapulu nu manga pedtameng kanu tulugan su dua kataw a entu. Na nauget i kinadtatagapeda nilan lu kanu bilangguan.5 Aden isa a magabi na midtaginep lu kanu bilangguan su 'bpanalagad sa panginginemen enggu su 'bpangumbal sa pan kanu sultan nu dalepa a Egypt. Ugaid'a embidaya su maena nu taginepen nilan. 6 Na guna den 'gkapita na nadsuliman nu Yusup a 'gkangalidu i ginawa nilan. 7 Daka inidsan silan nu Yusup sa “Nginan ka mangalimeng kanu saguna?” 8 Na nia nilan inisawal na “Midtaginep kami ugaid'a apia sakataw na dala mataw lun temargium.” Na nia pidtalu nu Yusup kanilan na “Su Kadenan bu i mataw temargium. Edtalu nu sa laki u ngin i pidtaginep'u.”
9 Daka pidtalu den mambu sa lekanin nu 'gkaunutan nu 'bpanalagad sa panginginemen su taginepen nin sa nin pidtalu na “Sia kanu taginepen ku na aden kun waged'a ubas sia kanu adapan ku 10 a telu timan i sapak'in. Na endaw i kinanggulaun nin na ginememaw bun su ulak'in taman sa nangagan migkalutu su unga nu waged'a ubas. 11 Saleta mambu na pegkapetan ku su tagayan nu Piraun enggu kinua ku su unga nu waged'a ubas ka kinemes ku lu kanu tagayan nu Piraun ka inenggay ku lun.” 12 Daka nia pidtalu nu Yusup sa lekanin na “Nia maena nu telu timan a sapak a entu na telu gay. 13 Ka telu gay iganat saguna na paliun ka nu Piraun enggu pambalinganen ka nin kanu galebekan nengka. Kapanalagadan nengka sekanin 'bpaluman sa mainem'in a mana bun su galebekan nengka lun paganay. 14 Ugaid'a tademi aku bu amaika makambalingan ka den taman sa mapia den i kambebetad'engka. Pangenin ku sa leka i labit aku bu kanu Piraun asal'a makaliu aku kanu bilangguan a nia. 15 Kagina initangag aku bu man ebpun kanu kalupan nu manga taw a Hibru enggu da man pinggula ku sia a mawag a dait a ikabilanggu ku.”
16 Na guna makineg'u mapulu nu 'bpangumbal sa pan i mapia i targiuman kanu taginepen nu ped'in na nia nin mambu pidtalu kanu Yusup na “Midtaginep aku bun mambu. Aden kun 'bpangutun ku a telu kabaskit a maputi a pan. 17 Na su pan a lu kanu untul a baskit na embalang-balang a pan a pegken nu Piraun. Ugaid'a kinan nu manga papanuk su manga pan ba a entu a 'bpangutun ku.” 18 Na nia inisawal'u Yusup sa lekanin na “Nia maena nu telu timan a baskit na telu gay. 19 Ka telu gay iganat saguna na paliun ka nu Piraun ka paputukan ka nin sa ulu enggu bitinen ka nin lu sa kayu ka enggu makan na manga papanuk su bangkay nengka.”
20 Na guna mauna su telu gay na entu bun ba su gay a kinambata kanu Piraun. Daka migkanduli sekanin kaped'in su langun nu 'gkangasaligan nin. Na pinaliu nin su 'gkaunutan nu 'bpanalagad sa lekanin sa panginginemen enggu su 'gkaunutan nu 'bpangumbal lun sa pan ka pinaadap'in kanu 'gkangasaligan nin. 21 Na inimbalingan nu Piraun kanu galebekan nin su 'gkaunutan nu 'bpanalagad lun sa panginginemen ka enggu nin sekanin kapanalagadan 'bpaluman. 22 Ugaid'a inipabitin nin menem su 'gkaunutan nu 'bpangumbal lun sa pan a mana bun su targiuman nu Yusup kanilan. 23 Saleta mambu na nalipatanan lemabit'u 'gkaunutan nu 'bpanalagad sa panginginemen su Yusup lu kanu Piraun.