Su Kinabilanggu kanu Yusup lu sa Dalepa a Egypt
39
Guna den mapananggit su Yusup lu sa dalepa a Egypt na pibpasa sekanin nu manga tupu nu Ismail lu kanu Putipar a 'gkasaligan nu Pirauna enggu 'gkaunutan nu manga tameng kanu tulugan.b 2 Na lu migkakaleben su Yusup kanu walay nu mapulu nin a taw a Egypt. Na tinapid sekanin nu Kadenan a Mapulu taman sa mimbantas sekanin. 3 Na nailay nu mapulu nin a su Putipar i pedtapiden nu Kadenan a Mapulu su Yusup ka papembantasen nin su langun nu penggalebeken nin. 4 Daka nasuatan nin su Yusup tembu binaluy nin a 'gkasaligan. Sekanin i pinatiakap'in kanu walay nin enggu su langun nu kaaden nin. 5 Na iganat kanu kinasalig'u Putipar kanu Yusup kanu walay nin enggu su langun nu kaaden nin na pinambalilidseki nu Kadenan a Mapulu su walay nu Putipar. Maitu bun su langun nu kaaden nin magidsan i lu sa walay enggu lu sa 'bpangangawidan. 6 Na inisalig'u Putipar kanu Yusup su langun nu kaaden nin taman sa apia ngin na di den 'bpangutiapan nu Putipar nia tabia a 'bpangutiapan nin bu na su pegken nin.Na su Yusup na manisan a mama enggu mapia i tandang'u lawas'in. 7 Na da gaid mauget na nabimban i ginawa nu kaluma nu Putipar kanu Yusup taman sa nia nin lun pidtalu na “Dulug aku.” 8 Ugaid'a da kiug su Yusup enggu nia nin pidtalu kanu kaluma nu mapulu nin na “Ilay ka, su mapulu ku na di nin den 'bpangutiapan su apia ngin sia kanu walay nin ka inisalig'in sa laki su langun nu kaaden nin sia. 9 Na dala salakaw a sinaligan kanu walay a nia ka saki bu. Inisalig den sa laki nu mapulu ku su langun nia tabia na seka sabap sa kaluma ka nin. Na panun ba i katika ku enggula sa kabaladusan a nan a sungkang kanu Kadenan?” 10 Na apia ka maitu sa uman-uman gay den i kabpelingasa nu babay sa lekanin na di bun sekanin ibpamamantag'u Yusup atawa ka di nin bun pendulugen.
11 Aden isa a gay a linemudep su Yusup kanu walay ka penggalebeken nin su galebekan nin ugaid'a apia sakataw na dala nasama a manga mama kanu walay. 12 Na kinakangan nu babay su balegkas'in enggu nia nin lun pidtalu na “Dulug aku.” Ugaid'a nalalaguy sekanin lemiu a natagak'in su balegkas'in lu kanu lima nu babay. 13 Na endaw i kinailay nu babay sa natagak'u Yusup su balegkas'in sia kanu lima nin kanu kinapalalaguy nin 14 na tinawag'in su manga mama nu walay a entu ka nia nin pidtalu kanilan na “Ilay nu, ka su taw a Hibru a pinananggit'u kaluma ku sia na papegkayan tanu nin. Linudepan aku nin ka pegkiugan aku nin pegkudi ugaid'a nakalalis aku. 15 Na endaw i kinalalis ku na nakapalalaguy sekanin a natagak'in su balegkas'in a nia.”
16 Na tinimu nu babay su balegkas a entu taman kanu kinauli nu kaluma nin a mapulu nu Yusup. 17 Na pinanudtul'in lun su pantag sa entu sa nia nin pidtalu na “Su pinananggit'engka sia a taw a Hibru a panunugun na linudepan aku nin ka papegkayan aku nin. 18 Ugaid'a endaw i kinalalis ku na nakapalalaguy sekanin taman sa natagak'in su balegkas'in.”
19 Na nasakit a benal i ginawa nu mapulu nu Yusup guna nin makineg su tudtulan nu kaluma nin sa nia nin pidtalu na “Maya ba i kinapakaid sa laki nu panunugun nengka.” 20 Daka inipabilanggu nu Mapulu nin su Yusup lu kanu 'bpamilangguan nu sultan.
Na apia lu den kanu bilangguan su Yusup 21 na pedtapiden bun sekanin nu Kadenan a Mapulu enggu inipailay nin lun su dala idsan nin a limu taman sa nasuatan sekanin nu mapulu nu pedtiakap kanu bilangguan. 22 Na guna su maitu na sinaligan nin su Yusup sa katiakap kanu langun nu nabilanggu. Na langun na pengggalebeken lu kanu bilangguan na su Yusup i pegkakataw lun. 23 Na apia ngin na di den 'bpangutiapan nu mapulu nu pedtiakap kanu bilangguan su Yusup kagina pedtapiden sekanin nu Kadenan a Mapulu enggu papembantasen nin su langun nu penggalebeken nin.