Si Yahuda enggu si Tamar
38
Na kanu entu bun a timpu na minitas si Yahuda kanu manga suled'in ka lu mibpawang kanu mama a bedtuan sa Hira a taw sa dalepa a Adulam. 2 Na aden lu ba babay a nailay ni Yahuda a wata ni Sua a taw sa dalepa a Kanaan na pinangaluma sekanin ni Yahuda. Na guna penduluga ni Yahuda su kaluma nin 3 na migkagingay taman sa mimbata sa wata a mama a binedtuan nin sa Ir. 4 Na migkagingay menem 'bpaluman su kaluma nin na mimbata menem sa wata a mama a binedtuan nin sa Unan. 5 Na migkagingay menem sekanin 'bpaluman enggu wata bun a mama i pimbata nin a binedtuan nin sa Sila. Na kanu kinambata kani Sila na lu silan sa dalepa a Kisib.6 Na pinapangaluma ni Yahuda su kaka sa langun a wata nin a si Ir kanu babay a bedtuan sa Tamar. 7 Ugaid'a si Ir na inimatayan nu Kadenan a Mapulu ka mawag i palangay nin. 8 Daka nia pidtalu ni Yahuda kani Unan na “Dulug ka su balu nu kaka nengka enggu inggulalan nengka su nakabpaliugata sa leka kanu balu nu kaka nengka sa kaenggan nengka sa muliataw su kaka nengka.” 9 Ugaid'a katawan ni Unan i dikena lekanin su mamuliataw nin. Kagina ka maitu na uman nin ipembalagiuma su kaluma nu kaka nin na lu nin papedtugan sa lupa ka enggu nin di kaadenan na muliataw su kaka nin. 10 Na da kalilini nu Kadenan a Mapulu su pinggula a entu ni Unan tembu inimatayan nin bun sekanin. 11 Daka nia pidtalu ni Yahuda kanu mamanugang lun a si Tamar na “Lu ka demun pan edtangen kanu walay nu ama nengka taman sa di pan pegkasela su wata ku a mama a si Sila.” Pidtalu nin bu i nia kagina 'gkagilekan sa matay si Sila a makailing kanu manga suled'in. Kagina ka maitu na minuli den mambu si Tamar lu kanu walay nu ama nin.
12 Na sinemagad su manga timpu na minatay su kaluma ni Yahuda a wata ni Sua. Na guna su naawa den su kinagagaw ni Yahuda na linemu sekanin sa Timna lu kanu 'bpanabungaw kanu manga bili-bili nin a kaped'in su pakat'in a si Hira a taw sa dalepa a Adulam. 13 Na guna mapanudtul kani Tamar i 'bpagangay sa Timna su panugangan nin ka papedtabungawan nin su manga bili-bili nin 14 na iniawa nin su balegkas'in sa tanda na kinabalu nin ka migkumbung sa tendung. Daka minayan sekanin lu kanu bengawan nu dalepa a Inaim a 'bpawang sa dalepa a Timna kagina natagu sa ginawa nin i masela den si Sila ugaid'a da pamun sekanin ipakawing sa lekanin.
15 Na guna den sekanin mailay ni Yahuda na nia nin lun kataw na sundal kagina dinapengan nin su bias'in. 16 Na kagina ka di nin 'gkakilala i entu ba su mamanugang lun na inubay nin ka inidsan nin sa “Mapakay a dulugenb ku seka?” Na nia nin inisumpat na “Ngin i makaenggay nengka sa laki kanu kadulug'engka sa laki?” 17 Na nia nin inisawal na “Pasigkilan ku seka sa pipis a kambing a ebpun kanu manga ayam ku.”
Na nia pan pidtalu ni Tamar sa lekanin na “Ngin mambu i makaenggay nengka a pasalig sa laki taman a di nengka pan i entu makapasigkil?” 18-19 Na nia nin inisumpat sa lekanin na “Ngin i kalinian nengka a makaenggay ku sa leka a pasalig?” Na nia menem inisumpat'i Tamar na “Su ibpanatak'engka enggu su iket'in apeg'u tungked'engka.”
Na inenggay den mambu ni Yahuda su langun na entu, entu pan ka dinulug'in si Tamar. Na guna su maitu na minuli si Tamar enggu iniawa nin su tendung'in ka iniselub'in menem su balegkas'in sa tanda nu kinabalu nin. Na ulian nu entu na migkagingay sekanin.
20 Na kanu kinapasigkil'i Yahuda kanu pipis'u kambing kanu pakat'in a si Hira ka enggu nin makua 'bpaluman su inipasalig'in a entu kanu babay na da den matun ni Hira su babay. 21 Na inidsan nin su manga taw kanu entu a dalepa sa “Endaw den su sundalc kanu ligid'u lalan a nia?” Ugaid'a nia nilan inisawal na “Dala nailay nami a sundal sia.” 22 Na guna su maitu na mimbalingan sekanin lu kani Yahuda sa nia nin pidtalu na “Da ku sekanin matun. Nia pan pidtalu nu manga taw kanu entu a dalepa na da kun nailay nilan lu a sundal.” 23 Na nia inisawal'i Yahuda na “Lekanin den langun su entu ka aden a entu na edtatawan ta bu nu manga taw lu. Nia balapantag na napananggit'engka lun den su pipis a kambing ugaid'a da nengka bu matun sekanin.”
24 Na guna maipus su manga telu ulan na aden midtalu kani Yahuda sa “Si Tamar a mamanugang sa leka na midsundal taman sa migkagingay sekanin!” Na nia pidtalu ni Yahuda na “Pananggit'u sa liu ka tutungen sekanin.” 25 Na kanu kabpananggit lun sa liu na napapait sekanin sa katigan kanu panugangan nin sa nia nin pidtalu na “Nagingay aku nu mama a kigkuan kanu nia ba a manga igagama.” Na nia nin pan pidtalu na “Kilala nengka u entain i kigkuan kanu nia a ibpanatak enggu su iket apeg'u nia ba a tungked?” 26 Na nakilala ni Yahuda su entu a manga igagama taman sa tinalima nin i lekanin su entu sa nia nin pidtalu na “Labi a ikelas sekanin kumin sa laki kagina da ku sekanin makapakawing kanu wata ku a si Sila.” Na da nin den sekanin duluga 'bpaluman.
Su Kinambata kanu Leping
27 Na guna mauma su gay nu kapembata ni Tamar na leping besen su kagingay nin. 28 Na guna su pembata den sekanin na nia nauna ginememaw na su lima nu sakataw. Na kinapetan nu walian su lima nin ka iniketan nin sa maliga a tanul enggu nia nin pidtalu na “Nia ba i 'gkauna penggemaw.” 29 Ugaid'a nia kinaketeng'u wata kanu lima nin na minuna gememaw su leping'in. Na nia pidtalu nu walian na “Ngintu ka seka i minggagaw lemiu?” Sabap sa entu na binedtuan su wata sa Paris.d 30 Daka tinemundug menem gememaw su leping'in a iniketan sa tanul a maliga i lima nin, na binedtuan menem sa Sira.