Su Taginepen nu Yusup
37
Su Yakub na lu pendalepa kanu kalupan sa dalepa a Kanaan a pindadalepan nu ama nin a su Iskak.a2 Nia ba su tarsilan nu manga tupu nu Yakub.
Na nakasapulu enggu pitu lagun pan i umul'u Yusup a wata nu Yakub na pedtabangan nin den su manga suled'in a mama sa kapedtuganul kanu manga ayam'ilan. Na su manga suled'u Yusup a entu na manga wata nu ama nin kanu manga kaluma nin a si Bilha enggu si Silpa. Na inipanudtul'u Yusup kanu ama nilan su mawag a 'gkangguniat'u manga suled'in. 3 Na su Yusup i pinadtaya nu Israilb kanu langun nu manga wata nin a mama sabap sa pimbata sekanin kanu timpu a matua den sekanin. Kagina ka maitu na inumbalan sekanin nu Israil sa lambung a pedtinang.c 4 Ugaid'a guna kasipati nu manga suled'in i sangat den i kapapedtaya nu Yakub kanu Yusup kumin kanilan na nasakitan na ginawa nilan su Yusup taman sa da den mapia a bitiala nilan lun.
5 Na aden isa a gay a midtaginep su Yusup. Na guna nin panudtula su entu kanu manga suled'in, na makin nalunsanan su sakit'a ginawa nilan sa lekanin 6 sa nia nin pidtalu na “Pakikineg'u pan su taginepen ku. 7 Nanguyun tanu kun sa bantad lu sa dalem. Daka midtindeg kun su pinanguyun ku enggu su lekanu menem a pinanguyun na binalibet'ilan su laki ka sinugiudan nilan.” 8 Ugaid'a nia inisumpat'u manga suled'u Yusup sa lekanin na “Ngintu, 'gkapanganganay nengka i makandatu ka atawa ka kandatuan kami nengka?” Na guna su maitu na lawan den i kinasakit'a ginawa nilan sa lekanin sabap kanu manga pidtalu nin a entu pantag kanu taginepen nin.
9 Daka midtaginep menem sekanin, na pinanudtul'in bun kanu manga suled'in sa nia nin pidtalu na “Midtaginep aku menem 'bpaluman sa su senang kun enggu su ulan-ulan enggu su sapulu enggu isa a manga bitun na sinemugiud sa laki.” 10 Ugaid'a guna nin panudtula kanu ama nin na dinaway sekanin nu ama nin sa nia nin pidtalu na “Ngin a taginepen i leka a nan! Ngintu, 'gkapanganganay nengka besen i saki enggu su ina nengka taman kanu manga kaka nengka na mamedsugiud sa leka?” 11 Na entu menem ba i sabapan a kinapangalikud sa lekanin nu manga suled'in. Ugaid'a langun nu entu a pinanudtul'u Yusup na initagu sa ginawa nu ama nin.
Su Kinabpasa kanu Yusup'u manga Suled'in
12 Na aden isa a gay na pinapanadtab'u manga suled'u Yusup su manga ayam'u ama nilan lu kanu manga damautan a masiken sa dalepa a Sikim. 13 Na nia pidtalu nu Israil kanu Yusup na “Dikena ba napapanadtab su manga suled'engka lu sa Sikim? Na lu ka, ka tundug ka silan.” Na nia nin mambu inisawal na “Uway, temundug aku.” 14 Daka sinekat pamun nu ama nin sa “Lu ka den ka ilay ka u ngin i betad'u manga suled'engka enggu su manga ayam tanu. Panudtul ka bu sa laki amaika makambalingan ka den.” Na pinaganat den mambu nu ama nin su Yusup ebpun kanu kadatalan nu dalepa a Hibrun.
Na guna makauma su Yusup sa dalepa a Sikim 15 na aden mama a nakadsuliman sa lekanin a pendadalakaw lu kanu manga damautan. Daka inidsan sekanin nu mama a entu sa “Ngin i 'bpangilayn nengka?” 16 Nia inisawal'u Yusup na “'Bpangilayn ku su manga suled ku. Mapakay a makatutulu nengka sa laki u endaw den silan pebpanadtab?” 17 Nia pidtalu nu mama na “Ginemanat den silan, ka nia ku nakineg na lu silan 'bpagangay sa dalepa a Dutan.” Na guna su maitu na tinundug'u Yusup silan lu sa dalepa a Dutan na lu nin ba silan nauman.
18 Ugaid'a mawatan pan su Yusup na nasandeng den nu manga suled'in. Na gagalu nu kapedsupeg'in kanilan na 'bpamagayunan nilan i kaimatay nilan lun 19 sa nia pedtalun nu uman i isa na “Nan den su datu nu patataginep! 20 Na sia kanu ka imatayan tanu sekanin enggu idtug tanu lu kanu kalut. Nia tanu bu edtalun na kinan sekanin na talaw a binatang, na ilayn tanu ba u ngin i manggula nu taginepen nin.” 21 Ugaid'a guna i entu makineg'i Rubin na inapas'in i makalipuas'in su Yusup kanu kabpagimatay nilan sa lekanin sa nia nin pidtalu kanilan na “Di tanu sekanin imatayan! 22 Di nu papedtuga i lugu nin. Idtug'u bu sekanin kanu kalut kanu damautan ugaid'a di nu bu sekanin mapakasakiti.” Pidtalu nin i entu ka enggu nin makalipuas su Yusup enggu makambalingan sekanin kanu ama nilan.
23 Na guna den makaubay su Yusup kanu manga suled'in na linuwas'ilan su pimbalegkas'u Yusup a lambung a matinang. 24 Daka tinundan nilan sekanin ka inidtug'ilan lu kanu kalut a dala ig'in.
25 Na kanu kapegkan nilan na aden nasandeng'ilan a manga tupu nu Ismail a ebpun sa dalepa a Giliad. Na su manga unta nilan na linulanan sa embalang-balang a manga mamutd ka 'bpananggiten nilan lu sa dalepa a Egypt. 26 Daka nia pidtalu ni Yahuda kanu manga suled'in na “Dala makua tanu lun amaika imatayan tanu su suled tanu enggu su kapagena tanu kanu kapakaid tanu sa lekanin. 27 Na makin tanu sekanin 'bpasan kanu manga tupu nu Ismail. Sa maya ba a ukit na di tanu sekanin kapakasakitan kagina suled tanu bun sekanin enggu lugu tanu bun.” Na inayunan mambu nu manga suled'in su entu. 28 Na guna den 'bpagukit su manga padagang a taw sa dalepa a Midian,e na inabat'u manga suled'in mamagayas su Yusup lu kanu kalut ka pibpasa nilan sekanin sa alaga na duapulu timan a pilak.f Na pidtapik den mambu nu manga tupu nu Ismail su Yusup lu sa dalepa a Egypt.
29 Na guna den makambalingan si Rubin lu kanu kalut na nailay nin i da den lu su Yusup daka kinisi nin su balegkas'in.g 30 Na mimbalingan menem sekanin lu kanu manga suled'in sa nia nin pidtalu na “Da den lu su wata kanu kalut! Na ngin den i enggulan ku?”
31 Daka kinua nilan su lambung'u Yusup enggu minimatay silan sa kambing ka inisumbuk'ilan su lambung a entu lu kanu lugu. 32 Na pidtapik'ilan su lambung a entu lu kanu ama nilan ka nia nilan inipanudtul sa lekanin na “Natun nami i nia ba. Ilay ka u nia ba su lambung'u wata nengka atawa ka dikena.” 33 Na nakilala nu ama nilan su entu taman sa nia nin nadtalu na “Saben-sabenal a kanu wata ku i nia! Kinan sekanin na talaw a binatang. Nadsalupet su wata ku a si Yusup!”
34 Daka kinisi mambu nu Yakub su balegkas'in ka mimbalegkas sa sakug enggu nauget a gay na ginagawan bu sekanin. 35 Na 'bpelimpangen sekanin nu sakambinabatan nin ugaid'a di sekanin pegkiug 'bpelimpangen taman sa nia nin pidtalu na “Taman sa pakubulan na madtapik ku su gagaw ku kanu wata ku.” Na sangat a nauliangan nin sa matanug su wata nin.
36 Saleta mambu na su Yusup na pibpasa den nu manga taw sa dalepa Midian kanu Putipar a 'gkasaligan nu Piraun enggu 'gkaunutan nu manga pedtameng kanu tulugan lu sa dalepa a Egypt.