Rut 3

Su Kinalu ni Rut kanu Tagikan

Kanu isa a gay na nia pidtalu ni Nuimi kani Rut na “Dua na manga wata, dait a katunan ku seka sa madtiwalay nengka ka enggu aden makatuludu sa leka. 2 Kena ta ba nabpagali si Buas a mapulu nu manga babay a nadtagapeda nengka lu kanu 'bpangangawidan nin? Pakikineg aku nengka sa mapia, saguna magabi na papembayug sekanin sa bantad a barli lu kanu tagikan. 3 Na enggula ka u ngin i edtalun ku sa leka. 'Bpaigu ka enggu 'gkamutan ka taman sa embalegkas ka su mapia sa langun a balegkas'engka entu pan ka angay ka lu kanu tagikan ugaid'a da ka pan babaya mapailay kani Buas. Amaika makapasad sekanin keman 4 na edsipati ka u endaw sekanin miga ka u makatulug den na lulud ka enggu sawai ka su tanggub'u ay nin ka iga ka lu kanu ubay nu ay nin. Na edtalun nin sa leka u ngin i dait a enggulan nengka.”

5 Daka nia mambu inisawal'i Rut na “Enggulan ku su langun nu pidtalu nengka a nan.”

6 Kagina ka maitu na linemu den mambu si Rut kanu tagikan ka ipenggulalan nin su langun nu inidtutuma nu panugangan nin. 7 Na guna makapasad keman enggu minem si Buas na napia a benal i ginawa nin taman sa linemu sekanin kanu ubay nu initambak a bantad a barli ka miniga sekanin. Endaw i kinatulug'in na mibpapalanat den mambu mubay si Rut ka sinawan nin su ay ni Buas entu pan ka miniga lu kanu ubay nu ay nin.

8 Kanu manga luk i gay na nakatekaw demun nakagedam si Buas. Na guna sekanin 'gkelid na nagaip sekanin ka aden babay a miniga lu kanu ubay nu ay nin! 9 Na naidsan nin sa “Entain ka?”

Na nia inisumpat'i Rut na “Hu datu, saki si Rut. Kagina masupeg a benal i kinabpagalia ta na wagib a maaun enggu matuludu aku nengka. Na 'bpangenin ku sa leka i pakawingi aku a mana su adat-betad'u.”

10 Na nia pidtalu ni Buas sa lekanin na “Bai, palihalan ka nu Kadenan. Su nia a kinakalimu nengka kanu maginged'ami na labi pan i kapia nin kumin kanu kinakalimu nengka kanu panugangan nengka kagina da ka pangilay sa manguda a mama magidsan pan i kawasa atawa ka miskinan. 11 Na da ka 'bpangandam Bai, ka enggulan ku su langun a 'bpangenin nengka. Katawan nu langun na taw kanu nia a bandal a inged i matidtu ka a babay. 12 Benal su pidtalu nengka a masupeg i kinabpagali nu sa laki enggu wagib a temuludu sa leka ugaid'a aden pamun mama a labi pan i kasupeg a kabpagali nu kaluma nengka lun kumin sa laki. 13 Sia ka demun sa nia a magabi ka amag sa mapita na imbitiala ku su mama a pedtalun ku sa leka. Amaika miug sa kaaun nin sa leka na dait a kapakawingan ka nin. Ugaid'a amaika di menem miug na idsapa ku kanu Kadenan i pangaluman ku seka. Na maitu den ba, tulug ka den.”

14 Daka tinemulug den ba a entu si Rut lu kanu ubay nu ay ni Buas taman sa mapita. Ugaid'a mimbangun sekanin unan nu da pan 'gkasisi su mapita kagina nia pidtalu ni Buas sa lekanin na “Da isa bu a makataw sa aden babay sia kanu tagikan.” 15 Na nia pamun pidtalu ni Buas na “Belat ka su kayab'engka a nan.” Saleta mambu na tinaguan den ni Buas sa bantad a barli a nem kasanduk a masela enggu inipapangutu nin lun entu pan ka mimbalingan lu kanu bandal a inged.

16 Guna makauli si Rut na inidsan sekanin ni Nuimi sa “Dua na manga wata na ngin i betad'u lakaw nengka?”

Daka pidsinantal den mambu ni Rut kanu panugangan nin su langun nu napasadan nu lakaw nin kani Buas. 17 Na nia pamun pidtalu ni Rut na “Inipadtapik'in sa laki su langun nu nia ba a bantad a barli ka di kun dait a embalingan aku sia sa leka a dala mapananggit ku.”

18 Daka nia mambu nakasumpat'i Nuimi lun na “Tana ka den dua na manga wata ka katawan nengka bun u ngin i kapasadan nu nia ba. Di man temelen si Buas taman a di nin makapadtamel su entu sa saguna bun ba a nia a gay.”