Su Kinapangaluma ni Buas kani Rut
4
Na linemu si Buas kanu bengawan nu bandal a ingeda enggu minayan sekanin lu ba. Na da gaid matana-tana na 'bpagukit su mama a pagali nu kaluma ni Rut a aden kawagib'in sa kabpangaun. Daka tinawag'i Buas sa “Pakat! Aut ka pan sia ka ipembitiala ku seka.” Na minubay den mambu sekanin taman sa minayan lu kanu ubay ni Buas.2 Daka napatawag si Buas sa sapulu kataw a manga kalukesan nu bandal a inged ka pinaayan nin bun lu. Na guna su nakapagagayan den silan 3 na nia nin pidtalu kanu pagali nin na “Katawan nengka na mimbalingan den si Nuimi a ganat sa Muab, na nia nin kalinian na 'bpasan nin su lupa nu kaluma nin a si Ilimilik a pagali ta. 4 Napagitung ku i dait a kasabutan nengka i nia. Na amaika pegkiugan nengka 'bpagaun na aun ka den kanu kaadapan nu manga 'bpamagagayan sia enggu kanu sapulu kataw a nia a manga kalukesan. Ugaid'a amaika di nengka pegkiugan 'bpagaun na edtalu ka sa laki ka saki i maun lun kagina da den salakaw a wagib a makaaun lun.”
Daka nia pidtalu nu mama a entu na “Aunen ku.”
5 Guna su maitu na nia pan pidtalu ni Buas na “Kanu kapamasa nengka kanu entu a lupa ni Nuimi na wagib i magkaluma nengka si Rut a taw sa Muab a balu nu pagali ta asal bu na di madadag kanu tupu nu minatay su entu a lupa.”
6 Daka nia nadtalu nu mama na “U maitu besen na di ku den inggulalan su kawagib ku sa kaaun lun kagina nia menem kadalan na kawalis na su manga muliataw ku. Makin seka demun i aun lun.”
7 (Na kanu entu a timpu na su adat-betad'u manga taw sa Israil na u 'bpamasan su isa a kaaden na ibpagawa nu pebpasa su talumpa nin ka ibpagenggay nin kanu namasa kagina entu ba i maumbal a amadan nu kapasadan.)
8 Guna su maitu na endaw i kinadtalu nu entu a mama kani Buas sa “Seka den i pamasa lun” na iniawa nin su talumpa nin.
9 Daka nia pidtalu ni Buas kanu manga kalukesan enggu kanu ped a manga taw a natabu lu na “Sekanu i manga saksi sa pinamasa ku den kani Nuimi su langun na kawalis'i Ilimilik, a nakabpusaka kani Kiliun enggu si Malun. 10 Na liu pan sa entu na wagib i magkaluma ku si Rut a taw sa Muab a balu ni Malun. Kagina ka maitu na di makaalat su kawalis'u namamatay sa ped a taw. Kanu maya ba a ukit na di bun madadag su ngala nilan kanu tarsilan nu manga tupu nilan. Sekanu i manga saksi makapantag kanu nia ba.”
11 Nia mambu inisumpat'u manga kalukesan enggu su ped a manga taw lu na “Uway, pedsaksian nami! Palihalan nu Kadenan su entu a babay, a mana su kinapalihala nin kani Rakil enggu Liab a naebpunan nu bangsa na Israil. Seka menem na mabaluy ka a kawasa kanu manga Iprat enggu mabadtug su ngala nengka sa Bitlihim. 12 Na su manga muliataw a inggay nu Kadenan sa leka a sia makanggulalan kanu nia a manguda a babay na mabadtug a mana su namuliataw nu katupuan nengka a si Parez a wata ni Yahudac enggu Tamar.”
13 Guna su maitu na pinangaluma den mambu ni Buas si Rut taman sa inidtiwalay nin den lu kanu walay nin. Na pinalihalan silan nu Kadenan ka migkagingay si Rut taman sa mimbata sa wata a mama. 14 Na nia pidtalu nu manga babay lu kani Nuimi na “Pugin su Kadenan ka inenggan kanu nin sa apu a makatebus sa lekanu kanu kinalusak'u! Pangeni-ngenin nami i mabadtug sekanin sa Israil. 15 Maitu bun na makapagkabagel ka nin sa apia matua ka den enggu matuludu ka nin kanu kagkatua nengka. Su kalimu nu mamanugang sa leka na labi lawan pan kanu limu nu pitu kataw a manga wata a mama ka pimbata nin su apu nengka a mama!”
16 Daka sinakupu ni Nuimi su wata enggu tiniakapan nin sa mapia. 17 Na nia pidtalu nu manga babay a pagubay nilan na “Aden den wata ni Nuimi a mama.” Na nia nilan lun inipanggungala na si Ubid. Si Ubid ba a nia i nabaluy a ama ni Yisi enggu ama lukes'u Daud.d
Su Katupuan nu Daud
18 Nia ba su tarsilan nu katupuan a ganat kani Parez: Si Parez na ama ni Hisrun. 19 Na si Hisrun menem i ama ni Ram enggu si Ram i ama ni Aminadab. 20 Si Aminadab menem i ama ni Nasun enggu si Nasun i ama ni Salmun. 21 Na si Salmun menem i ama ni Buas enggu si Buas i ama ni Ubid. 22 Si Ubid menem i ama ni Yisi enggu si Yisi i ama nu Daud.
Wassalam