Su dala Katalima nu manga Sundalu nu Taw a Pilistin kanu Daud
29
Na saleta na su manga taw a Pilistin na mindidilimudan silan lu sa dalepa a Apik ka lu ba silan migkampu. Na su manga taw menem a Israil na lu migkampu kanu ubay nu bualan nu ig sa dalepa a Yisril. 2 Na su kabpelu nu manga mapulu nu sundalu nu manga taw a Pilistin kanu pembunuan a kaped'ilan su manga taw nilan na mindudulumpuk sa enggaga-magatus enggu enggagad-sangibu. Na su Daud enggu su manga taw nin na lu sa ulian a kaped'ilan si Datu Akis. 3 Daka nia nakaidsa nu 'gkangaunutan nu manga taw a Pilistin na “Ngin i penggulan sia nu manga taw a nan a Hibru?” Na nia inisumpat'i Datu Akis kanilan na “Si Daud i nan a 'gkaunutan nu manga sundalu ni Saul a datu nu manga taw a Israil. Na nakalabi salagun den sekanin sia sa laki. Na iganat sa entu sampay saguna na dala nailay ku a pinggula nin a mawag.” 4 Ugaid'a su 'gkangaunutan nu sundalu nu manga taw a Pilistin na sangat a nangalipunget taman sa nia nilan pidtalu na “Pambalingan ka a nan silan lu kanu kalupan a pinagkalebenan nengka kanilan. Di dait a mamung silan sa lekitanu kanu kapembunua, ka aden a entu na sekitanu bun i pangimatayan nilan amaika embunua tanu den asal bu na maawa su lipunget'u mapulu nin sa lekanin. 5 Dikena ba sekanin su pinugi nu manga babay kanu kapedsagayan nilan a pedsengal sa‘Ngibu-ngibuan i minatay ni Saul
enggu puluan ngibu i minatay ni Daud’?”
6 Daka tinawag'i Datu Akis su Daud ka nia nin lun pidtalu na “Saben-sabenal a su Kadenan a Mapulu i saksi sa kasaligan ka a taw. Na u saki bu man, na nia ku pan kalinian na makaamung kanu kanu kapembunua kagina iganat pan kanu paganay sampay saguna a kabpagunut'engka sa laki na dala nailay ku sa leka a mawag. Ugaid'a su 'gkangaunutan nu sundalu na di ka nilan pedsaligan. 7 Tembu saguna na uli ka den sa malilintad enggu da ka enggula sa punan a ikalipunget'u 'gkangaunutan nu manga taw a Pilistin.” 8 Na nia inisumpat'u Daud kani Datu Akis na “Hu datu, ngin besen i pinggula ku? Ngin i nailay nengka sa laki a mawag a pinggula ku iganat kanu kinaunut ku sa leka sampay saguna? Enduken ka di aku 'gkapakayan a mamung kanu kapembunua kanu manga kuntela nu mapulu ku a datu?” 9 Na nia inisumpat'i Datu Akis sa lekanin na “Katawan ku i da tila nengka a taw a mana su malaikat'u Kadenan. Ugaid'a di ka pegkiugan pebpagunut'u 'gkangaunutan nu manga sundalu ku a manga taw a Pilistin kanu kapembunua. 10 Na namag a entu na 'bpanay ka gemedam ka uli ka 'bpanay a kaped'u manga taw nengka a minunut sa leka mawa kanu mapulu nu a si Saul.”
11 Daka mibpanay mambu gemedam su Daud enggu su manga taw nin ka minuli silan lu kanu pinagkalebenan kanilan a kalupan nu manga taw a Pilistin. Na su manga sundalu nu manga taw a Pilistin na linemu den silan sa dalepa a Yisril.