28
Na kanu entu a timpu na linimud'u manga taw a Pilistin su manga sundalu nilan ka enggu nilan makambunua su manga taw a Israil. Na nia pidtalu ni Datu Akis kanu Daud na “Unut kanu sa lekami embunua.”2 Na nia inisumpat'u Daud na “Uway, mapia i nan ka saguna na mailay nengka u endaw taman i magaga nu panunugun nengka.” Na nia inisumpat'i Datu Akis na “Mapia, ka iganat saguna na baluyn ku seka a tameng ku taman a bibiag aku pan.”
Su Kinapatawag'u Saul kanu Ngiawa nu Samuil
3 Na kanu entu a timpu na minatay den su Samuil enggu lu nilan inilebeng kanu dalepa nin sa Rama. Na sangat a nakalidu i entu kanu ginawa nu manga taw a Israil. Saleta mambu na su manga 'bpagalamat enggu su pakambitiala sa ngiawa na minatay na pinaawa silan nu Saul kanu lusud'u Israil.
4 Na su manga taw a Pilistin na mindidilimudan ka lu silan migkampu sa dalepa a Sunim. Na su Saul menem enggu su manga sundalu a Israil na lu menem silan migkampu sa dalepa a Gilbua. 5 Na guna masandeng'u Saul su manga sundalu a Pilistin na sangat a nagilekan sekanin. 6 Daka nangadap sekanin kanu Kadenan a Mapulu u ngin i dait a enggulan nin. Ugaid'a dala a benal sekanin sawala nu Kadenan sa apia ngin a ukit magidsan pan i sia nakanggulalan sa taginepen atawa ka sia nakanggulalan kanu Urima atawa ka kanu manga nabi. 7 Na guna su maitu na nia pidtalu nu Saul kanu manga panunugun nin na “Pangilayi aku nu sa babay a pakambitiala sa ngiawa na minatay.” Na nia nilan inisumpat na “Aden lu sa dalepa a Indur.”
8 Daka mimbalegkas su Saul sa kadsalilidan demun a balegkas ka enggu di sekanin makilala. Na kanu magabi na linemu sekanin apeg'u dua kataw a panunugun nin kanu babay a entu. Na nia nilan kinauma lu na nia nin pidtalu kanu babay na “Aden pegkiugan ku pembitiala a ngiawa na minatay. Tawag ka i ngiawa nu minatay a bedtun ku i ngala nin.” 9 Ugaid'a nia inisumpat'u babay sa lekanin na “Nginan, pegkiugan aku nengka ipebpagimatay? Katawan nengka a benal su pinggula ni Saul a pinaawa nin kanu lusud'u Israil su langun nu 'bpamagalamat enggu su pembitiala sa ngiawa na minatay.” 10 Na nia inisumpat'u Saul na “Ipedsapa ku kanu Kadenan a Mapulu i di ka masiksa kanu nan a penggulan nengka.” 11 Daka guna su maitu na nia pidtalu nu babay na “Entain i kingiawa sa pegkiugan nengka pembitiala?” Na nia nin inisumpat na “Su ngiawa ni Samuil.”
12 Na guna mailay nu babay su Samuil na nakalalis sekanin sa matanug, na nia nin nadtalu kanu Saul na “Ngintu ka pinagakalan aku nengka? Seka besen si Saul!” 13 Na nia pidtalu nu Saul sa lekanin na “Da ka 'gkagilek. Ngin i nailay nengka?” Na nia inisumpat'u babay na “Nakailay aku sa ngiawa a ebpun kanu lupa.” 14 Na nia pidtalu nu Saul na “Ngin i buntal'in?” Na nia inisumpat'u babay na “Matua a mama a mimbalegkas sa lambung.” Daka tinalanged'u Saul i su Samuil su entu tembu sinemugiud sekanin a tanda nu kabpagadat'in lun.
15 Na nia pidtalu nu Samuil kanu Saul na “Nginan ka liningasa aku nengka pan?” Na nia inisumpat'u Saul na “Kagina sangat a 'gkalidu i ginawa ku ka pembunun kami nu manga taw a Pilistin. Na su Kadenan na tinaligkudan aku nin den. Di aku nin den pedsawalen sa apia ngin a ukit magidsan pan i sia kanu taginepen atawa ka kanu manga nabi. Tembu inipatawag ku seka ka enggu nengka madtalu sa laki u ngin i dait a enggulan ku.” 16 Na nia pidtalu nu Samuil na “Ngintu ka 'bpagidsan aku nengka pan? Dikena ba tinaligkudan ka den nu Kadenan a Mapulu enggu nagkuntela ka nin den? 17 Na pinggula den man nu Kadenan su pidtalu nin sia nakanggulalan sa laki sa iawa nin su kadatu nengka ka enggay nin kanu pagidsan nengka a taw a Israil a si Daud. 18 Na pinggula nu Kadenan i nia sa leka kagina dala nengka paginuguti su inisugu nin sa leka a kanggulalan nengka kanu sangat i kapasang'in a lipunget'in kanu manga taw a Amalik. 19 Na ipalad ka nu Kadenan enggu su manga taw a Israil kanu manga taw a Pilistin. Na namag bun a entu, na seka taman kanu manga wata nengka a mama na madtagapeda ku sekanu sia kanu dalepa nu manga namamatay.” 20 Na guna makineg'u Saul su entu na natekaw demun sekanin nakadudsung kanu lupa a sangat a nagilekan sabap kanu katigan a entu nu Samuil. Na migkalubay a benal sekanin kagina dala nakan nin kanu nagagabian enggu nalalamagan. 21 Daka inubay sekanin nu babay. Na guna nin madsuliman i sangat a nagilekan su Saul na nia nin nadtalu na “Hu datu, pinggula ku den su inisugu nengka sa laki apia nia nin kaaden i nakadtawakal ku su umul ku. 22 Na saguna na saki menem a panunugun nengka i pakikineg ka. Suguti aku sa katalagadan ku seka sa apia paidu bu a makan asal'a 'gkabagel ka kanu kauli nengka.” 23 Ugaid'a dala kiug su Saul ka nia nin pidtalu na “Di aku pegkan.” Ugaid'a pinamagayukan bun sekanin nu manga panunugun nin enggu su babay a entu. Na pinakikineg mambu silan nu Saul taman sa mimbangun sekanin kanu naigan nin. 24 Guna su maitu na sinumbali mamagayas'u babay su pinagkasebud'in a manguda a sapi enggu kinemua bun sekanin sa arina ka inumbal'in a pan a dala pakembang'in, 25 entu pan ka initalagad'in kanu Saul enggu kanu manga panunugun nu Saul. Na kanu entu bun ba a magabi na minuli silan.