Su Kinagkaleben nu Daud kanu Dalepa ni Datu Akis sa Dalepa a Gat
27
Na nia 'gkadtalu na ginawa nu Daud na “Aden gay a imatayan aku ni Saul. Na nia mapia na mawa aku den sia ka lemu aku kanu kalupan nu manga taw a Pilistin ka enggu aku nin 'gkatelenan 'bpanganup kanu lusud'u Israil. Na amaika maitu na makalipuas aku den ba a entu sa lekanin.” 2 Daka linemu den mambu su Daud enggu su nem gatus a manga taw nin sa kani Datu Akis a wata ni Mauk sa dalepa a Gat. 3 Na lu den ba migkakaleben su Daud apeg'u manga taw nin enggu su langun nu sakambinabatan nilan taman kanu manga kaluma nin a si Ahinuam a taw sa Yisril enggu si Abigil a balu ni Nabal a taw sa Karmil. 4 Na guna katawi nu Saul i nalalaguy su Daud lu sa dalepa a Gat na tinelenan nin den manganup sekanin.5 Na aden isa a gay a pidtalu nu Daud kani Datu Akis i “Hu datu, amaika 'gkasuatan aku nengka na suguti kami nengka a makagkaleben kanu isa kanu dalepa a nasakupan nengka ka di kami makadait a 'gkaleben sia kanu siudad a nia a pegkalebenan nu datu.” 6 Na kanu entu bun ba a gay na inenggay ni Datu Akis kanu Daud su dalepa a Siklag. Tembu sampay saguna na su dalepa a Siklag, na sakup pamun i entu nu manga datu nu Yahuda. 7 Na nakasalagun enggu pat ulan i kinagkakaleben nu Daud kanu sakup'u manga taw a Pilistin.
8 Na kanu entu bun ba a manga timpu na linusudan nu Daud enggu su manga taw nin su manga taw a Gisur, manga taw a Girs enggu su manga taw a Amalik. Na iganat sa ganatan na su nia ba a manga taw na lu den ba silan migkaleben kanu dalepa a Sur taman kanu dulunan nu dalepa a Egypt. 9 Na uman 'bpelusud su Daud enggu su manga taw nin na 'bpagimatayan nilan magidsan i babay-mama enggu 'bpanguan nilan su manga bili-bili, sapi, kimar, unta enggu su manga balegkas entu pan ka 'bpelu silan kani Datu Akis. 10 Na amaika 'bpagidsan ni Datu Akis su Daud u endaw silan linemusud na aden a entu na nia nin ipedsumpat sa lekanin na lu sa kalupan a Nigib kanu manga taw a Yahuda atawa ka sa kalupan a Nigib kanu manga taw a Yiramil, aden menem a entu na lu kanu kalupan a Nigib kanu manga taw a Kin. 11 Na 'bpangimatayan nu Daud su babay-mama kanu entu ba a dalepa ka enggu dala makapanudtul lu sa dalepa a Gat u ngin i pinakaidan nin sa kanilan. Na tatap maitu ba i penggulan nu Daud kanu timpu a lu sekanin kanu 'gkasakupan nu manga taw a Pilistin. 12 Na sinaligan a benal sekanin ni Datu Akis taman sa nia 'gkadtalu na ginawa nin na “Kabensian den nu manga pagidsan nin a Israil si Daud sabap kanu nan a penggulan nin tembu mabaluy ku den sekanin a panunugun taman sa taman.”