Su dala menem Kaimatay nu Daud kanu Saul
26
Na aden isa a gay a linemu menem su manga taw a Sip kanu Saul lu sa dalepa a Gibia ka nia nilan pidtalu sa lekanin na “Si Daud na lu 'bpagena kanu bakulud'u Akila a 'gkasangulan nu dalepa a Yisimun.” 2 Daka linemu su Saul enggu su telu ngibu a mangategel a sundalu nu manga taw a Israil kanu tawan-tawan a dalepa sa Sip ka pinangilay nilan su Daud lu ba. 3 Na lu silan migkampu kanu bakulud'u Akila lu kanu ligid'u lalan a 'gkasangulan nu dalepa a Yisimun. Ugaid'a su Daud na lu bun 'bpagena kanu tawan-tawan a dalepa a Sip. Na guna nin makineg i tinundug sekanin nu Saul na 4 sinemugu sekanin sa makapanininting sa entu taman sa naamad'in i benal ba su entu. 5 Guna su maitu na linemu su Daud kanu pegkampuan nu Saul. Daka nailay nin su Saul enggu si Abnir a mapulu nu manga sundalu a wata ni Nir a pedtulug silan apeg'u manga sundalu nilan a nakabalibet kanilan.6 Daka guna su maitu na inidsan nu Daud si Ahimilik a taw a Hit enggu si Abisai a wata ni Siruya a suled'i Yuab sa “Entain sa lekanu i munut sa laki sa kaludep ku kanu nabetadan ni Saul?” Na nia inisumpat'i Abisai na “Saki i munut sa leka.” 7 Guna su maitu na linudepan nu Daud enggu Abisai su kampu nu Saul, na nailay nilan i pedtulug su Saul enggu su dilek'in na nakabudsud kanu lupa lu tampal kanu kaunanan nin. Na si Abnir menem enggu su manga sundalu na nakatulug bun a benal a nakabalibet kanu Saul. 8 Na nia pidtalu ni Abisai kanu Daud na “Inipalad den nu Kadenan sa leka su kuntela nengka kanu nia a gay. Na suguti aku sa katumbuk ku sa lekanin kanu dilek ku ka makaisa ku bu i nan matumbuk na makatapi den kanu lupa.” 9 Ugaid'a nia pidtalu nu Daud kani Abisai na “Di ka sekanin 'bpagimatayi ka siksan nu Kadenan a Mapulu su apia entain i mimatay kanu datu a pinamili nin.” 10 Na nia pan pidtalu nu Daud na “Ipedsapa ku sa leka kanu adapan nu Kadenan a Mapulu i sekanin den i mataw lun mimatay sa apia ngin a ukit magidsan pan i kambunua atawa ka katua nin den. 11 Na pangeni-ngenin ku kanu Kadenan a Mapulu i di nin isugut i kanggulan ku sa dikena mapia kanu datu a pinamili nin. Na makin nia ta enggulan na kuan ta su dilek'in a nan sa kaunanan nin enggu su taguan na ig'in ka mawa ta den sia.” 12 Daka kinua den mambu nu Daud su dilek'in enggu su taguan na ig'in ka minawa den silan. Na dala a benal nakatekaw atawa ka nakailay kanilan ka apia sakataw na dala nakagedam kagina nakatulug a benal silan sabap sa pinatulug silan nu Kadenan a Mapulu.
13 Na guna su maitu na linemu su Daud enggu si Abisai lu kanu satiman a bakulud a malu matangka-tangka kanilan ka midtindeg silan lu kanu untul'in 14 ka tinawag'u Daud si Abnir enggu su manga sundalu nin sa “Abnir, 'gkakineg aku nengka?” Na nia inisumpat'i Abnir na “Entain ka enggu ngin i nasisita nengka kanu datu?” 15 Na nia inisumpat'u Daud sa lekanin na “Dikena ba seka i mategel sa langun kanu manga mama kanu lusud'u Israil? Na aden linemudep san ka pegkiugan nin 'bpagimatay su datu a mapulu nengka. Na ngintu ka dala nengka katiakapi su datu a mapulu nengka? 16 Dikena mapia i pinggula nengka a nan. Na idsapa ku kanu Kadenan a Mapulu i dait a matay ka taman kanu manga taw nengka kagina dala nu katiakapi su mapulu nu a datu a pinamili nu Kadenan a Mapulu. Ilay nu ba, ngintu san pamun kanu kaunanan nu datu su dilek'in enggu su taguan na ig'in?”
17 Na saleta mambu na nakilala nu Saul su suala nu Daud enggu nia nin nadtalu na “Daud a wata ku, seka i nan?” Na nia nin nakasumpat na “Uway, saki i nia, datu a mapulu ku. 18 Ngintu ka 'bpanganupen nengka su panunugun nengka? Ngin besen i pinggula ku a mawag? 19 Hu datu a mapulu ku, pakikineg aku nengka pan, amaika su Kadenan a Mapulu i pedsendel sa leka sa kabpagimatay nengka a nan sa laki na taliman nin su kurban ku sa lekanin. Ugaid'a amaika menem ka nia bu pedsendel sa leka i manusia na pangenin ku i tiuban silan nu Kadenan. Kagina binugaw aku nilan kanu dalepa a iniumun sa laki a inibpusaka nu Kadenan sa nia nilan katigan na ‘Awa ka sia enggu simba ka kanu manga pegkakadenanen.’ 20 Kagina ka maitu na 'bpangenin ku sa leka i di ka semuguti sa sia aku matay kanu kalupan a mawatan kanu adapan nu Kadenan a Mapulu. Enduken man ka pedtanggan aku pan 'bpanganup'u datu nu Israil a mana aku bu kutu? Enduken ka 'bpanganupen aku nu a mana den papanuk sa damakayu?”
21 Daka nia pidtalu nu Saul na “Daud a wata ku, nakandusa aku sa leka. Embalingan ka den ka di ku den seka pakasakitan. Kagina inenggan nengka sa kabalapantag su umul ku kanu nia a gay. Na kababalan man su pinggula ku a entu sa leka. Sangat man a nalimban aku.” 22 Na nia inisumpat'u Daud na “Hu datu, nia bun su dilek'engka, ipakua nengka sia kanu taw nengka. 23 Na balasan nu Kadenan a Mapulu su taw a matidtu enggu matulanged. Inipalad ka nin man sa laki kanu nia a gay ugaid'a dala ku seka enggulai sa dikena mapia kagina seka i pinamili a datu nu Kadenan a Mapulu. 24 Inenggan ku sa kabalapantag su umul'engka kanu nia ba a kutika, nia ku mambu 'bpangenin na enggan bun nu Kadenan a Mapulu sa kabalapantag su umul ku enggu ilipuas aku nin kanu langun nu mawag a manggula.” 25 Na nia pidtalu nu Saul kanu Daud na “Palihalan ka, wata ku. Na madakel pan i balapantag a manggula nengka enggu natatalanged i embantas ka sa entu.” Na guna su maitu na ginemanat den su Daud. Na su Saul menem na minuli den mambu.