Su Kinapatay nu Samuil
25
Guna matay su Samuil na mindidilimudan su langun nu manga taw a Israil a nangalidu a benal i ginawa nilan. Na lu nilan inilebeng su Samuil kanu dalepa nin a Rama.Su Daud enggu su Tiwalay a si Nabal enggu Abigil
Na saleta mambu na su Daud na minalat lu kanu tawan-tawan a dalepa nu Maun.a
2 Na aden kawasa a benal a mama lu sa Maun a maulad i lupa nin lu kanu dalepa a Karmil. Na madakel a benal i pangangayamen nin ka su kambing'in bu na sangibu den i kadakel'in enggu su manga bili-bili nin menem na telu ngibu i kadakel'in. Na lu nin papedtabungawan sa Karmil su manga bili-bili nin. 3 Na nia ngala nu kawasa a entu a mama na si Nabal enggu nia nin kaluma na si Abigil. Na manisan a benal a babay si Abigil enggu balaitungan ugaid'a su kaluma nin a si Nabal a tupu nu Kalib na mawag a benal i palangay nin.
4 Na gagalu nu lu su Daud kanu tawan-tawan a dalepa na nakineg'in i papedtabungawan ni Nabal su manga bili-bili nin. 5 Na guna su maitu na sinemugu su Daud sa sapulu kataw a manga mama lu kani Nabal ka nia nin pidtalu kanilan na “Lu kanu kani Nabal a lu sa Karmil ka isampay nu sa lekanin su salam ku a nia 6 sa ‘Pagkalendun nu Kadenan su umul'engka taman kanu sakambinabatan nengka enggu su langun nu pangangayamen nengka. 7 Nakineg ku i papedtabungawan nengka su manga bili-bili nengka. Na kanu timpu a nadtagapeda nami su manga patutuganul kanu manga pangangayamen nengka lu sa Karmil na dala pinggula nami kanilan a mawag enggu dala nadadag kanu manga pangangayamen nengka. 8 Na apia idsan nengka silan na edtalun nilan sa leka u ngin i bantang. Na 'bpangenin ku sa leka saguna i ikalimu nengka pan su manga taw ku kagina timpu bun mambu nu kapedsela-sela saguna. Na amaika mapakay bu na inggay nengka u ngin i mapakay a makaenggay nengka kanu manga panunugun nengka enggu kanu manga dua na wata nengka a si Daud.’ ”
9 Na ginemanat den mambu su manga sinugu nu Daud ka inisampay nilan den kani Nabal su katigan nu Daud. Na inangatan nilan u ngin i makasawal'i Nabal. 10 Na nia nakasawal'i Nabal na “Entain si Daud a nia a wata ni Yisi? Na kanu nia a manga timpu na madakel den i manga panunugun i 'bpagawan nilan su manga mapulu nilan. 11 Na enduken ka pakaenggay ku su pan, ig enggu su manga sapu na pangangayamen a inadil ku kanu 'bpamanabungaw kanu manga bili-bili ku kanu manga taw a di ku katawan u endaw nakabpun?”
12 Na guna su maitu na mimbalingan lu kanu Daud su manga sinugu nin ka pidsinantal'ilan sa lekanin su langun nu pidtalu ni Nabal. 13 Daka nia pidtalu nu Daud kanu manga taw nin na “Ibpakut'u uman i isa su sundang'in.” Na inibpakut'ilan den mambu su entu taman den kanu Daud. Na pat gatus kataw i minunut kanu Daud enggu dua gatus kataw menem i migkalidtabun asal'a makatameng kanu manga igagama nilan.
14 Na saleta mambu na isa kanu manga panunugun ni Nabal i midtalu kanu kaluma nin a si Abigil sa “Napasugu sia si Daud kanu manga taw nin ebpun kanu tawan-tawan a dalepa ka pedsalamen nin su mapulu a si Nabal ugaid'a pinagkaya silan ni Nabal. 15 Inunta na su entu a manga taw na mapia i inipailay nilan sa lekami, da kami nilan pamungkaidani enggu da kami kadadagi kanu timpu nu kinadtatagapeda nami lu kanu tawan-tawan a dalepa. 16 Na magabi sa malamag na tinamengan kami nilan kanu kapedtameng'ami kanu manga bili-bili. 17 Tembu pagitung ka sa mapia u ngin i dait a enggulan nengka ka kagkaidan sekanin taman kanu sakambinabatan nin. Na mawag man a benal i palangay nin a taw tembu dala miug lun embitiala.”
18 Daka namagayas a benal si Abigil mapakua sa dua gatus timan a pan, dua timan a taguan a upis'a binatang a napenu na ig'a ubas, lima timan a sinumbali a bili-bili, saka saku a inilutu a bantad, magatus kaakup a ginangu a unga na ubas enggu dua gatus kaakup a ginangu a unga na igus. Entu pan ka inipalulan nin kanu manga kimar 19 sa nia nin pidtalu kanu manga panunugun nin na “Gemanat tanu, sia aku bu sa ulian nu.” Na da nin a benal i entu edtalua kanu kaluma nin a si Nabal.
20 Na gagalu nu sia sekanin sa lalan a migkuda sa kimar sia kanu kapembaba nin kanu ligid'u palaw na nailay nin su Daud apeg'u manga taw nin a pembaba bun. 21 Saleta mambu na su Daud na nia nin 'gkadtalu kanu manga taw nin na “Da katagan nu kinatameng tanu kanu manga kaaden ni Nabal sia kanu tawan-tawan a nia a dalepa asal'a dala madadag lun ka nia nin bu inisuli kanu mapia a entu a pinggula tanu na mawag. 22 Na ibpasad ku i mapita bun a entu na dala isama ku a apia sakataw a mama kanu sakambinabatan nin taman kanu manga panunugun nin. Na pangeni-ngenin ku i siksan aku nu Kadenan amaika di ku i entu enggulan.”
23 Na guna makadsupegaya si Abigil enggu su Daud na namagayas embaba si Abigil kanu kimar'in ka sinemugiud kanu adapan nu Daud 24 sa nia nin pidtalu na “Hu mapulu, pakikineg aku pan. Saki den i 'bpangaku kanu kalimbanan nu kaluma ku. 25 Na di ka den ibpamamantag sekanin ka mawag man a benal i palangay nin i nan a taw. Nadait-dait'a ngalan nin a nan a Nabal a nia nin maena na ‘Buneg.’ Ampun ka bu ka da ku mailay su manga sinugu nengka a entu kani Nabal. 26 Hu mapulu, pedsigulun ku i su Kadenan a Mapulu i migkahanda saguna sa di nengka katalus kanu kapedsuli nengka ka enggu di 'gkabudsengan su lima nengka. Na saguna na ipedsapa ku sa leka sia kanu adapan nu Kadenan a Mapulu i su langun nu kuntela nengka taman kanu langun nu pegkahanda sa leka sa mawag na mabinasa a mana bun kani Nabal. 27 Tembu u mapakay bu sa leka na talima ka i ibpagenggay ku a nia sa leka enggu kanu manga taw nengka. 28 Na 'bpangenin ku sa leka i ampun aku nengka kanu entu a kalimbanan ka 'gkadsisigulu ku man i pagkabagelen nu Kadenan a Mapulu su kandatu nengka taman pan kanu manga muliataw nengka kagina ipembunua nengka su manga kuntela nu Kadenan. Na ipangeni-ngeni ku i di ka katilan taman sa bibiag ka pan. 29 Su Kadenan nengka a Mapulu i kemelung sa leka kanu apia entain a miug mimatay sa leka. Tiakapan ka nin sa mana bun su kapedtiakap kanu balaalaga a tamuk ugaid'a su manga kuntela nengka menem na makaidtug sa mana bun su kinaidtug'u asad'u bitik. 30 Na amaika manggula den su langun nu kapianan a inibpasad'u Kadenan a Mapulu sa leka taman sa mabaluy ka den a datu nu manga taw a Israil 31 na dala andam'a ginawa nengka kagina dala makatalus su kapedsuli nengka enggu kaimatay nengka sa dala gaid sabap'in. Na amaika pambantasen ka den nu Kadenan a Mapulu na 'bpangenin ku sa leka i di ka lemipatani su panunugun nengka.”
32 Na nia inisumpat'u Daud kani Abigil na “Pugin su Kadenan a Mapulu a Kadenan nu manga taw a Israil ka sekanin i napasia sa leka asal'a makapagilaya ta. 33 Na palihalan ka nu Kadenan kanu mapia a nan a napagitung'engka. Ka sabap sa entu na da ku makatalus su kapedsuli ku enggu dala kabudsengi na lugu su lima ku. 34 Na u dala ka bu man pamagayas magilaya sa laki na pedsigulun ku sa leka sia kanu adapan nu Kadenan a Mapulu a Kadenan nu manga taw a Israil i mapita bun a entu na dala masama a mama kanu sakambinabatan ni Nabal taman kanu manga panunugun nin. Saben-sabenal a su Kadenan i sinemapal sa laki sa kanggula ku sa leka sa mawag.” 35 Na guna su maitu na tinalima nu Daud su manga inenggay ni Abigil sa nia nin lun pidtalu na “Uli ka den sa malilintad enggu di ka den 'bpelidua i ginawa nengka ka enggulan ku i pidtalu nengka a nan.”
36 Na guna makauli si Abigil na nia nin nauman na pedsela-sela si Nabal a mana su kapedsela-sela nu datu kanu pendatuan nin. Na sangat a 'gkapia a benal i ginawa ni Nabal enggu 'gkalangut a benal sekanin tembu dala babaya edtalua ni Abigil su entu sa lekanin. 37 Ugaid'a kanu mapita a naawa den su kapegkalangut'i Nabal na pidtalu den ni Abigil kani Nabal su langun nu entu a nanggula. Na sabap sa entu na nauma na sakit sa pusung si Nabal taman sa di den pakanggagalebek i lawas'in. 38 Na sekali pan inimatayan nu Kadenan a Mapulu na ulian pan nu nakasapulu gay.
39 Na guna makineg'u Daud i minatay den si Nabal na nia nin nadtalu na “Pugin su Kadenan a Mapulu, ka sinugat'in sa kawagib si Nabal sa kanu kinapagkaya nin sa laki enggu da nin isugut i makanggula aku sa mawag. Ka inipagedam man nu Kadenan a Mapulu sa lekanin su kawag'u palangay nin.”
Na guna maipus su entu na napasugu su Daud lu kani Abigil sa u mapakay na pangaluman nin sekanin. 40 Na guna makauma lu sa Karmil su manga sinugu na inisampay nilan den su entu sa nia nilan pidtalu na “Pinasia kami ni Daud ka ipabpelapit ka nin ka enggu ka nin mapangaluma.” 41 Daka sinemugiud si Abigil ka nia nin pidtalu na “Uway, pakaayun aku sa entu. Adil aku sa katiakap sa lekanin taman kanu manga panunugun nin.” 42 Na guna su maitu na namagayas si Abigil 'gkuda kanu kimar'in ka minunut kanu manga sinugu nu Daud. Na pinaunut'in su lima kataw a panunugun nin a babay. Na nagkaluma mambu nu Daud si Abigil.