Su da Kaimatay nu Daud kanu Saul
24
Na guna makambalingan su Saul sa kanu kinambunua nilan kanu manga taw a Pilistin na aden midtalu sa lekanin sa “Si Daud na lu sa tawan-tawan nu dalepa a In-Gidi.” 2 Daka namili su Saul sa telu ngibu a manga sundalu a taw a Israil ka pinangilay nilan su Daud enggu su manga taw nin lu kanu damawatu a pegkalebenan nu manga talaw a kambing a dala kigkuan lun. 3 Na nakauma silan lu kanu lugenan nu manga bili-bili lu kanu ligid'u lalan kanu isa a takub. Daka linemudep lu ba su Saul ka pakaudu. Na lu kanu ludep a benal'u entu a takub na lu ba su Daud enggu su manga taw nin. 4 Na nia pidtalu sa lekanin nu manga taw nin na “Nia den ba su pidtalu nu Kadenan a Mapulu a ipalad'in sa leka su kuntela nengka enggu seka i mataw u ngin i enggulan nengka lun a makagkapia kanu ginawa nengka.” Daka mibpapalanat semupeg su Daud kanu Saul ka minebis kanu sanggayad'u lambung'u Saul. Na da a benal katekawi nu Saul su entu. 5 Ugaid'a nakadsendit su Daud kanu kinaebis'in a entu kanu sanggayad'u lambung'u Saul 6 sa nia nin pidtalu kanu manga taw nin na “Pangenin ku kanu Kadenan a Mapulu i di nin sugutan sa aden manggula ku a dikena mapia kanu datu ku a pinamili nu Kadenan.” 7 Na sa kanu kinadtalu nu Daud sa nia na inibpaliugat'in kanu manga taw nin su di nilan kabunu kanu Saul. Na ginemanat mambu lu su Saul ka tinemalus kanu kabpelalakaw nin.8 Na da matana-tana na linemiu kanu takub su Daud ka tinawag'in su Saul sa “Hu datu a mapulu ku!” Na guna lengi su Saul na sinemugiud su Daud sa lekanin 9 sa nia nin pidtalu sa lekanin na “Ngintu ka 'bpalitialan nengka su pedtalun nu manga taw sa pegkahandan ku seka 'bpamungkaid? 10 Na saben-sabenal a nailay demun nu mata nengka saguna u panun i kinapalad'u Kadenan a Mapulu sa leka sia sa laki sa kanu nia ba a takub. Na nia pidtalu nu ped kanu manga taw ku na imatayan ku seka ugaid'a dala ku i entu enggula ka makin nia ku pidtalu kanilan na di ku pakasakitan su mapulu ku kagina sekanin i pinamili a datu nu Kadenan a Mapulu. 11 Ilay ka ba ama i inebis ku a nia kanu sanggayad'u lambung'engka. Na apia mapakay a imatayan ku seka na da ku i entu enggula. Na nia ba i amadan sa dala kahanda ku sa kapamungkaid ku sa leka atawa ka kagkuntela ku sa leka. Na apia dala kadupangan ku sa leka na 'bpaneleden aku nengka asal'a 'gkaimatayan nengka. 12 Na su Kadenan a Mapulu i mataw kemukum sa lekita dua enggu sekanin den i mataw semuli kanu papegkaidan nengka a nan sa laki. Ugaid'a saki na di ku seka pamungkaidanan. 13 Ka mana bun su palibasan paganay a ‘Nia bu enggula sa dikena mapia na su taw bun a dupang.’ Tembu di ku seka pamungkaidanan. 14 Entain aku ba a 'bpaneleden nu datu nu Israil? Mana aku bu man asu a minatay atawa ka kutu. 15 Na su Kadenan bu a Mapulu i mataw kemukum sa lekita u entain i aden kadupangan nin. Na namba ka madsima nu Kadenan i 'gkanggula ku a nia, na makapaninindeg aku nin enggu makalipuas aku kanu kapegkagaga nengka.”
16 Na guna makapasad edtalu su Daud na nia nadtalu nu Saul sa lekanin na “Seka i nan Daud a wata ku?” Daka nakauliang su Saul sa matanug 17 sa nia nin nadtalu sa lekanin na “Labi paman i kapia nengka a taw kumin sa laki ka apia mawag i papegkaidan ku sa leka na nia nengka bun ipedsuli sa laki na mapia. 18 Na kanu nia a gay na inipailay nengka su kapianan nengka sa laki ka apia inipalad aku den nu Kadenan a Mapulu sa leka na dala aku nengka bun matika mamungkaid. 19 Ka apia entain man a taw i mailay nin su kuntela nin na dili nin sugutan sa makalipuas. Na sabap kanu kapianan a nia a inipailay nengka sa laki saguna na balasan ka nu Kadenan a Mapulu. 20 Na saguna na katawan ku den i mabaluy ka a datu nu Israil enggu su kandatu nengka na mabagel. 21 Na idsapa nengka kanu ingala nu Kadenan a Mapulu i di nengka imatayan su manga muliataw ku ka enggu di mapunas su ngala nu sakambinabatan ku.” 22 Daka inidsapa den mambu nu Daud i entu kanu Saul. Entu pan ka minuli su Saul ugaid'a su Daud enggu su manga taw nin na mimbalingan kanu 'bpagenan nilan.