Su Kinalipuas'u Daud kanu Siudad a Kilah
23
Na aden nakadtalu kanu Daud sa “Linusudan nu manga taw a Pilistin su siudad a Kilah taman sa pinangua nilan su manga bantad lu kanu penggunuan lun.” 2 Daka nangadap su Daud kanu Kadenan a Mapulu sa nia nin pidtalu na “Ngintu, 'bpawangan ku su manga taw a Pilistin ka bunun ku?” Na nia inisumpat'u Kadenan sa lekanin na “Uway, 'bpawangi ka den silan ka bunu ka, ka ilipuas'engka su siudad a Kilah.” 3 Ugaid'a nia pidtalu nu manga taw nu Daud na “Ilay ka, apia nia tanu pamun sa dalepa a Yahuda na 'gkagilekan tanu den, na labi lawan den amaika lemu tanu sa siudad a Kilah asal'a kaatuan tanu su manga taw a nan a Pilistin.” 4 Na guna su maitu na nangadap 'bpaluman su Daud kanu Kadenan a Mapulu. Na nia pidtalu sa lekanin nu Kadenan a Mapulu na “Uway, ganat kanu den ka ipalad ku sa lekanu su manga taw a Pilistin kanu dalepa a Kilah.”5 Na ginemanat mambu su Daud apeg'u manga taw nin ka binunu nilan den su manga taw a Pilistin lu kanu siudad a Kilah. Na madakel a benal i minatay nilan taman sa pinangua nilan su manga pangangayamen lu enggu nakalipuas'ilan su manga taw sa siudad a Kilah.
6 Na kanu kinapalalaguy ni Abiatar a wata ni Ahimilik sa kinaunut'in kanu Daud lu sa siudad a Kilah na inanggit'in su pidsugan a balegkas sa kabpangurban.
7 Na saleta mambu na aden nakadtalu kanu Saul sa su Daud na lu sa siudad a Kilah. Na nia pidtalu nu Saul na “Inipalad den sekanin nu Kadenan sa laki kagina mana nin bun binilanggu i ginawa nin sa kanu kinaludep'in sa dalepa a nabalibet'a alad a aden alid'a pintuan nin.” 8 Daka inipatawag'u Saul su langun nu manga taw nin ka lemu sa siudad a Kilah ka enggu nilan mabunu su Daud apeg'u manga taw nin.
9 Na guna katawi nu Daud su dikena a entu mapia a kahanda nu Saul na pidtalu nin kanu 'bpangurban a si Abiatar i pananggiten lu sa lekanin su balegkas sa kabpangurban 10 ka mangadap sekanin kanu Kadenan sa nia nin pidtalu na “Hu Kadenan a Mapulu a Kadenan nu manga taw a Israil, nakauma kanu pakinegan nu panunugun nengka a nia su kahanda ni Saul sa kapedsia nin sa siudad a Kilah asal'a mabinasa nin sabap sa laki. 11 Na ngintu, benal ba su kapedsia nin? Ngintu, ipalad aku nu manga taw sa siudad a Kilah sa lekanin? Hu Kadenan a Mapulu a Kadenan nu manga taw a Israil, 'bpangenin ku sa leka i pakatawi ka kanu panunugun nengka su entu.” Na nia inisumpat'u Kadenan a Mapulu na “Uway, semia sekanin.”
12 Na inidsa menem'u Daud kanu Kadenan i “Ngintu, ipalad kami nu manga taw sa Kilah kani Saul?” Na nia inisumpat'u Kadenan a Mapulu sa lekanin na “Uway, ipalad kanu nilan.”
13 Na guna su maitu na minawa lu su Daud apeg'u manga taw nin a manga nem gatus i kadakel'in. Na nagalat-alat den silan kanu manga dalepa. Na guna makineg'u Saul i minawa su Daud lu sa siudad a Kilah na dala den sekanin talus lemu.
Su Kinalu nu Daud kanu Bakulud'u Tawan-tawan a Dalepa a Sip
14 Na midtangen su Daud lu kanu 'bpamagenan nin kanu bakulud'u tawan-tawan a dalepa a Sip. Na uman-uman gay na 'bpangilayn bu sekanin nu Saul ugaid'a di pedsugutan nu Kadenan a matun sekanin nu Saul.
15 Na kanu timpu a lu su Daud sa Huris kanu tawan-tawan a dalepa a Sip na natawan nin i pebpawangan sekanin nu Saul ka enggu nin kaimatayan. 16 Ugaid'a si Jonatan a wata nu Saul na pibpawangan nin su Daud ka pinagkabagel'in i manggiginawa nin sia kanu Kadenan a Mapulu 17 sa nia nin pidtalu sa lekanin na “Da ka 'gkagilek ka di ka man matun nu ama ku sa kaimatay nin sa leka ka mabaluy ka pan a datu nu manga taw a Israil enggu saki menem i mabaluy a mapulu sa langun nu 'gkangasaligan nengka. Na katawan man nu ama ku su entu.” 18 Daka minumbal menem silan sa kapasadan kanu adapan nu Kadenan a Mapulu. Entu pan ka minuli si Jonatan enggu su Daud menem na midtangen pan lu sa Huris.
19-20 Saleta mambu na su ped kanu manga taw a Sip na linemu sa Gibia ka pidtalu nilan kanu Saul i “Hu datu, si Daud na lu nagena sa lekami lu sa Huris kanu bakulud'u Akila a laya nu dalepa a Yisimun, na amaika pegkiug ka 'bpelu na lu ka, ka ipalad'ami sekanin sa leka.” 21 Na nia inisumpat'u Saul na “Palihalan kanu nu Kadenan a Mapulu kanu kinapailay nu a nan sa laki sa kapianan! 22 Na ganat kanu den enggu talanged'u u entain i nakailay lun enggu endaw sekanin nagena kagina mategel kun i akal'in. 23 Amad'u sa mapia u endaw sekanin 'bpamagena, ka amaika maamad'u den na embalingan kanu sia ka munut aku sa lekanu, ka u sia bu sekanin kanu lusud'u Yahuda na apia endaw sia na pangilayn ku man sekanin.”
24 Daka minuna den silan kanu Saul ka mimbalingan den silan sa Sip. Saleta mambu na su Daud enggu su manga taw nin na lu sa Araba kanu laya nu dalepa a Yisimun lu kanu tawan-tawan a dalepa nu Maun. 25 Na linemu su Saul enggu su manga taw nin ka pinangilay nilan lu su Daud. Na guna katawi nu Daud su entu na nagena sekanin kanu masela a watu kanu tawan-tawan a dalepa nu Maun. Na guna katawi nu Saul su entu na linemu menem ba sekanin ka pinangilay nin su Daud kanu tawan-tawan a dalepa nu Maun. 26 Na su Saul enggu su manga taw nin na lu sa bala nu palaw, na su Daud menem enggu su manga taw nin na lu menem kanu bala nu entu a palaw. Na saleta mambu na su Daud enggu su manga taw nin na 'bpamagayas a benal silan sa kapedtalaguy nilan ka 'gkasaut den silan nu Saul enggu su manga taw nin sa kapedsigkem'ilan lun. 27 Na saleta mambu na aden nakauma a sinugu sa edtalun nin kanu Saul i “Pamagayas kanu embalingan muli ka linusudan nu manga taw a Pilistin su dalepa tanu.” 28 Daka natelenan nu Saul maneled su Daud ka mimbalingan silan muli ka enggu nilan kaatuan su manga taw a Pilistin. Na sabap sa entu na binedtuan su entu a dalepa sa “Watu a Nalipuasan.” 29 Na iganat lu ba na tinemakedeg menem su Daud lu kanu dalepa a In-Gidi ka lu ba silan nagena.