Su Kinaunut'u manga Taw kanu Daud
22
Na minawa su Daud kanu dalepa a Gat ka linemu kanu takub a Adulam. Na guna katawi nu manga suled'in taman kanu manga pagali nu ama nin su entu na pibpawangan nilan sekanin. 2 Na minunut bun sa lekanin su manga taw a aden manga kamutuan nin, su manga taw a aden manga utang'in apeg'u manga taw a di masukul kanu manga atulan. Na nia kadakel'u manga taw a minunut lun na manga pat gatus kataw. Na su Daud i nabaluy a 'gkaunutan.3 Na ginemanat menem lu su Daud ka linemu sa dalepa a Mispa a sakup'u dalepa a Muab. Na nia nin pidtalu kanu datu nu Muab na “'Bpangenin ku sa leka i suguti ka sa makanggagalu sia 'gkaleben su ama ku enggu su ina ku gagalu na di ku pan 'gkatawan su kahanda nu Kadenan sa laki.” 4 Daka initabun nin den lu kanu datu nu Muab su manga lukes'in ka lu demun pan ba silan minggagalu 'gkaleben gagalu nu kabpamagena nu Daud.
5 Na aden isa a gay a pidtaluan nu Nabi Gad su Daud sa “Awa ka san kanu 'bpagenan nengka a nan ka lu ka kanu sakup'u kalupan nu Yahuda.” Daka minawa mambu su Daud lu ka linemu kanu damakayu nu dalepa a Hirit a sakup bun nu kalupan nu Yahuda.
Su Kinapangimatay nu Saul kanu 'Bpamangurban lu sa Nub
6 Na nakauma sa pakinegan nu Saul i natawan den u endaw su Daud apeg'u manga taw nin. Saleta mambu na su Saul na 'bpagagayan lu kanu atag'u kayu a tamaris kanu bakulud'u dalepa a Gibia a pegkapetan nin su dilek'in enggu nakabalibet sa lekanin a 'bpamedtindeg su 'gkangasaligan nin. 7 Daka nia pidtalu nu Saul kanu 'gkangasaligan nin a entu na “Pakikineg kanu, manga tupu nu Buniamin! Ngintu, 'bpagenggan kanu nu Daud sa manga 'bpangangawidan enggu pamumulanen a ubas? Baluyn kanu nin a 'gkangaunutan nu manga sundalu nin? 8 Ngintu, entu ba i sabap'in i kinapamagayun nu sa kasungkang'u sa laki? Ka dala demun midtalu sa laki sa su wata ku na mibpasadai kanu wata ni Yisi. Dala aku nu demun lati sa nanam ka dala nu edtalua sa laki sa su panunugun ku a su Daud na sinekat'u wata ku sa kasungkang'in sa laki taman sa pegkiugan aku nin saguna 'bpagimatay.”
9 Saleta mambu na si Duig a taw sa dalepa a Idum a isa kanu 'gkangasaligan nu Saul na pidtalu nin i “Kanu kinalu ku sa dalepa a Nub na nailay ku su wata ni Yisi a linemu kani Ahimilik a wata ni Ahitub. 10 Na nangadap si Ahimilik kanu Kadenan a Mapulu u ngin i dait a enggulan nu Daud. Inenggan nin pan sa makan enggu inenggay nin bun sa lekanin su sundang'i Gulayat a minatay den a taw a Pilistin.”
11 Sabap sa entu na inipatawag'u Saul si Ahimilik apeg'u sakambinabatan nilan a 'bpamangurban kanu dalepa a Nub 12 ka nia nin pidtalu kanilan na “Pakikineg aku nengka, wata ni Ahitub!” Daka nia mambu inisumpat'i Ahimilik na “Hu datu, 'bpakikinegen ku seka.” 13 Na nia pidtalu nu Saul sa lekanin na “Nginan ka nagayun kanu kanu wata ni Yisi sa kasungkang'u sa laki? Ka inenggan nengka sekanin sa makan enggu sundang. Nangadap ka pan kanu Kadenan sabap sa lekanin. Di nengka 'gkatawan i 'bpagitungen nin i kaimatay nin sa laki?”
14 Na nia inisumpat'i Ahimilik na “Hu datu, dikena ba mamanugang sekanin sa leka enggu sekanin bun i matidtu sa langun kanu manga taw nengka? Na liu pan sa entu na sekanin bun i 'gkaunutan nu manga sundalu nengka enggu sangat a 'bpagadatan sekanin nu manga taw nengka. 15 Dikena i nan i muna-muna a kinapangadap ku kanu Kadenan sabap sa lekanin. Hu datu, 'bpangenin ku sa leka i di ka pedtempui su panunugun nengka a nia taman kanu sakambinabatan nu ama ku sabap kanu entu kagina dala a benal sabut ku amaika aden taw a pegkiug pedsungkang sa leka.”
16 Na nia inisumpat'u Saul na “Natalatantu a matay ka Ahimilik taman kanu sakambinabatan nu ama nengka.” 17 Daka pidtalu nu Saul kanu 'gkangasaligan nin i “Imatayi nu i 'bpamangurban a nia kanu Kadenan a Mapulu kagina nagayun silan kani Daud. Na apia katawan nilan bun i minawa si Daud na da nilan edtalua sa laki.” Ugaid'a dala imatayi nu 'gkangasaligan nu datu su 'bpamangurban kanu Kadenan a Mapulu. 18 Daka nia pidtalu nu Datu Saul kani Duig a taw a Idum na “Imatayi ka su 'bpamangurban.” Na pinangimatayan mambu ni Duig su 'bpamangurban a nakambalegkas pamun kanu balegkas'ilan sa kabpangurban. Na walupulu enggu lima kataw i minatay nin a 'bpangurban kanu entu ba a gay. 19 Na pinaimatayan bun nu Saul su langun nu taw a pegkaleben lu sa Nub a dalepa nu 'bpamangurban magidsan pan i babay-mama, wata enggu apia bagu pimbata taman den kanu manga sapi, kimar enggu manga bili-bili nilan.
20 Ugaid'a si Abiatar a isa kanu manga wata ni Ahimilik na nakapalalaguy taman sa minunut sekanin kanu Daud. 21 Na pinanudtul'in sa lekanin i pinaimatayan nu Saul su 'bpamangurban kanu Kadenan a Mapulu. 22 Na nia inisumpat'u Daud kani Abiatar na “Na kanu kinailay ku man kani Duig a taw a Idum sa kanu kinalu ku kani Ahimilik na katawan ku den i manudtul sekanin kani Saul. Tembu saki i sabapan nu kinapatay nu sakambinabatan nengka. 23 Na sia ka demun sa laki ka isa bu man i pegkiug 'bpagimatay sa lekita. Na da ka 'gkagilek ka dala man manggula nengka a mawag ka kaped aku nengka.”