Su Kinalu nu Daud kani Ahimilik sa Dalepa a Nub
21
Na linemu su Daud kanu 'bpangurban a si Ahimilik lu kanu dalepa a Nub. Na guna mailay ni Ahimilik su Daud a pakauma na kinegkel'a gilek sa nia nin lun nakaidsa na “Nginan ka dala ped'engka? Dala minunut sa leka?” 2 Na nia inisumpat'u Daud sa lekanin na “Aden inisugu nu datu sa laki enggu inidsasana nin i di ku a benal edtalun kanu apia entain su tangga ku sia. Na su manga taw ku na pidtaluan ku den silan sa mamagilaya kami bu kanu isa a dalepa. 3 Na aden san makan? Mapakay a kaenggan aku nengka sa lima timan bu a pan atawa ka apia ngin den i aden san?” 4 Na nia inisumpat'i Ahimilik kanu Daud na “Dala den pan sia a mana su 'gkadsalilidan, ka nia bu aden sia na su pan a inigkurban kanu Kadenan. Na kapakayan a inggay ku i nia sa leka enggu kanu manga taw nengka amaika da silan makambalagiuma.” 5 Na nia inisumpat'u Daud kani Ahimilik na “Saben-sabenal a di nami pendulugen su kaluma nami amaika aden lakaw nami. Apia su katatapan bu a lakaw nami na dili nami penggulan i entu ka enggu kami di 'gkabatal. Na labi den basi saguna a balapantag a benal i lakaw nami.” 6 Daka inenggay den mambu ni Ahimilik su pan a inigkurban kanu Kadenan a Mapulu kagina da den ped a pan lu a mana su katatapan. Na su entu ba a pan na bagu pamun i kinakua nin lun kanu binetadan lun a lu kanu adapan nu Kadenan ka sinambian nin sa bagu a pan.7 Na saleta mambu na kanu entu ba na su 'gkaunutan nu patutuganul kanu manga pangangayamen nu Saul a si Duig a taw a Idum na lu natabu ka nangadap sekanin kanu Kadenan a Mapulu.
8 Na inidsa nu Daud kani Ahimilik i “Aden san sundang'engka atawa ka dilek? Kagina da aku makapananggit sa sundang atawa ka apia ngin a matalem ka nasasawan aku kanu kinasugu nu datu.” 9 Na nia inisumpat'i Ahimilik sa lekanin na “Dala, nia bu matalem sia na su sundang'i Gulayat a taw a Pilistin a inimatayan nengka lu kanu kadatalan nu dalepa a Ila. Pinutus sa ginis a nan nakabetad kanu taligkudan nu pidsugan a balegkas'u 'bpangurban. Na amaika 'gkalinian nengka, na kua ka den a nan.” Daka nia pidtalu nu Daud sa lekanin na “Isia nengka a nan ka dala pagidsan nu nan.”
Su Kinapalalaguy nu Daud kanu Dalepa a Gat
10 Na kanu entu bun ba a gay na ginemanat bun su Daud lu ka 'bpalaguyan nin bun su Saul. Na linemu sekanin kani Akis a datu nu dalepa a Gat. 11 Na nia pidtalu nu 'gkangasaligan nu Datu Akis sa lekanin na “Dikena ba sekanin su Daud a pendatu kanu dalepa nilan enggu binadtug pan sekanin nu manga babay kanu kapedsagayan'ilan enggu kapedsengal'ilan sa
‘Ngibu-ngibuan i minatay ni Saul enggu puluan ngibu i minatay ni Daud’?”
12 Na initagu sa ginawa nu Daud su manga pidtalu nilan a entu tembu nagilekan sekanin kani Datu Akis. 13 Daka nagigiling sekanin sa buneg enggu pinangambang'in su pintuan nu bengawan nu siudad enggu pinaigis'in su yug'in. 14 Na guna su maitu na nia pidtalu ni Datu Akis kanu 'gkangasaligan nin na “Ilay nu, buneg i mama a nan! Ngintu ka pidtapik'u pan sekanin sia? 15 Ngintu kulang pamun besen i buneg sia kanu dalepa tanu ka pidtapik'u pan i nan sia kanu walay ku?”