Su Kinatabang'i Jonatan kanu Daud
20
Na minawa su Daud kanu dalepa a Nayut a sakup'u Rama ka linemu kani Jonatan. Na nia nin pidtalu kani Jonatan na “Ngin i nanggula ku atawa ka ngin i kadupangan ku kanu ama nengka? Ngintu, nasungkang ku sekanin ka pegkiugan aku nin 'bpagimatay?” 2 Na nia inisumpat'i Jonatan sa lekanin na “Pakawatan ka i entu a manggula! Di ka man matay ka manaut-matiwalu a pegkahandan nu ama ku na pedtalun nin sa laki. Na amaika pegkahandan nin i kaimatay nin sa leka na edtalun nin i entu sa laki. Tembu dili manggula su entu.” 3 Ugaid'a nia pidtalu nu Daud na “Su ama nengka na katawan nin a benal i kadalem'u kabpakat ta tembu di nin edtalun sa leka su makapantag sa entu ka makalidu pan kanu ginawa nengka. Ugaid'a pedsigulun ku sa leka sia kanu adapan nu Kadenan a Mapulu i 'gkapaidusaman a benal samaya i umul ku.” 4 Daka nia pidtalu ni Jonatan kanu Daud na “Edtalu ka sa laki u ngin i pegkiugan nengka a enggulan ku asal'a katabangan ku seka.”5 Na nia inisumpat'u Daud sa lekanin na “Dikena ba namag na kanduli nu bagu a ulan-ulan? Na sigulu a paamungen aku keman nu datu kanu entu a kanduli. Nia guna mapia na makapagena aku lu kanu 'bpangangawidan iganat saguna taman sa namisendaw. 6 Na amaika pangilayn aku nu ama nengka na nia ka edtalu sa lekanin na ‘Pinamagayukan aku nin sa paulin ku pan sekanin lu sa Bitlihim kanu dalepa nin kagina uman lagun na pegkurban silan lu a kaped'in su langun nu sakambinabatan nilan.’ 7 Na amaika di sekanin malipunget na nia nin maena na dala 'bpagitungen nin sa laki a mawag, ugaid'a amaika malipunget sekanin na nia nin maena na 'bpagitungan aku nin sa mawag. 8 Na u masulut bu sa leka na enggula ka i nia a kapianan nengka sa laki a mana bun su inumbal'engka a kapasadan sa laki sia kanu adapan nu Kadenan a Mapulu. Ugaid'a amaika saben-sabenal a aden kadupangan ku na di aku nengka den 'bpananggita lu kani ama nengka ka seka den i imatay sa laki.”
9 Na nia inisumpat'i Jonatan sa lekanin na “Pakawatan ka i entu a manggula, ka amaika katawan ku man i pegkahandan ka nu ama ku 'bpagimatay na isampay ku sa leka mamagayas.” 10 Daka nia pidtalu nu Daud kani Jonatan na “Panun i kataw ku lun u 'gkalipunget su ama nengka atawa ka dili?” 11 Na nia inisumpat'i Jonatan sa lekanin na “Sia ka, ka lemu ta kanu 'bpangangawidan.” Daka linemu den mambu silan.
12 Na nia pidtalu ni Jonatan kanu Daud na “Ipebpasad ku kanu Kadenan a Mapulu a Kadenan nu manga taw a Israil i namag atawa ka namisendaw sa maya bun ba a kutika na imbitiala ku su ama ku. Na amaika di ka nin den 'gkasakitan na ginawa na edtalun ku sa leka su entu. 13 Ugaid'a amaika pegkahandan nin pamun i kaimatay nin sa leka na ibpasad ku i tabangan ku seka asal'a makaawa ka. Na amaika di ku tumanen su entu a pasad ku na siksan aku nu Kadenan sa mapasang. Na ipangeni-ngeni ku kanu Kadenan sa tapiden ka nin sa mana bun kanu kinatapid'in kanu ama ku. 14 Na amaika bibiag aku pamun kanu timpu a kandatu nengka na ipailay nengka sa laki su senep sa atay a kapegkalimu a ebpun kanu Kadenan a Mapulu. Ugaid'a amaika menem ka minatay aku den 15 na lu nengka ipailay su senep sa atay a kapegkalimu nengka kanu muliataw ku taman sa taman apia mauma pan su timpu a ibpeden den mimatay nu Kadenan a Mapulu su langun nu kuntela nengka.” 16 Na guna su maitu na minumbal si Jonatan sa kapasadan kanu Daud taman sa kanu muliataw nu Daud sa nia nin pidtalu na “Amaika di kanu edtuman kanu nia a kapasadan ta na pangenin ku kanu Kadenan a Mapulu i katabanan kanu nu kuntela nu.”a 17 Na pinadsapa menem'i Jonatan su Daud sia kanu kapegkalimu nin kani Jonatan kagina inikalimu nin a benal su Daud a mana bun kanu ginawa nin.
18 Daka nia nin pidtalu kanu Daud na “Namag a entu na kanduli nu bagu a ulan-ulan na mapangilay ka, ka dala ka lu kanu ayanan nengka. 19 Na namisendaw na lu ka kanu 'bpangangawidan a pinagenan nengka paganay ka lu ka demun kanu taligkudan nu watu a bedtuan sa Isil. 20 Na nia ku kauma lu na musug aku sa makatelu kanu ligid'u watu sa mana aden pedtinduan ku. 21 Entu pan ka semugu aku sa wata a mangilay kanu manga asad a inibusug ku, na amaika edtalun ku lun i lu bun kanu ubay nin na liu ka kagina masigulu ku sa leka sia kanu adapan nu Kadenan a Mapulu i dala manggula nengka a mawag. 22 Ugaid'a amaika nia ku edtalun kanu wata i lu pan tampal sa unan na nia nin maena na palalaguy ka den ka papebpalalaguyn ka nu Kadenan a Mapulu. 23 Na makapantag menem kanu pidsapan ta na nia ka tanudi na su Kadenan a Mapulu i saksi sa entu taman sa taman.”
24 Daka pinggula den mambu nu Daud su entu. Na saleta mambu na nauma den su gay a kapegkanduli kanu bagu a ulan-ulan na kineman su Saul kanu entu a kanduli. 25 Na lu bun sekanin minayan kanu 'bpagagayanan nin kanu ligid'u lending. Na si Jonatan menem na lu nagagayan kanu kasangulan nin enggu si Abnir menem na lu kanu ubay nin. Ugaid'a su 'bpagagayanan nu Daud na dala taw nin. 26 Na dala den 'gkenua nu Saul i dala lu su Daud kagina nia nin napagitung na “Basi aden nanggula ni Daud a nakaharam sa lekanin a dili makadait kanu nia a kapegkanduli.” 27 Ugaid'a kanu ikadua nin gay kanu entu ba a ulan-ulan na dala bun taw nu 'bpagagayanan nu Daud. Daka inidsa nu Saul kani Jonatan i “Ngintu ka dala makatalabuk sia su wata ni Yisi iganat pan kagay taman saguna?” 28 Na nia inisumpat'i Jonatan sa lekanin na “Namagayuk sekanin sa laki sa muli pan sekanin lu sa Bitlihim 29 sa nia nin pidtalu sa laki na ‘Pauli aku pan ka pegkurban su sakambinabatan nami, ka inibpaliugat'u kaka ku i makaamung aku kanu entu a kapegkurban. Na 'bpangenin ku sa leka i suguti aku sa madtagapeda ku silan.’ Na entu ba i sabapan a dala nin katalabuk sia.”
30 Na sabap sa entu na nalipungetan nu Saul si Jonatan taman sa nia nin lun pidtalu na “Mategas i ulu nengka a wata! Katawan ku man i pedtampilan nengka si Daud a wata ni Yisi. Pinagkaya nengka su ginawa nengka taman kanu ina nengka kanu namba a pinggula nengka. 31 Na taman sa bibiag paman si Daud a wata ni Yisi na di ka makandatu. Tembu anggit ka sekanin sia ka enggu 'gkaimatayan.” 32 Na nia inisumpat'i Jonatan kanu ama nin na “Ngintu ka dait a imatayan sekanin? Ngin i pinggula nin a mawag?” 33 Daka tinumbuk sekanin nu ama nin sa dilek ugaid'a dala sekanin masugat. Na sabap sa entu na natawan ni Jonatan i pegkiugan a benal 'bpagimatay nu ama nin su Daud. 34 Na midtindeg si Jonatan a sangat a 'gkalipunget enggu dala kan sekanin kanu entu ba a gay ka migkalat a benal i ginawa nin sabap kanu dikena a entu mapia a kapapegkaid'u ama nin kanu Daud.
35 Na kanu mapita na linemu si Jonatan kanu 'bpangangawidan a nambitialan nilan kanu Daud enggu aden pinaunut'in a wata a mama. 36 Na nia nin pidtalu kanu wata na “Palalaguy ka, ka pangilay ka su ipembusug ku a nia.” Na minusug den mambu si Jonatan enggu nalalaguy den mambu su wata. 37 Na guna makauma su wata kanu natanan nu asad'u busug'in na linemalis si Jonatan sa “Lu pan tampal sa unan!” 38 Na inilalis'in pamun edtalu i “Pamagayas ka den, da ka den 'bpagangga!” Na pinamundut den mambu nu wata su entu ka inenggay nin kani Jonatan. 39 Ugaid'a dala a benal sabut'u wata makapantag kanu entu a napagayunan, ka nia bu mataw sa entu na si Jonatan enggu su Daud. 40 Guna su maitu na inenggay ni Jonatan kanu wata su busug'in enggu nia nin lun pidtalu na “Anggit ka i nia ka embalingan ka den kanu siudad.”
41 Na guna makaganat su wata na linemiu su Daud kanu pinagenan nin a watu ka sinemugiud sa nakatelu. Entu pan ka migkakepa silan taman sa nakapagulianga silan ugaid'a matanug a benal i uliang'u Daud. 42 Daka nia pidtalu sa lekanin ni Jonatan na “Ganat ka den sa malilintad kagina su Kadenan a Mapulu i nakadsaksi kanu kinadsapai ta dua taman den kanu manga muliataw ta taman sa taman.” Na ginemanat den mambu su Daud enggu si Jonatan menem na mimbalingan den kanu siudad.