Su Kabpagimatay nu Saul kanu Daud
19
Na pidtalu nu Saul kanu wata nin a si Jonatan enggu kanu langun nu 'gkasaligan nin i imatayan nilan su Daud. Ugaid'a sangat a 'gkasuatan ni Jonatan su Daud. 2 Tembu pidtalu ni Jonatan sa lekanin i “Pangingat ka, ka pegkiugan ka 'bpagimatay nu ama ku a si Saul. Na namag sa mapita na pangilay ka sa kapagenan nengka enggu lu ka demun ba 3 ka edtapiken ku su ama ku lu sa ubay nu 'bpagenan nengka ka imbitiala ku sekanin makapantag sa leka. Na edtalun ku sa leka u ngin i nambitiala nami.”4 Na kanu temundug a gay na inimbitiala den ni Jonatan su ama nin makapantag kanu kapianan nu Daud sa nia nin pidtalu na “Ama, di ka papegkasakiti si Daud a panunugun nengka kagina da pinggula nin sa leka a mawag. Nia pan mula na madakel i kapianan a pinggula nin sa leka, 5 inidtawakal'in i ginawa nin kanu kinaimatay nin kanu taw a Pilistin a si Gulayat taman sa tinabangan nu Kadenan a Mapulu su manga taw a Israil sa kinapanaban nilan. Na nailay nengka i entu enggu nakapia i entu kanu ginawa nengka. Na ngintu ka enggulan nengka sa mawag su taw a dala pinggula nin sa leka a mawag enggu 'bpagimatayan nengka sekanin sa dala sabap'in?”
6 Na pinakikineg mambu nu Saul su entu a kadtalu ni Jonatan enggu midsapa sekanin kanu Kadenan a Mapulu sa di nin den imatayan su Daud. 7 Na daka pibpawangan ni Jonatan su Daud ka pinanudtul'in sa lekanin su langun nu entu. Na guna su maitu na iniadap'in menem su Daud kanu Saul taman sa mimbalingan su Daud kanu galebek'in a mana bun su katatapan a galebekan nin.
Su Kinatabang'i Mikal kanu Daud
8 Na mimbunua menem su manga taw a Pilistin enggu su manga taw a Israil. Na pinangunanan nu Daud su manga taw nin kanu kinambunua nilan taman sa madakel i minatay kanu manga taw a Pilistin enggu su ped kanilan na namakadtatalaguy.
9 Aden isa a gay gagalu nu kabpagagayan nu Saul lu kanu walay nin a pegkapetan nin bun su dilek'in na pinaasukan menem sekanin nu Kadenan a Mapulu sa saitan a papegkapasang lun. Na saleta mambu na su Daud na lu bun a pegkukutiapi. 10 Daka tinekawan demun temumbuk'u Saul kanu dilek'in su Daud ka ipedtapi nin kanu lending ugaid'a dala sekanin masugat ka nasipatan nin tembu lu bu nakasugat kanu lending su dilek. Na kanu entu bun ba a magabi na minawa su Daud.
11 Na guna su maitu na napasugu su Saul sa makapanininting kanu Daud lu kanu walay nin ka enggu nin kaimatayan kanu temundug a gay. Ugaid'a pidtaluan nu kaluma nin su Daud sa “Amaika di ka mawa saguna na namag a entu na matay ka.” 12 Daka initudtun nu kaluma nin a si Mikal kanu paliungan ka pinaawa nin. 13 Entu pan ka kinemua si Mikal sa pegkakadenanen ka pinaiga nin lu kanu 'bpagigan ka tinangguban nin enggu binetadan nin sa bumbul'a kambing su ulu nu entu.
14 Na guna makauma su manga sinugu nu Saul a pedsigkem kanu Daud na nia pidtalu ni Mikal kanilan na “Di 'gkapia i ginawa nin.”
15 Na guna makineg'u Saul su entu, na pinambalingan nin silan ka nia nin pidtalu na “Sapuat'u den apeg'u 'bpagigan nin ka anggit'u sekanin sia sa laki ka enggu ku 'gkaimatayan.” 16 Na guna su linemudep den su manga sinugu nu Saul kanu 'bpagigan nu Daud na nia lu kanu 'bpagigan na su pinaiga a pegkakadenanen a binetadan sa bumbul'a kambing i ulu nin. 17 Daka nia pidtalu nu Saul kani Mikal na “Ngintu ka pinagakalan aku nengka? Pinaawa nengka su kuntela ku.” Na nia inisumpat'i Mikal sa lekanin na “Kagina pidtalu nin sa laki i imatayan aku nin amaika di ku sekanin paawan.”
18 Na saleta mambu na su Daud na nakaawa den. Na lu sekanin mibpawang kanu Samuil kanu dalepa a Rama enggu pinanudtul'in lun su langun nu pinakaidan sa lekanin nu Saul. Na guna su maitu na linemu silan sa dalepa a Nayut ka lu ba silan migkakaleben. 19 Na aden nakadtalu kanu Saul sa “Si Daud na lu sa Nayut a sakup'u dalepa a Rama.” 20 Daka sinemugu menem su Saul sa makasigkem lu kanu Daud. Na guna makauma su manga sinugu nin a entu na nia nilan nauman na su manga nabi a pebpayag kanu kadtalu nu Kadenan a nia 'bpangunanan sa kanilan na su Samuil. Ugaid'a linangkapan nu Ruh nu Kadenan su manga sinugu nu Saul tembu apeg'ilan na nakaamung mayag kanu kadtalu nu Kadenan. 21 Na guna makineg'u Saul i entu a nanggula na sinemugu menem sekanin sa ped, ugaid'a maitu bun ba i nanggula nilan. Daka sinemugu menem sekanin sa ped, na ikatelu den i nia a sinugu nin ugaid'a maitu bun ba i nanggula nilan, nakaamung bun silan mayag kanu kadtalu nu Kadenan. 22 Na guna su maitu na nia den linemu sa Rama na su Saul. Na guna sekanin makauma kanu masela a kalut kanu dalepa a Siku, na inidsa nin kanu manga taw lu i “Endaw matun si Samuil enggu si Daud?” Na aden sinemumpat sa “Lu silan sa Nayut kanu sakup'u dalepa a Rama.” 23 Daka linemu su Saul sa Nayut. Na gagalu nu sia sekanin sa lalan na linangkapan sekanin nu Ruh nu Kadenan tembu taman sa kinauma nin sa dalepa a Nayut na pebpayag bu sekanin kanu kadtalu nu Kadenan. 24 Na linuwas'in su balegkas'in ka minayag pamun sekanin kanu kadtalu nu Kadenan kanu adapan nu Samuil. Na kanu nagagabian enggu nalalamagan na miniga bu sekanin kanu lupa a dala balegkas'in. Na guna su maitu na nia 'gkangadtalu nu manga taw na “Ngintu, nabaluy den a nabi si Saul?”