Su Kinabpakat'i Jonatan enggu su Daud
18
Na guna makapasad embitiala su Daud enggu su Saul na nasuatan a benal sekanin ni Jonatan taman sa nakabpakat a benal silan. Na inikalimu a benal'i Jonatan su Daud sa mana bun kanu ginawa nin. 2 Na iganat sa entu ba na lu den pinagkakaleben nu Saul su Daud ka dala nin den paulia lu kanu ama nin. 3 Na kagina ka inikalimu a benal'i Jonatan su Daud sa mana bun kanu ginawa nin na minumbal silan sa kapasadan. 4 Daka linuwas'i Jonatan su lambung'in ka inenggay nin kanu Daud. Inenggay nin bun su balegkas'in sa kapembunua, su sundang'in, su busug'in enggu su sabitan nin.5 Na saleta mambu na su langun nu ipapenggalebek'u Saul kanu Daud na pembantas. Tembu binaluy sekanin nu Saul a mapulu sa langun nu manga sundalu nin. Na nasuatan su entu nu manga sundalu nin taman kanu 'gkangasaligan nu Saul.
Su Kinapangalikud'u Saul kanu Daud
6 Na guna su 'bpaguli silan ebpun kanu kinaimatay nu Daud kanu taw a entu a Pilistin a si Gulayat na inalaw nu manga babay a ebpun kanu langun nu 'gkasakupan nu Israil su Datu Saul. Na pidsakaw-sakaw nilan sekanin sa ukit a kinadsasagayan nilan enggu kinadsesengal'ilan a aden manga tambul'in enggu kutiapi. 7 Na nia nilan ipedsengal-sengal kanu entu a sangat a 'gkangagalaw silan na “Ngibu-ngibuan i minatay ni Saul enggu puluan ngibu i minatay ni Daud.” 8 Na guna makineg'u Saul su pedsengalen nilan a entu na sangat a nalipunget sekanin sa nia nin nadtalu kanu ginawa nin na “Nia nilan pedtalun na puluan ngibu i minatay ni Daud na laki kun na ngibu-ngibuan bu. Nia bu sama na sekanin den i kilalan nilan a datu.” 9 Na iganat kanu entu ba a gay na pedsipatan den nu Saul su Daud.
10 Na kanu tinemundug a gay na pinaasuk menem'u Kadenan kanu Saul su saitan a papegkapasang sa lekanin. Na sabap sa entu na pakailing sekanin sa buneg lu kanu walay nin. Saleta mambu na su Daud na pegkukutiapi a mana bun su katatapan a penggulan nin kanu uman-uman gay enggu su Saul menem na pegkapetan nin su dilek'in. 11 Daka tinumbuk'in su Daud kanu dilek'in ka nia nin kahanda na makatapi kanu lending ugaid'a dala masugat su Daud ka nasipatan nin. Na nakadua i entu nanggula.
12 Na ipegkagilek den nu Saul su Daud kagina pedtapiden nu Kadenan a Mapulu su Daud ugaid'a sekanin na di den pedtapiden nu Kadenan a Mapulu. 13 Tembu initangka nin su Daud ka inumbal'in a 'gkaunutan nu manga sangibu a sundalu. Na pinangunanan mambu nu Daud su entu a manga sundalu. 14 Na pembantas su langun nu penggulan nu Daud kagina pedtapiden sekanin nu Kadenan a Mapulu. 15 Na guna menem mailay nu Saul i sangat a pembantas su Daud na makin naisegan su kapegkagilek'in lun. 16 Ugaid'a su manga taw a Israil enggu su manga taw a Yahuda a ebpun bun kanu tupu nu Israil na sangat a 'gkasuatan nilan su Daud kagina 'bpangunanan nin silan sa kapembunua.
Su Kinagkaluma nu Daud kani Mikal
17 Na guna su maitu na nia pidtalu nu Saul kanu Daud na “Amaika ipaamad'engka sa laki i mategel i kambunua nengka kanu manga kuntela nu Kadenan a Mapulu na ipagkaluma ku sa leka su kaka sa langun a wata ku a si Mirab.” Na nia 'gkatagu sa ginawa nu Saul sa entu na “Kanu maya ba a ukit na dikena den saki i makapatay lun ka su manga taw den a Pilistin.” 18 Na nia inisumpat'u Daud kanu Saul na “Entain aku enggu su nabpunan ku a pamilia a taw a Israil a mapakay a makapamamanugang kanu datu?” 19 Ugaid'a apia ka maitu na guna mauma su gay a kapangaluma nu Daud kani Mirab, na inipagkaluma nu Saul si Mirab kani Adril a taw sa Mihula.
20 Saleta mambu na su sakataw a wata a babay nu Saul a si Mikal na 'gkalinian nin su Daud, na guna katawi nu Saul su entu na napia i ginawa nin. 21 Na nia natagu sa ginawa nin na “Ipagkaluma ku kanu Daud si Mikal ka enggu mabaluy sekanin a makaepan ku sa lekanin. Na amaika maitu na matay nu manga taw a Pilistin su Daud.” Guna su maitu na pidtalu nu Saul kanu Daud i “Mapakay pamun a makapamanugang ka sa laki.” 22 Na inipasugu pamun nu Saul kanu 'gkangasaligan nin sa idtalipulu nilan imbitiala su Daud sa nia nin lun edtalun na “'Gkasuatan ka nu datu apeg'u 'gkangasaligan nin tembu saguna na mapakay ka den a makapamanugang kanu datu.”
23 Daka inisampay nilan den mambu su entu kanu Daud. Na nia mambu inisumpat'u Daud sa kanilan na “Nia nu kataw ka malemu i kapamanugang kanu datu? Miskinan aku bu enggu dikena aku badtug.” 24 Daka inisampay menem'u 'gkangasaligan kanu Saul su kadtalu a entu nu Daud. 25 Daka nia pidtalu nu Saul sa kanilan na “Edtalu nu kanu Daud i nia ku bu 'bpangenin sa lekanin a sunggudan kanu wata ku na mimatay sa magatus a taw a Pilistin ka kuan su pundu nu upis'u sangulan nilan. Na kanu maitu ba a ukit na makasuli nin su datu kanu manga kuntela nin.” Nia kahanda nu Saul sa entu na asal'a kaimatayan nu manga taw a Pilistin su Daud. 26 Na guna madtalu nu 'gkangasaligan nu Saul su entu kanu Daud na sangat a nasuatan nin su entu kagina pegkiugan nin a benal a makapamanugang kanu datu. Na unan pan nu kapupus'u kutika a inenggay kanu Daud na pinggula nin den su entu 27 ka linusudan nin den a kaped'in su manga taw nin su manga taw a Pilistin. Na nia kadakel'u minatay nilan na dua gatus kataw. Na pinangua nin su pundu nu upis'u sangulan nu manga taw a entu a minatay nilan ka inanggit'in kanu datu. Na guna su maitu na inipagkaluma den mambu nu Saul si Mikal kanu Daud.
28 Ugaid'a guna mapagitung'u Saul i su Daud na pedtapiden nu Kadenan a Mapulu enggu si Mikal menem na 'gkalinian nin a benal su Daud 29 na makin nalunsanan su kinagilek'u Saul. Na iganat kanu entu ba na pegkuntelan nin den su Daud.
30 Na saleta mambu na su 'gkangaunutan nu manga taw a Pilistin na 'bpamelusudan nilan bun su manga taw a Israil. Na uman silan 'bpelusud na 'gkailay su kategel'u Daud sa kambunua kumin kanu ped a 'gkangaunutan nu manga sundalu nu Saul. Tembu su Daud na sangat a nabadtug sekanin.