Su Kinambunua ni Gulayat enggu Daud
17
Na su manga taw a Pilistin na linimud'ilan su manga sundalu nilan ka nagadil silan sa kapembunua kanu dalepa a Suku a sakup'u Yahuda. Na lu silan migkampu sa kanu dalepa a Ipisdamim a pageletan nu dalepa a Suku enggu Asika. 2 Na su Saul menem enggu su manga sundalu nin a taw a Israil na lu silan migkampu kanu pageletan nu bakulud'u dalepa a Ila. Na migkuyug-kuyug silan sa kanu kapembunua nilan kanu manga taw a Pilistin. 3 Na saleta mambu na su manga taw a Pilistin na lu kanu sabala a bakulud enggu su manga taw menem a Israil na lu menem kanu sabala a bakulud. Nabpageletan silan na kadatalan.4 Na lu kanu kampu nu manga taw a Pilistin na aden linemiu a mama a badtug sa kambunua nin a nia nin ngala na Gulayat. Na ebpun sekanin kanu dalepa a Gat enggu nia nin kalambeg na manga sapulu takap. 5 Na aden kelung'u ulu nin a galang enggu aden bun kelung'u laleb'in a galang bun a nia nin kaugat na manga nempulu kakilu. 6 Na su kelung'u lisen nin enggu su gelat a nakatagkip kanu waga nin na galang bun. 7 Na su sungan nu dilek'in na masela enggu su galangan nin na putaw a nia nin kaugat na manga pitu kakilu. Na nia 'bpangunanan sa lekanin na su 'bpananggit kanu kelung'in. 8 Na ibpananawag'in kanu manga sundalu a taw a Israil a migkuyug-kuyug i “Dikena ba sinemupeg kanu sia asal'a makambunua? Saki na taw a Pilistin, na sekanu menem na manga panunugun nu Saul, na pamili kanu san sa mama a magkuntela ku. 9 Na amaika katabanan aku nin taman sa matay aku nin na mabaluy kami nu a manga ulipen, ugaid'a amaika sekanin menem i katabanan ku taman sa matay ku sekanin na sekanu menem i mapangungulipen nami.” 10 Na nia nin pan pidtalu na “Sekanu san langun a manga sundalu nu Israil a migkuyug-kuyug na pamili kanu sa makaatu sa laki ka enggu kami makambunua.” 11 Na guna makineg'u Saul apeg'u manga sundalu nu manga taw a Israil su entu a katigan ni Gulayat na nalubayan i manggiginawa nilan enggu sangat a nagilekan silan.
12 Na nia ama nu Daud na si Yisi a ebpun kanu tupu nu Iprat a taw sa Bitlihim kanu kasakupan nu dalepa a Yahuda, na aden walu kataw a wata nin a manga mama. Na kanu timpu nu kapendatu nu Saul na matua den gaid si Yisi. 13 Na telu kataw kanu manga wata nin a mama na minamung embunua kanu Saul. Na nia ngala nu kaka sa langun na si Iliab, su ikadua menem na si Abinadab enggu su ikatelu menem na si Sama. 14 Na su Daud i ali nilan sa langun. Na su telu kataw a entu a kaka nu Daud na minunut kanu Saul 15 ugaid'a su Daud na 'bpagaluyan bu sekanin lu kanu Saul kagina papegkanen nin pan su manga bili-bili nu ama nin lu sa Bitlihim.
16 Na uman-uman gay kanu mapita enggu malulem kanu dalem'u patpulu gay na 'bpagenggaten bu pembunua ni Gulayat su manga taw a Israil.
17 Na aden isa a gay a inimbitiala ni Yisi su wata nin a su Daud ka sinugu nin lu sa kampu sa nia nin lun pidtalu na “Pamagayas ka ka isigkil'engka pan kanu manga kaka nengka i tenga a nia sa saku a inilutu a bantad enggu sawati a pan. 18 Na pananggiti ka bun su mapulu nu manga sundalu kanu sawati a nia a pinadtegas a gatas enggu pamalisa ka bun u ngin den i 'gkambebetad'u manga kaka nengka lu. Na kanu kambalingan nengka sia na pananggit ka sa amadan sa mapia bun silan.” 19 Na saleta mambu na su Saul enggu su manga kaka nu Daud apeg'u ped pan a manga sundalu nin na lu silan kanu pageletan nu bakulud'u Ila ka pembunua silan kanu manga taw a Pilistin.
20 Na kanu temundug a gay na mibpanay mambu gemedam su Daud ka inipatuganul'in su manga bili-bili nin enggu kinua nin su manga inisugu lun a pananggiten nin ka ginemanat sekanin a mana bun su inisugu nu ama nin lun. Na guna sekanin makauma lu kanu kampu nu manga taw a Israil na nia nin nauman na su manga sundalu na 'bpamelalis kanu kapedsupeg'ilan kanu pembunuan. 21 Na da matana-tana na su manga taw a Israil enggu su manga Pilistin na nakadsupegaya den a adil den silan sa kapembunua. 22 Saleta mambu na su Daud na initabun nin su manga it'in lu kanu pedtuganul sa manga igagama ka linemu kanu manga kaka nin ka inidsa nin kanilan u ngin den i betad'ilan. 23 Na gagalu nu kapembitiala nin kanilan na linemiu kanu kampu nu manga taw a Pilistin su mama a badtug sa kambunua a bedtuan sa Gulayat a ebpun kanu dalepa a Gat. Na mana bun su katatapan a penggulan nin na pinangenggat'in menem su manga taw a Israil sa kambunua. Daka nakineg'u Daud su entu. 24 Na guna mailay nu langun nu manga taw a Israil si Gulayat na sangat a nangagilekan silan taman sa namakadtatalaguy silan. 25 Na nia nilan 'gkangadtalu na “Nan den menem su mama a papegkaya sa lekitanu sa kabpangenggat'in sa kapembunua. Na nia katigan nu datu na apia entain i makapatay kanu nan a mama na enggan nin sa kakawasan enggu mapangaluma nin pan su puteli a wata nu datu taman sa su sakambinabatan nin na di den makabayad sa buwis.”
26 Na inidsa nu Daud kanu manga sundalu a pedtindeg kanu ubay nin i “Entain i mama a nan a dikena 'bpaginugut kanu Kadenan a 'bpangenggat kanu manga sundalu nu tidtu a Kadenan? Ngin i inggay kanu taw a makapatay kanu mama a nan ka enggu pakatelen den sa kabpangenggat'in kanu manga taw a Israil?” 27 Na pidtalu nilan lun u ngin i inggay kanu taw a makapatay kanu nan a mama.
28 Daka guna makineg'u kaka nu Daud a si Iliab i inimbitiala nu Daud su manga sundalu na nalipungetan nin sekanin sa nia nin pidtalu na “Nginan ka nakasia ka? Endaw nengka initabun su pila timan bu a entu a ipapedtuganul sa leka a bili-bili lu kanu tawan-tawan a dalepa? Katawan ku i pedsandag ka bu sa kinasia nengka a nan ka dikena mapia i kahanda nengka ka sinemia ka bu asal'a pakailay ka sa kapembunua.” 29 Na nia inisumpat'u Daud na “Ngin besen i pinggula ku? Minidsa aku bu man.” 30 Daka tinagak'in si Iliab, ka linemu menem kanu ped a sundalu ka inidsa nin pamun su pantag kanu entu ugaid'a maitu bun ba i nakineg'in a sawal.
31 Na guna makauma kanu pakinegan nu Saul su manga pidtalu nu Daud na inipatawag'in sekanin. 32 Na nia pidtalu nu Daud kanu Saul na “Di tanu pagkalubayn i manggiginawa tanu sabap bu kanu mama a nan. Ka saki den a panunugun nengka i matu lun.” 33 Na nia pidtalu nu Saul kanu Daud na “Di ka makaatu sa lekanin, kagina wata ka pamun, sekanin na iganat sa manguda pan na pabubunua den.” 34 Na nia inisumpat'u Daud kanu Saul na “Su panunugun nengka a nia na nauget den pedtuganul kanu bili-bili nu ama nin. Na amaika aden alimaw atawa ka masela a asua a pedtangag sa kanilan 35 na 'bpaneleden ku silan ka 'bpametayn ku entu pan ka 'bpagagawn ku pegkua su initangag'ilan. Na amaika 'bpagatu pamun na pegkakangan ku su baka nin enggu ipedtapes ku taman sa matay. 36 Nakapatay aku den sa alimaw enggu mana masela a asu. Na maitu bun ba i pakaidan ku kanu mama a nan a dikena 'bpaginugut kanu Kadenan. Kagina enduken ka 'bpangenggaten nin sa kambunua su manga sundalu nu tidtu a Kadenan?” 37 Na pidtalu pan nu Daud i “Su Kadenan a Mapulu a linemipuas sa laki kanu alimaw enggu kanu masela a asu i lemipuas bun sa laki kanu mama a nan.” Na nia inisumpat'u Saul sa lekanin na “Amaika maitu na ganat ka den ka nia ta pangeni-ngenin na tapiden ka nu Kadenan a Mapulu.”
38 Daka inipaselub'u Saul kanu Daud su manga igagama nin kanu kapembunua. Inipaselub'in sa lekanin su kelung'u ulu nin a galang enggu inipaselub'in bun su kelung'u laleb'in. 39 Entu pan ka initagkip'u Daud su sundang'u Saul sia kanu kasadan nin ka tinekawan nin semangkad ugaid'a di sekanin pakasangkad kagina da nin i entu kalayami. Daka nia pidtalu nu Daud kanu Saul na “Di aku embunua sa maya i ipanelub ku ka dikena ku i nia 'gkalayaman.” Na daka pinameluwas'u Daud su entu 40 ka nia nin pinundut na su tungked'in enggu kinemua sekanin sa lima timan a matilak a watu lu kanu manaut a lawas'a ig ka inibetad'in kanu upis'u binatang a 'bpametadan nin. Na nia nin pidtapik kanu kinasupeg'in kani Gulayat na su bitik'in.
41 Na sinemupeg si Gulayat kanu Daud a 'bpangunanan sa lekanin su 'bpananggit kanu kelung'in. 42 Na guna nin mailay i manguda pamun su Daud, mapia i kinanggulawas'in enggu dikena nabulugan i buntal'in na pinagumpak'in 43 sa nia nin lun pidtalu na “Nginan nia nengka kapegkailay sa laki na asu ka nia nengka pinananggit na tungked?” Daka inidsinta nin sia kanu manga pegkakadenanen nin su Daud. 44 Na nia pan pidtalu ni Gulayat kanu Daud na “Ubay ka sia, ka ipakan ku seka kanu manga papanuk enggu kanu manga talaw a binatang.”
45 Ugaid'a nia inisumpat'u Daud na “Ipembunua aku nengka sa nia nengka matalem na sundang, dilek enggu gelat ugaid'a saki na atuan ku seka kanu ingala nu Kadenan a Mapulu a Barakat sa Langun a papegkayan nengka a Kadenan nu manga sundalu nu manga taw a Israil. 46 Na kanu nia bun ba a gay na ipalad ka den sa laki nu Kadenan a Mapulu. Imatayan ku seka enggu putan ku i ulu nengka taman sa su manga bangkay nu manga ped'engka a taw a Pilistin na ipakan ku kanu manga papanuk enggu kanu manga talaw a binatang. Na amaika maitu na katuntayan nu langun nu taw sa dunia su tidtu a Kadenan nu manga taw a Israil. 47 Na katuntayan bun nu langun nu manga taw sia a nangalimud i magaga man nu Kadenan a Mapulu lemipuas su manga taw nin apia dala matalem'in a sundang atawa ka dilek. Kagina su Kadenan man a Mapulu i ipembunua nu enggu ipataban kanu nin man langun sa lekami.”
48 Na guna su 'bpagangayan den ni Gulayat su Daud na sinumbak sekanin mamagayas'u Daud 49 a minabat sa watu ka binitik'in. Na nasugat su bias'i Gulayat taman sa napesa. Daka nakadudsung kanu kinaudtang'in. 50 Na tinabanan nu Daud si Gulayat sa nia nin bu inusal na bitik enggu minatay nin si Gulayat a dala nausal'in a sundang. 51 Na guna su maitu na inubay nu Daud mamagayas si Gulayat ka binindas'in su sundang'i Gulayat ka pinutukan nin sa ulu. Na guna mailay nu manga taw a Pilistin i minatay den su badtug i kambunua nin na nakapalalaguy silan.
52 Na namelalis su manga sundalu nu manga taw a Israil enggu manga taw a Yahuda. Daka pinaneled'ilan su manga taw a Pilistin 'bpawang sa dalepa a Gat enggu taman kanu bengawan nu dalepa a Ikrun. Na namakadtagayak su manga bangkay nu manga taw a Pilistin iganat kanu lalan nu dalepa a Saaraim taman kanu dalepa a Gat enggu Ikrun. 53 Na ulian nu kinapaneled'ilan kanu manga taw a Pilistin na mimbalingan silan. Na pinangua nilan su langun nu nangatabun nu manga taw a Pilistin kanu kampu nilan. 54 Na inanggit'u Daud su ulu ni Gulayat lu sa Awrusalim. Ugaid'a su matalem'i Gulayat na lu nin init kanu balung-balung'in.
55 Na kanu kinasupeg a entu nu Daud kani Gulayat asal'a makambunua nin na nailay sekanin nu Saul na inidsan nin si Abnir a mapulu nu manga sundalu nin sa “Entain i ama nu manguda a nan?” Na nia inisumpat'i Abnir na “Datu, saben-sabenal a di ku katawan.” 56 Daka nia pidtalu nu Saul na “Ipangingidsa nengka u entain i ama nin.”
57 Na kanu kinambalingan nu Daud lu kanu kampu ulian nu kinaimatay nin kani Gulayat na iniadap'i Abnir kanu Saul su Daud a pembimbingen nin pamun su ulu ni Gulayat. 58 Daka inidsan sekanin nu Saul sa “Entain i ama nengka?” Na nia inisumpat'u Daud na “Saki su wata nu panunugun nengka a si Yisi a taw sa Bitlihim.”