Su Kinapamili kanu Daud a Mabaluy a Datu
16
Na nia pidtalu nu Kadenan a Mapulu kanu Samuil na “Endaw taman i kapegkalidu na ginawa nengka kani Saul? Iniawa ku den man sekanin sa kadatu kanu manga taw a Israil. Na saguna na tagui ka sa lana su sidung a 'bpanaguan nengka sa lana, ka lu ka kani Yisi a taw sa Bitlihim ka pinamili ku su sakataw kanu manga wata nin a mama sa makandatu.” 2 Na nia inisumpat'u Samuil na “Panun i kalu ku? Ka amaika katawan ni Saul su entu na imatayan aku nin.” Na nia inisumpat'u Kadenan a Mapulu sa lekanin na “Kua ka sa manguda a sapi a babay ka lu ka sa Bitlihim ka nia ka edtalu kanu manga taw lu na linemu ka, ka enggu ka makagkurban kanu Kadenan a Mapulu. 3 Na enggat ka si Yisi kanu kagkurban nengka enggu ipamandu ku sa leka u ngin i dait a enggulan nengka amaika makatutulu ku den sa leka su wata nin a pembaluyn ku a datu. Na bubusi ka su ulu nin sa lana.”4 Na pinggula den mambu nu Samuil su inisugu sa lekanin nu Kadenan a Mapulu. Na nia nin kinauma lu sa Bitlihim na inalaw sekanin nu 'gkangaunutan nu siudad a sangat a 'gkangagilekan taman sa nia nilan nakaidsa sa lekanin na “Ngintu, kalilintad i tangga na kinasia nengka?” 5 Na nia inisumpat'u Samuil sa kanilan na “Uway, kalilintad. Sinemia aku ka pegkurban aku kanu Kadenan a Mapulu. Na limpiu nu su badan nu ka enggu kanu masuti ka unut kanu sa laki kanu kagkurban ku.” Na maitu bun ba i inipanggula nin kani Yisi enggu kanu manga wata nin a mama ka pinaunut'in bun kanu kinagkurban nin.
6 Na guna makauma si Yisi enggu su manga wata nin a mama na nagkenu nu Samuil su wata ni Yisi a si Iliab. Na nia natagu sa ginawa nin na “Sekanin den su pinamili nu Kadenan a Mapulu a makandatu.” 7 Ugaid'a nia pidtalu nu Kadenan kanu Samuil na “Di ka 'bpagilaya i kapia na tindeg'in enggu kapia na kanggulawas'in kagina dikena sekanin su pinamili ku. Ka dikena ku nia 'bpagilayn su buntal'u taw a mana su kabpagilay nu manusia ka nia ku man 'bpagilayn na su dalem'u pamusungan nu taw.”
8 Na guna su maitu na tinawag menem'i Yisi su wata nin a si Abinadab ka iniadap'in kanu Samuil, ugaid'a nia pidtalu nu Samuil kani Yisi na “Dikena bun sekanin su pinamili nu Kadenan a Mapulu.” 9 Daka tinawag'in menem su wata nin a si Sama ka iniadap'in kanu Samuil. Na nia menem pidtalu nu Samuil na “Dikena bun sekanin su pinamili nu Kadenan a Mapulu,” 10 taman sa naibped'in man mapaadap kanu Samuil su pitu kataw a wata nin a mama. Ugaid'a dala lu kanilan su pinamili nu Kadenan a Mapulu. 11 Na nia inidsa nu Samuil kani Yisi na “Ngintu, nia den ba langun i wata nengka?” Na nia inisumpat'i Yisi na “Aden pamun sakataw a ali sa langun a pedtuganul sa bili-bili.” Na nia pidtalu nu Samuil na “Ipalapit'engka sekanin ka di tanu makaludsu keman kanu kanduli a nia taman sa di sekanin makauma.”
12 Daka inipalapit den ni Yisi su Daud. Na mapia i kinanggulawas'in, mapia i kinadtaga na beneng'in enggu mapia i kinanggumata nin. Na nia pidtalu nu Kadenan a Mapulu kanu Samuil na “Bubusi ka sa lana su ulu nin kagina sekanin su pinamili ku.” 13 Daka binubusan den mambu nu Samuil su ulu nu Daud sa lana sia kanu adapan nu manga suled'in. Na iganat kanu entu ba na linemangkap den kanu Daud su Ruh nu Kadenan a Mapulu. Na daka mimbalingan den mambu su Samuil lu sa dalepa a Rama.
Su Kapegkutiapi nu Daud
14 Na saleta mambu na su Saul na inawan den nu Ruh nu Kadenan a Mapulu. Ugaid'a pinaasukan nin sekanin sa saitan a mapakapasang sa lekanin. 15 Daka nia pidtalu nu 'gkangasaligan nu Saul na “Ilay ka, su saitan a pinaasuk'u Kadenan sa leka na papegkapasangan ka nin. 16 Na amaika miug ka na pangilayan nami seka sa mategel i kagkutiapi nin ka uman ka pakapasangan nu entu na 'gkutiapian ka nin ka enggu 'gkapia i manggiginawa nengka.” 17 Na nia pidtalu nu Saul kanu 'gkangasaligan nin na “Uway, pangilayi aku nu sa mategel i kagkutiapi nin ka pasia nu sa laki.” 18 Daka nia inisumpat'u manguda a panunugun nin na “Aden katawan ku a mategel i kagkutiapi nin a wata ni Yisi a taw sa Bitlihim. Na liu pan sa entu na mawalaw i kambunua nin, mapia i tindeg'in, mapia bun i kambibitiala nin enggu pedtapiden sekanin nu Kadenan a Mapulu.”
19 Na guna su maitu na napapait sa katigan su Saul lu kani Yisi sa “Pasia ka su wata nengka a patutuganul sa bili-bili a si Daud.” 20 Daka kinemua si Yisi sa kimar a linulanan sa pan, enggu kinemua bun sa ig'a ubas a inibetad kanu taguan a upis'a binatang enggu kinemua bun sa manguda a kambing ka pinaganat'in su Daud 'bpawang kanu Saul. 21 Na guna makauma su Daud lu kanu Saul na linudsuan nin den enggalebek su galebekan nin. Na sangat a nasuatan sekanin nu Saul taman sa binaluy nin a makadtatanggit kanu matalem'in. 22 Na guna su maitu na napapait menem su Saul sa katigan kani Yisi sa “Padtangen ka demun sia sa laki su Daud ka sangat a 'gkasuatan ku sekanin.” 23 Na uman sekanin papegkapasangan nu saitan a pinaasuk'u Kadenan sa lekanin na pegkutiapi su Daud taman sa pegkapia i manggiginawa nin enggu 'bpagawan sekanin nu entu.