Su Kinatalaw nu Saul kanu manga Taw a Amalik
15
Na pidtalu nu Samuil kanu Saul i “Sinugu aku nu Kadenan a Mapulu sa baluyn ku seka a datu nu manga taw nin a Israil, tembu saguna na pakikineg ka su katigan nin. 2 Na nia katigan nu Kadenan a Mapulu a Barakat sa Langun na ‘Siksan ku su manga taw a Amalik sabap kanu kinabunu nilan kanu manga taw a Israil kanu kinaliu nilan sa dalepa a Egypt. 3 Na saguna na lusudi nu su manga taw a Amalik ka binasa nu su langun nu kauman nu lu sa dala isama nu ka pangimatayi nu i magidsan pan i babay-mama, wata enggu apia su bagu ginememaw apeg den nu manga sapi, manga bili-bili, manga unta enggu manga kimar.’ ”4 Na guna su maitu na linimud'u Saul su manga sundalu nin lu sa dalepa a Tilaim. Na manga dua gatus ngibu i kadakel'ilan liu pan su sapulu ngibu a manga mama a ganat sa dalepa a Yahuda. 5 Na pinangunanan silan nu Saul 'bpawang kanu siudad'u manga taw a Amalik. Na lu silan nagayan kanu manga pageletan nu manga bakulud. 6 Na pinasuguan nu Saul su manga taw a Kin sa nia nin pidtalu na “Awa kanu den san, ganati nu den su manga taw a Amalik ka enggu di kanu makalalagit matay sa kanilan, kagina kanu kinaliu nu manga taw a Israil kanu dalepa a Egypt na napailay kanu sa kapia na palangay.” Daka inawan mambu nu manga taw a Kin su manga taw a Amalik.
7 Na linusudan den nu Saul su manga taw a Amalik iganat sa Habila taman sa dalepa a Sur a lu tampal kanu sebangan nu dalepa a Egypt. 8 Na pinangimatayan nilan langun su manga taw a Amalik ugaid'a inisama nu Saul si Agag a datu nu manga taw a Amalik. 9 Na liu kani Agag na inisama nilan bun su manga mapia a manga bili-bili, manga sapi apeg'u manga mapia a pipis'u entu taman sa pinangua nilan su manga mapia a langun-taman. Ka da nilan pangimatayi su aden pamun katagan nin ka nia nilan bu pinangimatayan na su da den katagan nin.
Su Kinaawa nu Kadenan kanu Kadatu nu Saul
10 Na pidtalu nu Kadenan a Mapulu kanu Samuil i 11 “Nakadsendit aku kanu kinabaluy ku kanu Saul a datu kagina tinaligkudan aku nin ka da nin inggulalan su manga inisugu ku.” Na sabap sa entu na nalipunget su Samuil. Na kanu nalalamagan na nangadap bu sekanin kanu Kadenan a Mapulu. 12 Na kanu mapita na mibpanay sekanin embangun ka pebpawangan nin su Saul, ugaid'a aden nakadtalu sa lekanin sa “Si Saul na linemu sa Karmil ka napatindeg sekanin sa pinapamaguntul a watu a tademan kanu kinapanaban nin enggu tinemalus sekanin lu sa Gilgal.” 13 Na daka pibpawangan sekanin lu ba nu Samuil. Na guna silan makapagilaya na nia pidtalu nu Saul kanu Samuil na “Palihalan ka nu Kadenan a Mapulu! Na ininggulalan ku den su inisugu nu Kadenan.” 14 Ugaid'a nia inisumpat'u Samuil sa lekanin na “Amaika benal a ininggulalan nengka su inisugu nu Kadenan na ngin i 'gkakineg ku a nia a uni nu manga bili-bili enggu sapi?” 15 Na nia inisumpat'u Saul na “Namba i manga mapia kanu manga bili-bili enggu sapi a kinua nu manga taw ku kanu manga taw a Amalik. Na dala nilan iamung mimatay ka enggu makagkurban kanu Kadenan nengka a Mapulu. Na liu sa nia na pinangimatayan nami.” 16 Daka nia pidtalu nu Samuil kanu Saul na “Telen ka san! Pakikineg ka i pidtalu nu Kadenan a Mapulu a nia sa laki kagina magabi.” Na nia nin inisumpat na “Edtalu ka.” 17 Na pidtalu den mambu nu Samuil i “Apia manaut a benal i kapegkailay nengka paganay kanu ginawa nengka na pinamili ka bun nu Kadenan a Mapulu a mabaluy a datu nu manga taw a Israil. 18 Na sinugu ka nin sa kaimatay nengka kanu langun nu baladusa a entu a manga taw a Amalik sa bunun nengka silan taman sa maibped silan matay. 19 Ugaid'a ngintu ka da nengka paginuguti su inisugu nu Kadenan? Ngintu ka pinaginagkay nengka su kaaden nilan? Ngintu ka pinggula nengka i dikena a nia mapia kanu adapan nu Kadenan a Mapulu?”
20 Na nia inisumpat'u Saul kanu Samuil na “Ininggulalan ku man su inisugu nu Kadenan a Mapulu sa laki. Na sinigkem ku si Agag a datu nu manga taw a Amalik enggu inibped ku mimatay su manga taw nin. 21 Ugaid'a inisama nu manga taw ku su manga mapia sa langun kanu manga bili-bili enggu su manga sapi a tangga den a 'bpagimatayan. Na pinananggit'ilan su entu lu sa dalepa a Gilgal ka enggu makagkurban kanu Kadenan nengka a Mapulu.”
22 Ugaid'a nia inisumpat'u Samuil na “Nia nengka kataw ka nia makasuat kanu Kadenan na su kurban a pedtutungen langun enggu su ped pan a manga kurban? Nia man makasuat kanu Kadenan a Mapulu na su kapakikineg enggu kapaginugut kumin kanu kapegkurban kanu manga kasebudan na bili-bili. 23 Na su kasungkang kanu Kadenan a Mapulu na mana bun kawag'u kabpangalintaw enggu su kategas'a ulu na mana bun kawag'u kapedsimba sa balahala. Na kagina ka sinungkang'engka su kadtalu nu Kadenan na iawa ka nin den kanu kadatu nengka.”
24 Na nia pidtalu nu Saul kanu Samuil na “Mindusa aku kagina sinungkang ku su Kadenan a Mapulu enggu su kadtalu nengka kagina nagilekan aku kanu manga taw, tembu pinakikineg ku silan. 25 Na 'bpangenin ku sa leka i ampun aku nengka kanu kinandusa ku enggu unuti aku lu kanu pegkurbanan ka enggu aku makasimba kanu Kadenan a Mapulu.” 26 Ugaid'a nia inisumpat'u Samuil kanu Saul na “Di ku seka unutan kagina sinungkang'engka su Kadenan a Mapulu. Iniawa ka nin den kanu kadatu nengka.”
27 Na guna su pengganat den su Samuil na sinegedan nu Saul su sanggayad'u lambung'in taman sa nakisi. 28 Na nia pidtalu nu Samuil sa lekanin na “Iganat saguna na iniawa den nu Kadenan a Mapulu su kadatu nengka kanu manga taw a Israil ka inenggay nin den i entu kanu taw a pagidsan nengka bun a minuna pan sa leka i kapia nin. 29 Ka su Kadenan a iganat sa ganatan taman sa taman a Kadenan nu manga taw a Israil na di man mapadapat kagina dikena sekanin manusia a pedsalin-salin i kabpagitung'in.” 30 Na nia pidtalu nu Saul na “Mindusa aku man. Ugaid'a 'bpangenin ku sa leka i enggi aku sa kabadtugan kanu adapan nu 'gkangasaligan ku taman kanu langun nu manga taw a Israil sia kanu kaunut'engka sa laki sa kanu kasimba kanu Kadenan nengka a Mapulu.” 31 Na minunut mambu su Samuil kanu Saul. Daka sinemimba den su Saul kanu Kadenan a Mapulu.
Su Kinaimatay kani Agag
32 Na guna su maitu na nia pidtalu nu Samuil na “Anggit'u sia sa laki si Agag a datu nu manga taw a Amalik.” Na linemu mambu si Agag kanu Samuil a dala demun geda-geda nin ka nia 'gkadtalu na ginawa nin na “Saben-sabenal a nalipus aku kanu nanget a kapatay.” 33 Ugaid'a nia pidtalu nu Samuil na “U panun i kinadala nu manga wata kanu manga ina nilan sabap kanu kinapangimatay nengka lun na saguna na su ina nengka menem i kadalan na wata.” Daka pinanimbas'in si Agag taman sa nakabpipitas i lawas'in kanu adapan nu Kadenan a Mapulu lu sa dalepa a Gilgal.
34 Na guna maipus su entu na mimbalingan su Samuil lu sa dalepa a Rama enggu su Saul menem na minuli den kanu walay nin lu sa Gibia. 35 Na iganat sa entu na dala den pailay su Samuil kanu Saul taman kanu kinapatay nu Samuil. Ugaid'a naliduan nin sa ginawa su Saul. Na nakadsendit man su Kadenan a Mapulu kanu kinabaluy nin kanu Saul sa datu nu manga taw a Israil.