Su Kinalusud'i Jonatan kanu manga Taw a Pilistin
14
Aden isa a gay a su wata nu Saul a si Jonatan na pidtalu nin kanu manguda a 'bpananggit kanu matalem'in i “Sia ka, ka 'bpawangan ta su pegkampuan nu manga taw a Pilistin.” Ugaid'a dala nin i entu edtalua kanu ama nin a su Saul. 2 Na saleta mambu na su Saul na lu kanu atag'u kayu a pumigranataa lu sa dalepa a Migrun a 'gkasakupan bun nu Gibia a kaped'in su nem gatus a manga taw nin. 3 Na kaped'ilan bun su 'bpangurban a si Ahiya a mimbalegkas sa pidsugan a balegkas'u 'bpangurban. Na si Ahiya a nia na wata ni Ahitu a suled'i Ikabud a nia nilan ama na si Pinihas a wata ni Ili a 'bpangurban paganay lu sa Silu. Na dala nakataw kanilan sa ginemanat si Jonatan.4 Na kanu kinalu ni Jonatan kanu kampu nu manga taw a Pilistin ka pegkiugan nilan 'bpelusud na lu silan minukit kanu pageletan nu duakambala a matibeng a palaw a madakel i watu nin. Na nia ngala nu sabala kanu matibeng a entu na Busis enggu su sabala menem na Sini. 5 Na su sabala a matibeng a palaw na lu tampal sa ilud a 'gkasangulan nu dalepa a Mikmas enggu su sabala menem na lu tampal sa laya a 'gkasangulan menem'u dalepa a Gibia.
6 Na nia pidtalu ni Jonatan kanu manguda a kaped'in a 'bpananggit kanu matalem'in na “Lemu ta kanu kampu nu manga taw a dala pamun mapaletakb ka basi tabangan ta nu Kadenan kagina amaika nia man 'gkahanda su Kadenan sa kapanaban nu taw na magidsan pan i paidu atawa ka madakel a taw na manggula su entu.” 7 Na nia inisumpat'u manguda a entu na “Apia ngin i 'gkapagitung'engka na enggula ka den ka unutan ku seka.”
8 Daka nia pidtalu ni Jonatan sa lekanin na “Lemu ta ka mapailay ta sa kanilan. 9 Na amaika edtalun nilan sa lekita i ‘Angapi kami san’ na di ta den temakedeg ka angapan ta den silan sia. 10 Na amaika nia nilan edtalun i ‘Takedeg kanu sia’ na temakedeg ta kagina entu ba i tanda sa inipalad den silan nu Kadenan a Mapulu sa lekita.”
11 Na guna su napailay den silan kanu manga taw a Pilistin na nia nadtalu nu manga taw a Pilistin na “Sandeng'u den su manga taw a Hibru ka nameliu den silan kanu 'bpamagenan nilan a manga lingkab.” 12 Na tinawag'u manga taw a Pilistin si Jonatan enggu su manguda a 'bpananggit kanu matalem'in ka nia nilan pidtalu na “Takedeg kanu sia ka aden ipebpagilay nami sa lekanu.” Na nia pidtalu ni Jonatan kanu manguda a kaped'in na “Temakedeg ta, kagina nia nin maena na inipalad den silan nu Kadenan a Mapulu kanu manga taw a Israil.”
13 Daka tinemakedeg den si Jonatan a pedtundugen bun nu manguda a 'bpananggit kanu matalem'in a pegkabal bu silan kanu kapedtakedeg'ilan. Na guna silan makauma lu na su langun na pakadsangula ni Jonatan pembunua na 'gkaibped 'gkaudtang, entu pan ka 'bpelunsanan menem 'bpagimatay nu kaped'in a manguda. 14 Na su kinalusud'ilan demun a entu na manga duapulu kataw a manga taw a Pilistin i minatay nilan a namakadsambal su manga bangkay nilan kanu manga tenga sa iktaria i kaulad'in. 15 Na sabap sa entu na naguligaw su langun nu manga sundalu a Pilistin magidsan i lu sa kampu enggu lu kanu kadatalan. Na su manga sundalu menem a 'bpelusud na kinemegkel'a gilek. Na lineminug pan a nakalunsan kanu kapegkagilek'ilan.
Su Kinapanaban nu manga Taw a Israil
16 Na saleta mambu na su manga sundalu nu Saul a pedtameng lu sa Gibia lu kanu kalupan nu Buniamin na nasandeng'ilan su manga taw a Pilistin a 'gkaguligaw. 17 Daka nia pidtalu nu Saul kanu manga sundalu nin na “Bilang'u su manga taw nu ka ilay nu u entain i dala san.” Na guna su binilang'ilan den, na nia dala lu na si Jonatan enggu su manguda a 'bpananggit kanu matalem'in.
18 Na guna su maitu na nia pidtalu nu Saul kani Ahiya na “Anggit'u sia su Kaun nu Kapasadan nu Kadenan.” Na saleta mambu na su Kaun nu Kapasadan nu Kadenan na lu bun kanu pegkampuan nu manga taw a Israil. 19 Na gagalu nu kapembitiala nu Saul kanu 'bpangurban a si Ahiya na 'bpangiseg-'bpangiseg bun su kapegkaguligaw nu manga taw a Pilistin lu kanu kampu nilan. Na nia pidtalu nu Saul kanu 'bpangurban na “Di ka den ipedtalus i penggulan nengka a nan.” 20 Na linimud'u Saul su manga taw nin ka linusudan nilan den su manga taw a Pilistin. Na nia nilan nauma lu na nia bun pebpapataya na su manga taw a Pilistin sa kapegkaguligaw nilan. 21 Na su manga taw a Hibru a tinemampil kanu manga taw a Pilistin na mimbalingan silan temampil kanu manga taw a Israil a kaped'u Saul enggu Jonatan. 22 Na su manga mama a Israil a namagena kanu bakulud'u Ipraim na guna nilan makineg i su manga taw a Pilistin na namakadtatalaguy na minamung silan maneled kanilan 23 taman sa nakalampas su entu a kinambunua sa dalepa a Bit-Abin. Na kanu entu ba a gay na pinapanaban nu Kadenan a Mapulu su manga taw a Israil.
Su Kinatalepas'i Jonatan kanu Kasuguan nu Ama nin a su Saul
24 Na kanu entu ba a gay na su manga sundalu a Israil na 'gkalubayan den a benal sabap sa dala silan makakan kagina inidsapa nu Saul kanilan i “Kamulekan i apia entain a keman sa di pan mauma su magabi taman sa di aku pan makasuli kanu manga kuntela ku.” Na dala mambu kineman kanilan. 25-26 Na linemu su manga sundalu kanu damakayu. Na aden nailay nilan a teneb a 'bpagedtak lu kanu lupa. Na da nilan i entu tekawi keman kagina 'gkagilekan silan kanu inidsapa nu Saul. 27 Ugaid'a si Jonatan na dala nin katawi su makapantag kanu inidsapa a entu nu ama nin. Tembu initiduk'in su tungked'in kanu teneb ka kineman sekanin sa entu. Daka migkabagel sekanin. 28 Na nailay sekanin nu isa kanu manga sundalu nilan, na nia nin lun pidtalu na “Inipakalimu-limu a benal'u ama nengka i kamulekan i apia entain i keman saguna tembu 'gkalubayan kami den a benal.” 29 Na nia pidtalu ni Jonatan na “Papegkapasangan nu ama ku su manga taw. Ilay nu ba, migkabagel aku guna ku katekawi su teneb. 30 Labi den guna i kapia nin amaika aden baya-baya nu manga sundalu sa kakan kanu manga nakua nilan kanu manga kuntela nilan. Ka basi minuna pan i kadakel'u matay tanu a manga taw a Pilistin.”
31 Na guna nilan mapasad mangimatay su manga taw a Pilistin kanu entu ba a gay iganat sa dalepa a Mikmas taman sa dalepa a Ayalun na sangat a nangalubayan silan. 32 Tembu namagayas su manga sundalu kemua kanu manga nakua nilan a manga sapi enggu manga bili-bili ka sinumbali nilan kanu lupa enggu kinan nilan sa apia aden pamun lugu nin. 33 Na aden nakapanudtul kanu Saul sa “Ilay ka pan su manga sundalu nengka ka mindusa silan kanu Kadenan a Mapulu kagina kineman silan sa aden pamun lugu nin.” Na nia nin inisumpat na “Nakandusa kanu kanu Kadenan. Na kua kanu sa masela a watu ka lilid'u sia.” 34 Na nia pan pidtalu nu Saul na “'Bpawangi nu su manga sundalu ka edtalu nu sa kanilan i anggiten nilan sia su manga sapi enggu manga bili-bili ka sia nilan den sumbalin kanu masela a nia a watu entu pan ka kanen nilan. Edtalu nu bun sa kanilan i di den silan endusa 'bpaluman kanu Kadenan a Mapulu sa ukit a kakan nilan sa aden pamun lugu nin.” Na kanu entu bun ba a magabi na inanggit'u manga sundalu nin lu su manga pangangayamen ka sinumbali nilan. 35 Na minumbal su Saul sa pegkurbanan kanu Kadenan a Mapulu. Na nia ba i muna-muna a pegkurbanan a inumbal'in kanu Kadenan.
Su Kinapaninindeg'u manga Sundalu kani Jonatan
36 Guna su maitu na nia pidtalu nu Saul na “Kanu nia bun ba a magabi na lusudan tanu su manga taw a Pilistin ka ibpeden tanu silan mimatay taman sa mapita enggu panguan tanu su manga tamuk'ilan.” Na nia nilan inisumpat na “Enggula ka u ngin i kalangan nengka a makagkapia.” Ugaid'a nia pidtalu nu 'bpangurban na “Isupeg tanu muna i entu kanu Kadenan.”
37 Tembu nangadap su Saul kanu Kadenan sa nia nin pidtalu na “Hu Kadenan, lusudan nami den su manga taw a Pilistin? Ngintu, ipataban nengka den silan sa lekami?” Ugaid'a dala sekanin sawala nu Kadenan. 38 Na nia pidtalu nu Saul na “Su langun nu 'gkangaunutan nu manga taw a Israil na semupeg sia ka enggu tanu katawan u ngin i nanggula tanu a kadusan kanu nia a gay. 39 Ipedsapa ku kanu Kadenan a Mapulu a 'bpamelipuas kanu manga taw a Israil i imatayan su apia entain i nakandusa apia su wata ku pan a si Jonatan.” Ugaid'a apia sakataw na dala midtalu sa kanilan. 40 Pidtalu nin bun kanu langun nu manga taw a Israil i “Endidilimudan kanu san ka sekami menem kani Jonatan sia.” Na nia inisumpat'u manga taw kanu Saul na “Enggula ka u ngin i kalangan nengka lun a mapia.” 41 Na nia pan pidtalu nu Saul na “Hu Kadenan a Mapulu a Kadenan nami a manga taw a Israil, ngintu ka dala nengka sawala su panunugun nengka kanu nia a gay? Na amaika saki i nakandusa atawa ka su wata ku a si Jonatan na nia nengka ipakua na su Urim. Ugaid'a amaika menem ka nia nakandusa na su manga taw na nia nengka ipakua na su Tumim.”c Daka nia nakua na su Urim, nia nin maena na si Jonatan atawa ka su Saul i nakandusa, dikena su manga taw. 42 Na nia pidtalu nu Saul na “Embunuta kami kanu wata ku a si Jonatan.” Daka nia nabunut na si Jonatan. 43 Na guna su maitu na pidtalu nu Saul kani Jonatan i “Edtalu ka kun sa laki u ngin i pinggula nengka.” Na nia pidtalu ni Jonatan sa lekanin na “Initiduk ku su tungked ku kanu teneb ka tinekawan ku sa paidu. Na dait maitu a matay aku.” 44 Na nia inisumpat'u Saul na “Natalatantu man a siksan aku nu Kadenan amaika di ka matay.” 45 Ugaid'a nia pidtalu nu manga taw kanu Saul na “Ngintu ka imatayan si Jonatan a linemipuas sa lekitanu? Na ipedsapa nami kanu Kadenan a Mapulu i dala manggula nin a mawag kagina tinabangan sekanin nu Kadenan kanu nia a gay.” Tembu dala italus'u Saul su kabpagimatay nin kani Jonatan sabap kanu pidtalu a entu nu manga taw.
46 Na guna su maitu na tinelenan den maneled'u Saul enggu su manga sundalu nin su manga taw a Pilistin taman sa nakambalingan mambu su manga taw a Pilistin kanu manga dalepa nilan.
Su Kinandatu nu Saul enggu su Kinambunua nin
47 Na kanu timpu a kinandatu nu Saul kanu manga taw a Israil na inimbunua nin su manga kuntela nin a nakabalibet kanilan a su manga taw a Muab, su manga taw a Amun, su manga taw a Idum, su manga datu nu Suba enggu su manga taw a Pilistin. Na apia entain kanilan i 'gkagkuntela nin na 'gkatalaw nin. 48 Dala gilek'in kanu entu a kapembunua enggu tinalaw nin su manga taw a Amalik enggu inilipuas'in su manga taw a Israil kanu manga taw a 'bpamelusud kanilan enggu 'bpangua kanu manga kaaden nilan.
Su Sakambinabatan nu Saul
49 Na nia manga wata a mama nu Saul na si Jonatan, si Isbi enggu si Malkisua. Na nia menem ngala nu dua kataw a wata nin a babay na si Mirab i kaka enggu si Mikal menem i ali. 50 Na nia kaluma nu Saul na si Ahinuam a wata ni Ahimas. Na nia menem 'gkangaunutan nu sundalu nu Saul na si Abnir a wata nu bapa nin a si Nir. 51 Na si Kis a ama nu Saul enggu si Nir a ama ni Abnir na edtebped sa pused a nia nilan ama na si Abil.
52 Na kanu timpu a kapendatu nu Saul na dala den pinda na kapembunua i kanilan kanu manga taw a Pilistin. Tembu pembaluyn nin a sundalu su apia entain a 'gkailay nin a mama a Israil a mawalaw enggu mabagel.