Su Kinagkurban nu Saul a dikena Luyud kanu Atulan nu Kadenan
13
Nakatelupulu lagun i umul'u Saul kanu kinaludsu nin endatu. Na nakapatpulu enggu dua laguna i kinandatu nin kanu manga taw a Israil.2 Na namili su Saul sa telu ngibu a mama a manga taw a Israil. Na su dua ngibu kanilan na pinaunut'in sa lekanin lu sa dalepa a Mikmas kanu bakulud'u kalupan sa Bait-Il. Na su sangibu menem na pinaunut'in kani Jonatan lu sa Gibia kanu 'gkasakupan nu kalupan nu Buniamin. Na su manga nasama menem a manga taw a dala nin mapamili na pinauli nin kanu pegkalebenan nilan.
3 Na linusudan ni Jonatan su manga taw a Pilistin lu kanu kampu sa Gibia enggu tinalaw nin silan. Nakineg i entu nu ped pan a manga taw a Pilistin. Tembu inisugu nu Saul i paunin su tambuli lu kanu 'gkasakupan nu manga taw a Israil ka enggu makapagadil silan sa kambunua. 4 Na guna katawi nu manga taw a Israil su kinatalaw nu Saul kanu manga taw a Pilistin a sabapan na kinalipunget'ilan na linemu su manga taw a Israil sa Gilgal ka enggu nilan 'gkadtabangan su Saul sa kapembunua.
5 Na mindidilimudan bun su manga taw a Pilistin ka enggu nilan kaatuan su manga taw a Israil. Na nia kadakel'u pakakalisa nilan na manga telupulu ngibu enggu nem ngibu a pakukuda, liu pan su manga sundalu a mana kadakel'u pedtad sa lagat. Na lu silan migkampu sa Mikmas sa sebangan nu dalepa a Bit-Abin. 6 Na guna mailay nu manga taw a Israil i mana malupig silan na namagena silan lu kanu manga takub, lu kanu damalegen, lu kanu manga lakungan, lu kanu manga lebeng enggu lu kanu manga kalut. 7 Na su ped kanilan na linemipag kanu lawas'a ig'u Jordan 'bpawang sa kalupan nu Gat enggu Giliad, ugaid'a su Saul na migkalidtabun lu sa Gilgal. Na su langun nu ped'in lu a migkalidtabun na pegkegkel'a gilek.
8 Na inangatan lu nu Saul su Samuil kanu dalem'u pitu gay a mana bun su pidtalu sa lekanin nu Samuil. Ugaid'a dala makauma su Samuil tembu su manga tagapeda nin na midtatagitu mawa. 9 Na guna su maitu na nia pidtalu nu Saul na “Anggit'u sia sa laki su kurban a pedtutungen langun enggu su kurban a tanda kanu kinaisa kanu Kadenan.” Daka inanggit'ilan den mambu sa lekanin su entu ka inigkurban nu Saul su kurban a pedtutungen langun. 10 Na endaw i kinapasad'in 'gkurban na nakauma su Samuil. Daka inalaw sekanin nu Saul ka enggu nin masalam. 11 Ugaid'a nia pidtalu nu Samuil sa lekanin na “Ngin i pinggula nengka a nan?” Na nia inisumpat'u Saul na “Kagina nailay ku i su manga taw a nia na pedtatagitu den silan 'bpagawa ka di ka den pakauma kanu kutika a nabpasadan ta. Saleta na su manga taw a Pilistin na mindidilimudan den silan lu sa dalepa a Mikmas. 12 Na nia natagu kanu ginawa ku na ‘Basi lusudan kami nu manga taw a Pilistin na dala tanu pamun makagkurban kanu Kadenan a Mapulu ka enggu makapangeni sa tabang sa lekanin.’ Tembu napeges ku i ginawa ku sa igkurban ku den su kurban a pedtutungen langun.” 13 Na nia inisumpat'u Samuil kanu Saul na “Kabunegan i pinggula nengka a nan! Da nengka paginuguti su kasuguan nu Kadenan a inenggay nin sa leka. Na amaika pinaginugutan nengka bu man su Kadenan a Mapulu na su manga muliataw nengka i pandatun nin sia sa lusud'u Israil taman sa taman. 14 Ugaid'a saguna na matebped den su kandatu nengka ka namili den su Kadenan a Mapulu sa mama a pakasuat sa lekanin a enggula kanu kahanda nin. Sekanin den i binaluy nu Kadenan a makandatu kanu manga taw nin kagina da nengka paginuguti su kasuguan nin.”
15 Na guna su maitu na ginanatan nu Samuil su dalepa a Gilgal ka linemu sekanin sa dalepa a Gibia kanu 'gkasakupan nu kalupan nu Buniamin.
Su Kabpagadil sa Kambunua
Na binilang'u Saul su manga tagapeda nin a nasama. Na nia bun den kadakel'u nasama na manga nem gatus kataw. 16 Na lu migkampu su Saul enggu su wata nin a si Jonatan apeg'u manga tagapeda nilan kanu dalepa a Gibia a 'gkasakupan nu kalupan nu Buniamin. Na su manga taw menem a Pilistin na lu migkampu kanu dalepa a Mikmas. 17 Na mindudulumpuk silan sa telu lumpuk kanu kabpelusud'ilan. Na su salumpuk na lu mibpawang sa dalepa a Upra kanu kalupan nu Sual, 18 na su salumpuk menem na lu mibpawang sa dalepa a Bit-hurun, na su salumpuk menem na lu silan mibpawang kanu dulunan a 'gkatulungan su kadatalan nu Sibuim lu kanu tawan-tawan a dalepa.
19 Na kanu entu ba a timpu na dala den panday na putaw a matun kanu langun nu kalupan nu Israil kagina da den silan suguti nu manga taw a Pilistin sa kabpanday nilan ka nia nilan kadtalu na “Basi mangumbal sa sundang enggu dilek su manga taw a Hibru.”b 20 Saleta mambu na tatap 'bpelu su manga taw a Israil kanu manga taw a Pilistin ka enggu nilan makapagkagalang su manga dadu nilan, piku, kapa enggu su manga sangget'ilan. 21 Na nia bayad'u kapapegkagalang sa dadu enggu piku na dua timan a pilak, na nia menem bayad'u kapa enggu kapapedtidtu kanu manga pinanidisan a ipedsedseg sa pangangayamen na satiman a pilak. 22 Tembu ba kanu timpu nu kapembunua, na dala isa bu kanu manga sundalu nu Israil i aden sundang'in atawa ka dilek'in ka nia bu aden na su Saul enggu si Jonatan.
23 Saleta mambu na su salumpuk kanu manga sundalu nu manga taw a Pilistin na nagayan silan kanu lalan sa Mikmas.