Su Kinadtalu-talu nu Samuil kanu Kinapagetaw nin kanu manga Taw a Israil
12
Na nia pidtalu nu Samuil kanu langun nu manga taw a Israil na “Pinggula ku su langun nu pidtalu nu sa laki taman sa inenggan ku sekanu sa makandatu sa lekanu. 2 Na ilay nu sa mapia su datu a mangunanan sa lekanu. Ka saki na matua aku den enggu maputi den i buk ku ugaid'a apia ka maitu na nan pamun su manga wata ku a makatiakap sa lekanu. Na pinangunanan ku sekanu iganat pan kanu kanguda ku sampay saguna. 3 Na saguna na nia aku kanu adapan nu. Na edtalu nu sa laki sia kanu adapan nu Kadenan a Mapulu enggu kanu adapan nu datu a nia a pinamili nin sa amaika aden nadsalimbut ku sa lekanu atawa ka aden sa lekanu i kinua ku i sapi nin, kimar'in atawa ka inumis ku atawa ka napabayad aku asal'a di ku mailay su manga kalimbanan nu na edtalu nu sa laki saguna ka enggu ku makambalingan.” 4 Na nia nilan inisumpat na “Dala pidsalimbut'engka sa lekami, dala bun inumis'engka enggu dala ka bun pabayad kanu apia entain sa lekami.” 5 Na nia inisumpat'u Samuil kanilan na “Kanu nia ba a gay na su Kadenan a Mapulu enggu su binaluy nin a datu i saksi ku kanu adapan nu i dala nanggula ku sa lekanu a mawag.” Na nia nilan pidtalu na “Uway, saksi su Kadenan sa entu.”6 Na nia pan pidtalu nu Samuil kanu manga taw na “Su Kadenan a Mapulu i namili kanu Musa enggu kanu Harun enggu sekanin bun i napaliu kanu manga kaapuan tanu kanu kalupan na Egypt. 7 Saguna na pakikineg kanu ka ipagkalendem ku sa lekanu sia kanu adapan nu Kadenan a Mapulu su langun nu kapianan a pinggula nin sa lekitanu taman kanu manga kaapuan tanu. 8 Kagina kanu timpu a kinagkakaleben nu Yakub enggu su sakambinabatan nin lu sa dalepa a Egypt na inumis silana nu manga taw a Egypt taman sa nakapaguguliang silan sa kinapangeni nilan sa tabang kanu Kadenan a Mapulu. Tembu sinugu nu Kadenan a Mapulu su Musa enggu su Harun a makapangunanan sa kapaliu kanu manga kaapuan tanu kanu dalepa a Egypt enggu sia ba silan pinagkaleben kanu nia ba a dalepa. 9 Ugaid'a tinaligkudan nilan su Kadenan tanu a Mapulu tembu sinugutan nu Kadenan sa tabanan silan sa kambunua. Na tinabanan silan ni Sisira a 'gkaunutan nu sundalu nu dalepa a Hasur, tinabanan bun silan nu manga taw a Pilistin enggu su datu nu Muab. 10 Daka nakapaguguliang silan mangeni sa tabang kanu Kadenan a Mapulu sa nia nilan pidtalu na ‘Mindusa kami sa leka a Kadenan a Mapulu kagina tinaligkudan nami seka ka nia nami sinimba na su pegkakadenanen a si Baal enggu si Astarti. Ugaid'a saguna na ilipuas kami nengka kanu kapegkagaga nu manga kuntela nami ka simban nami seka.’ 11 Tembu sinugu nu Kadenan a Mapulu si Jirubaal, Bidan, Jipta enggu saki ka enggu nami sekanu makalipuas kanu kapegkagaga nu manga kuntela nu kanu embala-bala ka enggu kanu makapaguyag-uyag sa malilintad. 12 Ugaid'a guna nu mailay si Nakas a datu nu manga taw a Amun a pembunun kanu nin na apia natawan nu den i su Kadenan a Mapulu i datu nu na nangeni kanu pamun sa datu a makapangunanan sa lekanu. 13 Na ilay nu saguna su datu a pinamili nu a makandatu sa lekanu, na inenggay sa lekanu nu Kadenan a Mapulu su entu kagina pinangeni nu. 14 Na amaika magilek kanu kanu Kadenan a Mapulu enggu simban nu sekanin taman sa pakikinegen nu sekanin enggu di nu sungkangen su manga kasuguan nin taman sa su datu nu a endatu sa lekanu ka maginugut kanu Kadenan a Mapulu na makapaguyag-uyag kanu sa mapia. 15 Ugaid'a amaika di nu pakikinegen su Kadenan a Mapulu ka semungkang kanu kanu manga kasuguan nin na siksan kanu nin a mana bun su pinggula nin kanu manga kaapuan nu. 16 Tembu saguna na pakikineg kanu ka panuliman nu su sangat a pakagaip a enggulan nu Kadenan a Mapulu kanu adapan nu. 17 Na dikena ba di 'bpagulan sa timpu na kapedsabpet sa bantad? Na saguna na mangadap aku kanu Kadenan a Mapulu ka enggu nin makapalugung taman sa makaulan ka enggu nu kaimamanan u ngin i kasela na kadupangan nu sia kanu adapan nu Kadenan sa kanu kinapangeni nu sa datu a makandatu sa lekanu.”
18 Na guna su maitu na nangadap den su Samuil kanu Kadenan a Mapulu. Na kanu entu bun ba a gay na napalugung taman sa napaulan su Kadenan a Mapulu. Na su langun nu taw lu na sangat a nangagilekan kanu Kadenan a Mapulu enggu kanu Samuil. 19 Na nia nilan nadtalu kanu Samuil na “Ipangeni-ngeni kami nengka kanu Kadenan nengka a Mapulu ka enggu di kami matay. Ka madakel den man i kinandusa nami, na nakauman pan su masela a nia a kadupangan nami sa kanu kinapangeni nami sa datu a makandatu sa lekami.” 20 Na nia inisumpat'u Samuil kanilan na “Da kanu magilek ka apia masela pan i kadupangan nu kanu Kadenan a Mapulu na nia balapantag na di nu taligkudanan sekanin ka makin nu sekanin simba sa senep kanu atay. 21 Na da kanu a benal semimba kanu manga balahala. Ka dala i entu katagan nin sa lekanu enggu di kanu nin kadtabangan sa kalipuas'u kanu dikena mangapia a manggula. 22 Ka sekanu a pinamili nu Kadenan a Mapulu na di kanu nin man padtadayn ka enggu mabadtug su ingala nin a barakat. Ka nakasuat man kanu Kadenan a Mapulu su kinabaluy nin sa lekanu sa manga taw nin. 23 Na sia menem sa laki na di masulut i di ku sekanu makapangeni-ngeni ka enggu di aku makandusa kanu Kadenan a Mapulu. Na pamandun ku sekanu sa kapaguyag-uyag a matidtu. 24 Na su Kadenan bu a Mapulu i ikagilek'u enggu simba nu sekanin sa senep sa atay. Ka nia nu 'gkakalendem na su langun nu kangagaipan a pinggula nin sa lekanu. 25 Ugaid'a amaika papanalusen nu su kanggula nu sa mawag na maibped kanu mabinasa taman kanu datu nu.”