Su Kinataban nu Saul kanu Kinambunua nin kanu manga Taw a Amun
11
Na kanu entu ba a manga timpu na linusudan ni Nakas a taw a Amun su manga taw kanu dalepa a Yabis kanu kalupan nu Giliad. Na nia pidtalu sa lekanin nu langun nu mama nu entu a dalepa na “Umbal ka sa kapasadan sa lekami ka mapaulipen kami sa leka.” 2 Ugaid'a nia inisumpat'i Nakas sa kanilan na “Uway, mumbal aku amaika ipasuat'u sa laki su kawanan a mata nu ka enggu makagkayaya su langun nu manga taw a Israil.” 3 Na nia inisumpat sa lekanin nu 'gkangaunutan nu manga taw sa Yabis na “Enggi kami sa manga pitu gay iganat saguna ka enggu nami makapasabut su langun nu taw sa lusud'u Israil. Na amaika dala den makauma a maninindeg sa lekami na ipalad'ami den su ginawa nami sa leka.” 4 Na guna makauma su manga sinugu sa kapasabut lu sa dalepa a Gibia a pendalepan nu Saul na pinanudtul'ilan kanu langun nu taw a Israil su nanggula a entu lu kanu dalepa a Yabis. Na sabap sa entu na namakapaguguliang silan sa matanug.5 Na saleta mambu na nakauma su Saul a ebpun kanu 'bpangangawidan a kaped'in su manga ayam'in a sapi. Na guna nin mailay su manga taw a 'bpamanguliang sa matanug na nia nin nakaidsa na “Ngin i nanggula nu manga taw a nia ka 'bpamanguliang silan?” Daka pidtalu nu manga taw sa lekanin su nanggula a entu lu kanu dalepa a Yabis.
6 Na guna makineg'u Saul su entu a nanggula na linangkapan sekanin nu Ruh nu Kadenan enggu sangat a nalipunget sekanin. 7 Daka kinemua sekanin sa dua timan a sapi ka pinanedtad'in ka inipasigkil'in su entu lu kanu langun nu taw sa lusud'a Israil sa nia nin katigan na “Apia entain i di munut sa lekami kani Samuil sa kambunua na maya bun ba i pakaidan kanu manga sapi nilan.” Na saleta mambu na pigkahanda nu Kadenan i su langun nu manga taw a Israil na naadenan na gilek. Tembu namangunut silan kanu Saul. 8 Na guna silan limuda nu Saul lu sa dalepa a Bisik na nakasaut sa telu gatus ngibu i kadakel'u manga mama a ebpun sa Israil liu pan su manga mama a ebpun sa tupu nu Yahuda a nakasaut sa telupulu ngibu i kadakel'in. 9 Na nia nilan pidtalu kanu manga taw a sinugu ebpun sa dalepa a Yabis na “Edtalu nu kanilan i ‘Namag sa maudtu na malipuas kanu den.’ ”
Na inisampay den mambu nu manga sinugu su entu kanu manga taw a Yabis. Na sangat a nangagalaw silan. 10 Daka pidtalu nu manga taw a Yabis kanu manga taw a Amun i “Namag bun a entu na ipalad'ami sa lekanu su ginawa nami. Na enggula nu den sa lekami u ngin i kapegkailay nu lun a mapia sa lekanu.”
11 Na kanu temundug a gay na linimud'u Saul su manga taw ka linumpuk-lumpuk'in sa telu lumpuk ka magan mapita pan na linusudan nilan den su manga taw a Amun ka pinangimatayan nilan taman kanu kutika nu maudtu. Na su nangasama kanilan na namakadtatadina sa kinapalalaguy nilan.
12 Na guna su maitu na nia pidtalu nu manga taw kanu Samuil na “Endaw den su manga taw a midtalu sa di dait a endatu si Saul? Anggit'u silan sia ka pangimatayan nami silan.” 13 Ugaid'a nia pidtalu nu Saul na “Dala imatayan a taw kanu nia a gay kagina saguna na inilipuas'u Kadenan a Mapulu su manga taw a Israil.” 14 Na guna su maitu na nia pidtalu nu Samuil kanu manga taw na “Sia kanu ka lemu tanu sa Gilgal ka lu tanu ba ipayag 'bpaluman su kandatu ni Saul.” 15 Daka linemu den mambu sa Gilgal su langun nu manga taw a Israil ka lu nilan ba binaluy a datu su Saul kanu adapan nu Kadenan. Na migkurban silan kanu adapan nu Kadenan sa kurban a tanda kanu kinaisa kanu Kadenan a Mapulu. Na sabap sa entu na su Saul taman kanu langun nu manga taw a Israil na sangat a nangagalaw.