10
Na guna su maitu na kinemua su Samuil sa lana a inibetad kanu manaut a butul ka binubusan nin sa lana su ulu nu Saul, entu pan ka sinium'in enggu nia nin lun pidtalu na “Pinamili ka nu Kadenan a Mapulu a mabaluy a makandatu kanu manga taw nin a Israil.a 2 Na sia kanu kabpitas ta saguna na madsumbak'engka su dua kataw a mama a lu tampal kanu kubul'i Rakil sa dalepa a Silsa kanu 'gkasakupan nu manga taw a ebpun kanu tupu nu Buniamin. Na nia nilan edtalun sa leka na ‘Su manga kimar a 'bpanuntulen nengka na natun den, saguna na dikena den a entu i 'gkaliduan sa ginawa nu ama nengka ka seka den sa nia nin 'gkadtalu na “Panun den guna i katun ku kanu wata ku?” ’ 3 Na kanu katalus'engka na madsumbak'engka menem lu kanu masela a kayu kanu dalepa a Tabur su telu kataw a mama a 'bpelu sa dalepa a Bait-Il lu kanu pegkurbanan kanu Kadenan. Na su sakataw kanilan na aden 'bpananggiten nin a telu timan a pipis a kambing, su sakataw menem na nia nin it na telu timan a pan enggu su sakataw menem na nia nin it na satiman a taguan a upis'a binatang a aden dalem'in a ig'a ubas. 4 Na salamen ka nilan enggu inggay nilan sa leka su dua timan a entu a pan enggu taliman nengka mambu su entu. 5 Na kanu kauma nengka menem lu kanu bakulud'u Kadenanb lu kanu pegkampuan nu manga taw a Pilistin na makadsumbak ka menem sa lumpukan nu manga nabi a lu silan ebpun kanu dalepa a pegkurbanan a pebpayag kanu kadtalu nu Kadenan. Na nia 'bpangunanan kanilan na su pabpaguni sa palabuni-bunian a palendag, tambul enggu manga kutiapi. 6 Na langkapan ka mambu nu Ruh nu Kadenan a Mapulu taman sa makaamung ka kanu kapebpayag'ilan a entu kanu kadtalu nu Kadenan taman sa mabagu su pamusungan nengka. 7 Na amaika manggula den su langun nu tanda a nia a pidtalu ku sa leka na enggula ka su apia ngin a nia nengka lun kalangan na mapia ka pedtapiden ka man nu Kadenan. 8 Na una ka den lu kanu dalepa a Gilgal ka tundugen ku bu seka ka enggu makagkurban sa kurban a pedtutungen langun enggu kurban a tanda kanu kinaisa kanu Kadenan. Na angapi aku lu sa dalem'a pitu gay ka edtalun ku sa leka u ngin i dait a enggulan nengka.”Su Kinapayag'u Saul kanu Kadtalu nu Kadenan
9 Na guna su maitu na ginanatan den nu Saul su Samuil. Na binagu den mambu nu Kadenan su pamusungan nin. Na kanu entu bun ba a gay na natuman su langun nu tanda a pidtalu nu Samuil sa lekanin. 10 Na endaw i kinauma nilan kanu dalepa a Gibia na inalaw silan nu lumpukan nu manga nabi. Saleta mambu na linangkapan sekanin nu Ruh nu Kadenan. Guna su maitu na pakapayag'in den su kadtalu nu Kadenan a kaped'u manga nabi. 11 Na guna sekanin mailay nu langun nu mataw sa lekanin na nia nilan nadtalu na “Ngin i nanggula nu Saul a nia a wata ni Kis? Nginan, nabaluy den sekanin a nabi?” 12 Na aden isa a mama a lu bun ba pegkaleben i minidsa bun sa “Entain i ama nilan?” Na sabap sa entu na nabaluy a palibasan i “Ngintu, nabaluy den a nabi si Saul?” 13 Na guna mapasad su entu a kapebpayag'u Saul kanu kadtalu nu Kadenan na linemu sekanin kanu dalepa a pegkurbanan.
14 Na nia kinauma nu Saul enggu su panunugun nin lu na inidsan silan nu bapa nin sa “Endaw kanu besen mibpawang?” Na nia nin inisumpat na “Pinangilay nami su manga kimar, na guna su da nami matun na linemu kami kani Samuil.” 15 Na nia inisumpat'u bapa nin na “Edtalu ka kun sa laki u ngin i pidtalu ni Samuil sa leka.” 16 Na nia nin menem inisumpat kanu bapa nin na “Natun den kun su manga kimar a entu a 'bpangilayn nami.” Ugaid'a da nin edtalua su makapantag kanu kapembaluy lun sa datu kanu manga taw a Israil.
Su Kinabaluy kanu Saul sa Datu
17 Na linimud'u Samuil su manga taw a Israil lu sa dalepa a Mispa kanu adapan nu Kadenan a Mapulu 18 sa nia nin pidtalu kanilan na “Nia ba i katigan nu Kadenan a Mapulu a Kadenan nu manga taw a Israil, ‘Pinaliu ku su manga taw a Israil lu sa dalepa a Egypt enggu inilipuas ku sekanu kanu kapegkagaga nu manga taw a Egypt taman kanu kapegkagaga nu 'bpamendatu kanu ped a dalepa a napakapasang sa lekanu.’ 19 Ugaid'a saguna na inikias'u su Kadenan a linemipuas sa lekanu kanu kabinasan enggu kanu lidu na ginawa. Ka nia nu pedtalun na ‘Enggi kami sa datu a endatu sa lekami.’ Na saguna na supeg kanu sia kanu adapan nu Kadenan a Mapulu sia luyud kanu tupu enggu sakambinabatan nu uman i isa sa lekanu.”
20 Na guna su nakapasupeg den silan nu Samuil sia luyud kanu tupu nu uman i isa kanilan na nia napamili sa ukit a kinambunuta na su tupu nu Buniamin. 21 Na guna su maitu na linimud menem su langun nu tupu nu Buniamin. Na nia menem napamili sa maitu bun ba a ukit na su muliataw ni Matri. Na linimud menem su langun nu muliataw ni Matri na nia napamili na su Saul a wata ni Kis. Ugaid'a guna nilan pangilaya su Saul na dala lu sekanin. 22 Guna su maitu na inidsa nilan 'bpaluman kanu Kadenan a Mapulu i “Ngintu, sia bun su mama a nan?” Na nia inisumpat'u Kadenan na “Nan bun sekanin nagena kanu manga langun-taman a nan.”
23 Daka pidtalaguyan nilan sekanin kemua ka pinadtindeg'ilan lu kanu luk'u manga taw. Na sekanin i malambeg sa langun ka taman nin bu sa waga su manga taw. 24 Na nia pidtalu nu Samuil kanu langun nu taw na “Edsusuliman nu sekanin sa mapia, ka sekanin su pinamili nu Kadenan a mabaluy a datu nu. Na dala pagidsan nin sa lekitanu sia.” Daka linemalis su langun nu taw sa “Palihalan su datu!”
25 Na guna su maitu na pidsinantal'u Samuil kanu manga taw u ngin i manga atulan enggu manga galebekan sa kapendatu. Entu pan ka inisulat'in kanu linulun a kaletas enggu inibetad'in kanu adapan nu Kadenan a Mapulu. Na guna mapasad su entu na pinauli den nu Samuil su manga taw a Israil. 26 Na minuli bun mambu su Saul lu sa Gibia. Na inunutan sekanin nu mangawalaw a taw a pinangipu nu Kadenan a Mapulu i pamusungan nin. 27 Ugaid'a aden ped a manga taw a dala bun gaid katagan nin i pedtalu sa “Panun ba i kalipuas'u nia a taw sa lekitanu?” Pedsudian nilan su Saul taman sa dala nilan pananggiti sa apia ngin a makaenggay nilan lun. Ugaid'a dala i entu ipamamantag'u Saul.