Su Kinapagilaya nu Saul enggu Samuil
9
Na aden mama a masela i 'gkagaga nin a ebpun kanu tupu nu Buniamin a nia nin ngala na si Kis, a nia nin ama na si Abil. Na si Abil menem na nia nin ama na si Sur. Na si Sur na nia nin ama na si Bikura. Na si Bikura menem na nia nin ama na si Apia. Na langun nilan na ebpun kanu tupu nu Buniamin. 2 Na aden wata ni Kis a mama a nia nin ngala na su Saul, mapia i buntal'in enggu dala pagidsan na kapia nu palas'in enggu kalambeg'in kanu manga taw a Israil.3 Na aden isa a gay a natadin su manga kimar'i Kis a ama nu Saul. Na nia pidtalu ni Kis kanu wata nin a su Saul na “Paunut ka su isa kanu manga panunugun ka pangilay nu su manga kimar a entu.” 4 Na guna su maitu na pinangilay nilan lu kanu bakulud'u dalepa a Ipraim enggu kanu kalupan nu Salisa ugaid'a da nilan matun. Na pinangilay nilan bun lu kanu kalupan nu Salim enggu kanu kalupan nu Buniamin ugaid'a dala nilan bun matun. 5 Na guna silan makauma lu kanu kalupan nu manga taw a Sup na dala nilan bun matun lu. Daka nia pidtalu nu Saul kanu tagapeda nin a panunugun na “Muli ta den ka aden a entu na sekita pan menem i kaliduan na ginawa ni ama kumin kanu manga kimar a entu.” 6 Ugaid'a nia inisumpat'u panunugun na “Aden isa a mama kanu nia ba a dalepa a sinugu nu Kadenan enggu sangat a 'bpagadatan. Na langun na kadtalu nin na 'gkatuman. Na lemu ta sa lekanin ka aden a entu na makatutulu nin sa lekita u endaw ta tampal mangilay.” 7 Daka nia inisumpat'u Saul kanu panunugun na “Amaika lemu ta sa lekanin na ngin i makaenggay ta lun? Ka dala den nasama a pegken ta. Na dala makaenggay ta sa lekanin a sinugu nu Kadenan.” 8 Na nia menem inisumpat'u panunugun kanu Saul na “Aden a nia paidu a pilak, na nia den ba i inggay ta kanu taw a entu a sinugu nu Kadenan ka enggu nin madtalu sa lekita u endaw ta tampal mangilay.”
9-10 Na guna su maitu na nia pidtalu nu Saul kanu panunugun nin na “Mapia i pidtalu nengka a nan. Enta den, ka lemu ta.” Daka linemu den silan kanu taw a entu a sinugu nu Kadenan. Na kanu entu ba a timpu sia kanu manga taw a Israil na amaika aden pegkiug pedsupeg kanu Kadenan na nia nilan pedtalun na “Lemu tanu kanu taw a pakaalung kanu di pan 'gkanggula” kagina su pembedtuan sa nabi sa saguna a timpu na pembedtuan bun paganay sa pakaalung kanu di pan 'gkanggula. 11 Na sia kanu kapedtakedeg'ilan kanu kabpelu nilan kanu mama a entu sa kanu entu ba a siudad na nadsumbak'ilan su manga laga a 'bpamedsageb. Na nia nilan inidsa kanilan na “San bun guna su taw a pakaalung kanu di pan 'gkanggula?” 12 Na nia nilan inisumpat na “Uway! Nakauna-una bu sekanin makauma sa lekanu. Kagina su manga taw na pegkurban lu kanu dalepa a pegkurbanan.a Na pamagayas kanu 13 ka magaus'u pamun sekanin sa endaw i kaludep'u kanu siudad ka bagu pamun a entu i kaganat'in ka 'bpelu kanu dalepa a pegkurbanan ka enggu sekanin makaamung keman kanu manga ana ka di silan lemudsu keman taman sa di nin kapalihalan su manga pegken a entu lu. Na talus kanu den ka matun nu bun sekanin.” 14 Daka linemu den mambu silan. Na endaw i kinauma nilan lu na nailay nilan su Samuil a pedtakedeg lu kanu dalepa a pegkurbanan.
15 Na sagay pan bagu makauma su Saul na mibpapayag su Kadenan a Mapulu kanu Samuil sa nia nin pidtalu na 16 “Namag sa kanu maya bun ba a kutika na pasanen ku sa leka su mama a ebpun kanu tupu nu Buniamin, na bubusi ka sekanin sa lana a tanda kanu kinasangan lun sa kandatu nin kanu manga taw ku a Israil. Na ilipuas'in su manga taw ku kanu kapegkagaga nu manga taw a Pilistin. Kagina nailay ku su kapapegkapasang kanu manga taw ku ka nakasampay man sa laki su kabpaguguliang'ilan sa kabpangeni sa tabang sa laki.”
17 Tembu guna mailay nu Samuil su Saul na nia pidtalu nu Kadenan a Mapulu sa lekanin na “Namba su mama a pidtalu ku sa leka. Na sekanin i endatu kanu manga taw ku a Israil.”
18 Saleta mambu na sinemupeg su Saul kanu Samuil lu kanu bengawan nu alad'u entu a siudad sa nia nin pidtalu na “Mapakay a makatutulu nengka sa laki u endaw i walay nu 'bpangingilayan?” 19 Na nia inisumpat'u Samuil na “Saki su entu, na unut ka sa laki saguna lu kanu dalepa a pegkurbanan ka keman ta lu. Na namag ku bu seka paulin enggu edtalun ku sa leka su langun nu 'gkapagitung'engka. 20 Na makapantag menem kanu manga kimar'engka a entu a nakatelu gay den i kinatadin nin na di ka den 'bpelidui sa ginawa su entu ka natun den. Na seka man taman kanu sakambinabatan nu i 'gkapaginagkay nu manga taw a Israil.” 21 Na nia inisumpat'u Saul na “Dikena ba tupu aku bu nu Buniamin a paidu sa langun kanu manga tribu nu Israil? Su sakambinabatan nami i mababa sa langun kanu tupu nu Buniamin. Na nginan ka man i kadtalu nengka sa laki?”
22 Daka pinaunut den nu Samuil su Saul enggu su panunugun nu Saul lu kanu dalepa a pegkurbanan enggu pinaludep'in lu kanu pegkanan ka pinaayan nin kanu ayanan nu manga balapantag a ana. Na manga telupulu kataw i kadakel'u manga ana. 23 Na nia pidtalu nu Samuil kanu 'bpangilutu na “Anggit ka sia su inipasenggay ku sa leka.” 24 Na kinua mambu nu 'bpangilutu su bubun a entu nu bili-bili a inigkurban ka initalagad'in kanu Saul. Na nia pidtalu nu Samuil kanu Saul na “Ilay ka, inisenggay i nan a ipedtalagad sa leka. Na kan ka, ka inadil i nan sa leka sa kanu nia ba a initandu a kutika ka enggu ka makaamung kanu kapegkan nu manga ana.” Na kineman den mambu su Saul a kaped'in su Samuil sa kanu entu ba a kutika.
25 Na guna su minuli den silan ebpun kanu dalepa a pegkurbanan na pinagadilan sa 'bpagigan su Saul lu kanu pulu nu walay nu Samuil. Na miniga den mambu sekanin lu ba ka tinemulug.b
26 Na guna su 'gkatibuas na tinawag'u Samuil su Saul a lu sa pulu nu walay nin sa nia nin pidtalu na “Embangun ka den ka enggu ku seka makapauli.” Na mimbangun den mambu su Saul ka linemu silan kanu lalan. 27 Na kanu kabpeliu nilan kanu siudad na nia pidtalu nu Samuil kanu Saul na “Edtalu ka kanu panunugun nengka i muna den sekanin sa lekita.” Daka minuna den mambu su panunugun nin. Entu pan ka pidtalu nu Samuil i “Aden pan pedtalun ku sa leka a katigan nu Kadenan.”