Su Kinapangeni nu manga Taw a Israil sa Datu nilan
8
Na guna su matua den su Samuil na nia nin sinanganan sa kapangukum na su manga wata nin a mama kanu manga taw a Israil. 2 Na lu silan 'bpangukum sa kanu dalepa a Birsiba. Na nia ngala nu kaka a wata nin na si Yuil, na su ikadua menem na si Abiha. 3 Ugaid'a su manga wata nin a entu na dala nilan ilingi su ukit'in ka nia nilan pinamili na makapantiali silan. Pembigkugen'ilan su kawagib ka pedtalima silan sa bayad.4 Na guna su maitu na mindidilimudan su 'gkangaunutan nu manga taw a Israil ka linemu silan kanu Samuil a lu sa dalepa a Rama 5 ka nia nilan lun pidtalu na “Matua ka den, na su manga wata nengka na dikena nilan 'bpagilingan su ukit'engka. Kagina ka maitu na pamili ka sa mabaluy a datu nami a mangunanan sa lekami a mana kanu manga ped a bangsa.” 6 Ugaid'a nakalidu sa ginawa nu Samuil su pidtalu nilan a entu a “Enggi kami sa datu a mangunanan sa lekami.” Daka nangeni-ngeni su Samuil kanu Kadenan a Mapulu. 7 Na nia inisumpat'u Kadenan sa lekanin na “Enggula ka su langun nu pedtalun nilan sa leka, ka dikena man seka i inendan nilan ka saki i inendan nilan a pendatu kanilan. 8 Na su pinggula nilan a nan sa leka na man bun ba i pinggula nilan sa laki iganat pan kanu kinapaliu ku sa kanilan kanu dalepa a Egypt sampay den saguna ka tinaligkudan aku nilan ka nia nilan sinimba na su manga pegkakadenanen. 9 Na enggula ka saguna su pedtalun nilan a nan ugaid'a patuntayi ka sa mapia kanilan su ukit'u datu a endatu kanilan.”
10 Na inisampay mambu nu Samuil su langun nu pidtalu nu Kadenan a Mapulu kanu manga taw a 'bpangeni sa lekanin sa datu. 11 Na nia nin pidtalu kanilan na “Nia ba i manga ukit'u datu a endatu sa lekanu, kuan nin su manga wata nu a mama ka baluyn nin silan a pakakalisa nin, pakukuda nin enggu mangunanan sa lekanin sa kanu kambunua. 12 Na mamili bun sekanin sa 'gkangaunutan nu enggaga-edsangibu a sundalu enggu enggaga-limapulu a sundalu. Na su ped menem na pegesen nin mapadadu, su ped menem na pegesen nin bun mapapagagani, su ped menem na papangumbalen nin sa igagama sa kambunua enggu igagama kanu manga kalisa nin. 13 Na su manga wata nu menem a babay na kuan nin bun ka pegesen nin mapapangumbal sa kamutan enggu su ped menem na papangilutun nin enggu papangumbalen nin sa pan. 14 Na kuan nin bun su mapia sa langun kanu inawidan nu, su mapia sa langun kanu manga pamumulanen nu a ubas enggu pamumulanen nu a ulibus ka inggay nin kanu manga pinamili nin a 'gkangaunutan. 15 Na kuan nin bun su ikasapulu kanu sabpet'u a bantad enggu ubas ka inggay nin bun kanu 'gkangasaligan nin enggu kanu 'gkangaunutan a pinamili nin. 16 Kuan nin bun su manga panunugun nu a babay-mama enggu kuan nin bun su mapia sa langun kanu manga sapi nu enggu su manga kimara ka entu ba i panggalebeken nin. 17 Kuan nin bun su ikasapulu kanu manga pangangayamen nu enggu baluyen kanu nin a manga ulipen nin. 18 Na u mauma den su entu ba a timpu na mangeni kanu sa tabang kanu Kadenan a Mapulu sabap kanu kapapegkapasang sa lekanu nu datu a entu a pinamili nu ugaid'a di kanu nin pakikinegen.”
19 Ugaid'a apia ka maitu na da nilan bun pakikinega su kadtalu nu Samuil ka nia pan mula na nia nilan pidtalu kanu Samuil na “Padtaday ka den! Nia nami kalilinian na kaadenan kami na datu a makandatu sa lekami 20 ka enggu kami makailing kanu manga ped a bangsa a aden pendatu lun enggu 'bpangunanan lun sa kapembunua.” 21 Na guna makineg'u Samuil su kadtalu nu manga taw na inisampay nin i entu kanu Kadenan a Mapulu. 22 Na nia pidtalu nu Kadenan a Mapulu kanu Samuil na “Enggula ka su pedtalun nilan, enggi ka silan sa makandatu kanilan.” Na guna su maitu na pinauli den nu Samuil su manga taw a Israil.