7
Na kinua den mambu nu manga taw sa Kiriat-Yarim su Kaun nu Kapasadan nu Kadenan a Mapulu ka pinananggit'ilan lu kanu walay ni Abinadab lu kanu bakulud. Na pinamili nilan si Iliasar a wata ni Abinadab a makatuludu kanu Kaun nu Kapasadan nu Kadenan a Mapulu.2 Na nakadtangen pan sa nauget su Kaun nu Kapasadan nu Kadenan lu kanu entu a dalepa sa manga duapulu lagun i kinauget'in.
Su Kinapangunanan nu Samuil kanu manga taw a Israil
Na ulian nu entu a manga timpu, na su langun nu taw a Israil na sangat a nalidu i ginawa nilan taman sa nakapangeni silan sa tabang kanu Kadenan a Mapulu. 3 Daka nia pidtalu nu Samuil kanu langun nu manga taw a Israil na “Amaika su kasangul'u 'bpaluman kanu Kadenan a Mapulu ka saben-sabenal a senep sa atay nu, na iawa nu su langun nu pegkakadenanen nu a pedsimban nu ped a bangsa enggu su balahala nu a si Astarti. Iumun nu su ginawa nu kanu Kadenan a Mapulu enggu sekanin bu i simba nu. Na amaika enggulan nu i entu na ilipuas kanu nin kanu kapegkagaga nu manga taw a Pilistin.” 4 Na iniawa den mambu nu manga taw a Israil su manga balahala nilan a si Baala enggu si Astartib ka nia nilan bu sinimba na su Kadenan a Mapulu.
5 Na pidtalu pan nu Samuil i “Limud'u su manga taw a Israil lu sa Mispa ka lu ku ba sekanu ipangeni-ngeni.” 6 Na guna su nalimud den silan lu sa Mispa, na kinemua silan sa ig ka inibubus'ilan kanu adapan nu Kadenan a Mapulu. Na kanu entu ba a gay na dala silan kan enggu nia nilan pidtalu na “Mindusa kami kanu Kadenan a Mapulu.” Na su Samuil i 'bpangukumc kanu manga taw a Israil lu kanu dalepa a Mispa.
7 Na guna makineg'u manga taw a Pilistin i su manga taw a Israil na mindidilimudan lu sa Mispa, na su manga 'gkaunutan nu manga taw a Pilistin na nagadil silan sa kabunu nilan kanu manga taw a Israil. Na guna makineg'u manga taw a Israil su entu na nagilekan silan kanu manga taw a Pilistin 8 taman sa nia nilan pidtalu kanu Samuil na “Da ka temelen sa kabpangeni sa tabang kanu Kadenan tanu a Kadenan a Mapulu. Na ipangeni-ngeni nengka i ilipuas tanu nin kanu kapegkagaga nu manga taw a Pilistin.” 9 Daka kinemua su Samuil sa pipis a bili-bili ka inigkurban nin kanu Kadenan a Mapulu a kurban a pedtutungen langun ka nangeni sekanin sa tabang kanu Kadenan a Mapulu. Na pinakikineg mambu nu Kadenan su entu.
10 Na gagalu nu kapegkurban nu Samuil, na su manga taw a Pilistin na pedsupeg-pedsupeg bun kanu kapembunu nilan kanu manga taw a Israil. Ugaid'a kanu entu bun ba a gay na su Kadenan a Mapulu na napalugung sa sangat i katanug'in a sabapan a kinabulibug'u manga taw a Pilistin taman sa namakadtatalaguy silan mawa lu. 11 Na pinaneled'u manga mama a taw a Israil su manga taw a Pilistin iganat sa Mispa taman sa dalepa a Bitkar, na endaw i 'gkagaus'ilan na 'bpagimatayan nilan.
12 Na guna su maitu na kinemua sa watu su Samuil ka inibetad'in lu kanu pageletan nu dalepa a Mispa enggu kanu dalepa a Shin. Na binedtuan nin su entu a watu sa Ibinisird kagina nia nin pidtalu na “Taman saguna na tinabangan kami nu Kadenan a Mapulu.” 13 Na tinabanan su manga taw a Pilistin enggu di nilan den 'gkalusudan su manga 'gkangasakupan nu manga taw a Israil ka pegkuntelan silan nu Kadenan a Mapulu taman sa bibiag pan su Samuil. 14 Na su manga dalepa nu manga taw a Israil a inagaw nu manga taw a Pilistin a iganat sa Ikrun taman sa dalepa a Gat na nakua nilan menem 'bpaluman. Na naaden bun su kalilintad kanu manga taw a Israil enggu kanu manga taw a Amur.
15 Na su Samuil i 'bpangukum kanu manga taw a Israil taman sa bibiag pan sekanin. 16 Na uman lagun na 'bpagalat-alat sekanin kanu manga dalepa a Bait-Il, Gilgal enggu Mispa ka 'bpangukum sekanin kanu manga taw a Israil kanu entu ba a manga dalepa. 17 Ugaid'a mimbalingan bun sekanin lu sa dalepa a Rama kagina lu i dalepa nin. Na 'bpangukumen nin bun su manga taw a Israil lu taman sa napatindeg pan sekanin lu sa pegkurbanan kanu Kadenan a Mapulu.