Su Kinambalingan kanu Kaun nu Kapasadan
6
Na su Kaun nu Kapasadan nu Kadenan a Mapulu na nakapitu ulan kanu kalupan nu manga taw a Pilistin. 2 Na inipatawag'u manga taw a Pilistin su manga 'bpangurban sa kanilan enggu su 'bpamangalintaw sa nia nilan pidtalu na “Ngin i pakaidan nami kanu Kaun nu Kapasadan nu Kadenan a Mapulu nu manga taw a Israil enggu panun i kambalingan nami lun kanu nabpunan nin?” 3 Na nia nilan pidtalu na “Amaika imbalingan nu su Kaun nu Kapasadan nu Kadenan nu manga taw a Israil na dait a unuti nu sa kurban a bayad kanu manga kadusan. Na kanu maya ba a ukit na maawa su sakit'u enggu katawan nu u ngintu ka pedsiksan kanu nin.” 4 Na nia nilan inisumpat na “Ngin i dait a kurban a makabayad kanu kadusan?” Na nia menem inisumpat'u manga 'bpamangurban enggu su 'bpamangalintaw na “Lima timan a bulawan a mana mawaga enggu lima timan bun a bulawan a mana dumpaw sia luyud kanu kadakel'u 'gkangaunutan tanu a manga taw a Pilistin, kagina isa bu a tiuba i nakatingguma sa lekitanu enggu kanu 'gkangaunutan tanu. 5 Tembu dait na umbal kanu sa mana manga mawaga enggu mana manga dumpaw a bulawan a mana su nakabinasa kanu kalupan tanu. Na enggi nu sa alaga su Kadenan nu manga taw a Israil ka basi telenan nin den su kapapegkapasang'in sa lekitanu enggu kanu manga pegkakadenanen tanu taman kanu kalupan tanu. 6 Di tanu den pagkategasen su pamusungan tanu a mana su pinggula nu manga taw a Egypt enggu su Piraun. Dikena ba sinugutan nilan bun a makaawa su manga taw a Israil guna silan panama nu Kadenan nu manga taw a Israil? 7 Na kagina ka maitu na pagadil kanu sa bagu a guyudan enggu dua timan a sapi a aden manga pipis'in enggu da pamun kasangani sa ingkul iganat sa manaut pan. Ipaguyud'u su guyudan kanu dua timan a entu a sapi ugaid'a lugen nu su manga pipis'in lu kanu lugenan. 8 Na ipageda nu su Kaun nu Kapasadan nu Kadenan nu manga taw a Israil kanu entu a guyudan. Ipageda nu bun lu kanu ligid'u guyudan su baul a nabetadan nu manga bulawan a entu a kurban a bayad kanu manga kadusan. Entu pan ka paganat'u den su manga sapi. 9 Na edtuliki nu u endaw 'bpawang. Na amaika lu 'bpawang kanu dalepa a Bitsimis a sakup'u Israil na su Kadenan a Mapulu nu manga taw a Israil i sinemiksa sa lekitanu. Na amaika dikena lu 'bpawang na dikena sekanin i sinemiksa sa lekitanu ka sia bu natabu sa lekitanu.”10 Na maitu den ba i pinggula nilan. Kinemua silan sa dua timan a sapi enggu sinanganan nilan sa guyudan enggu linugen nilan su manga pipis'in lu kanu lugenan. 11 Na guna su maitu na inipageda nilan den kanu guyudan su Kaun nu Kapasadan nu Kadenan a Mapulu enggu su baul a dinikenan kanu manga mana dumpaw enggu su manga mana mawaga a bulawan. 12 Na su manga sapi na linemalakaw den 'bpawang sa Bitsimis a 'bpangenga kanu kabpelalakaw nilan. Na da den a benal silan 'bpapalingku magidsan i sa kawanan atawa ka biwang. Na saleta mambu na su manga 'gkaunutan nu manga taw a Pilistin na pedtundug-tundugen nilan bun su manga sapi taman lu kanu tedtab'u dalepa a Bitsimis.
13 Na kanu entu ba a timpu na su manga taw sa Bitsimis na lu silan kanu kadatalan a 'bpangangawidan nilan ka 'bpagagani silan sa bantad. Na guna nilan mailay su Kaun nu Kapasadan na sangat a nagalaw silan. 14 Na su manga sapi a entu na lu tinemelen kanu masela a watu kanu 'bpangangawidan ni Yusua a taw sa Bitsimis. Na inilaleg'ilan su manga kayu nu guyudan enggu inigkurban nilan kanu Kadenan a Mapulu su manga sapi a kurban a tinutung langun. 15 Na kinua nu manga tupu nu Libi su Kaun nu Kapasadan nu Kadenan a Mapulu enggu su baul a nabetadan kanu manga mana mawaga enggu mana manga dumpaw a bulawan ka iniuntul'ilan kanu masela a entu a watu. Na kanu entu bun ba a gay na migkurban su manga taw a Bitsimis kanu Kadenan a Mapulu sa kurban a pedtutungen langun enggu su ped pan a kurban. 16 Na guna mailay nu lima kataw a 'gkaunutan nu manga taw a Pilistin su entu, na mimbalingan den silan lu sa dalepa a Ikrun.
17 Na su mana mawaga a entu a bulawan a inigkurban nu 'gkangaunutan nu manga taw a Pilistin kanu Kadenan a Mapulu na bayad i entu kanu manga kadusan nu manga dalepa a Asdud, Gasa, Askalun, Gat enggu Ikrun. Na satiman kanu uman i sakadalepa. 18 Na maitu bun su manga mana dumpaw a bulawan sia luyud kanu ngin i kadakel'u dalepa a 'gkasakupan nu lima kataw a 'gkangaunutan nu manga taw a Pilistin pagidsan pan i naalad atawa ka dala maalad a siudad. Na su masela a watu a binetadan kanu Kaun nu Kapasadan lu kanu 'bpangangawidan ni Yusua lu sa Bitsimis na lu pamun sampay sa saguna. Na entu ba i nabaluy a saksi kanu manga nanganggula kanu entu.
19 Na inimatayan nu Kadenan a Mapulu su pitupulu kataw a taw sa Bitsimis kagina inilay nilan su dalem'u Kaun nu Kapasadan. Na su manga taw na sangat a nalidu i ginawa nilan sabap kanu madakel a entu a minatay. 20 Daka nia pidtalu nu manga taw a Bitsimis na “Entain ba man i makapangadap kanu suti a Kadenan a Kadenan a Mapulu? Na nia dait na kapangilayan tanu sa kabpawangan tanu lun i nia asal'a makatangka sa lekitanu.” 21 Na guna su maitu na napapait silan sa katigan lu kanu manga taw sa Kiriat-Yarim sa “Inimbalingan den nu manga taw a Pilistin su Kaun nu Kapasadan nu Kadenan a Mapulu. Na sia kanu ka enggu nu makua.”