Su Kaun nu Kapasadan lu kanu Manga Taw a Pilistin
5
Na guna maagaw nu manga taw a Pilistin su Kaun nu Kapasadan nu Kadenan na pinananggit'ilan ebpun sa Ibinisir 'bpawang kanu dalepa nilan a Asdud. 2 Na iniludep'ilan lu kanu walay nu pegkakadenanen nilan a si Dagun a lu nilan inibetad kanu ubay nin. 3 Na kanu temundug a gay kanu mapita-pita na nailay nu manga taw a Asdud i nakadudsum si Dagun kanu adapan nu Kaun nu Kapasadan nu Kadenan a Mapulu. Na sinapuat'ilan si Dagun ka inimbalingan nilan kanu binetadan nilan lun. 4 Na kanu temundug menem a mapita na maitu bun ba i nanggula, nakadudsum bun si Dagun kanu adapan nu Kaun nu Kapasadan nu Kadenan a Mapulu. Na su ulu enggu su manga lima nin na nangatebped a natagayak kanu bengawan taman sa su lawas'in bu i nasama. 5 Na sabap sa entu a nanggula na su manga 'bpangurban kani Dagun enggu su 'bpameludep kanu walay a pedsimban nilan lun lu sa Asdud na dili den silan pendampu kanu bengawan iganat kanu entu.6 Na siniksa nu Kadenan a Mapulu sa mapasang su manga taw sa Asdud enggu su embala-bala kanu 'gkangasakupan nilan enggu pinakagilekan nin a benal silan ka pinapangetuan nin sa mawaga. 7 Na guna mailay nu manga taw a Asdud su entu a nanggula na nia nilan nadtalu na “Di dait a matangen sia su Kaun nu Kapasadan nu Kadenan nu manga taw a Israil ka pedsiksan tanu nin enggu su kadenan tanu a si Dagun.” 8 Daka linimud'ilan su 'gkangaunutan nu manga taw a Pilistin ka pinagitung'ilan u ngin i dait a pakaidan kanu Kaun nu Kapasadan nu Kadenan nu manga taw a Israil. Na nia nilan napagayunan na lu nilan pananggiten su entu kanu dalepa a Gat.
9 Na guna nilan maanggit lu na siniksa nu Kadenan a Mapulu su entu a dalepa. Nangaguligaw silan ka pinamangetuan silan na mawaga magidsan i wata enggu matua. 10 Na sabap sa entu na lu nilan menem inanggit sa dalepa a Ikrun su Kaun nu Kapasadan nu Kadenan. Na guna maanggit lu na su manga taw na nia nilan ibpelalis pedtalu na “Inanggit'ilan sia su Kaun nu Kapasadan nu Kadenan nu manga taw a Israil ka enggu sekitanu i mamamatay.” 11 Daka linimud'ilan su langun nu 'gkangaunutan nu manga taw a Pilistin ka nia nilan pidtalu na “Iawa nu sia i Kaun nu Kapasadan nu Kadenan nu manga taw a Israil. Imbalingan nu i nan lu sa kanilan asal'a di tanu matay.” Na sangat a nangaguligaw su manga taw sabap kanu gilek'ilan. Ka mapasang a benal i kapedsiksa nu Kadenan sa kanilan 12 taman sa su da mamamatay na pinamangetuan silan na mawaga. Na nakauma sa langit i kabpaguguliang'ilan sa kabpangeni nilan sa tabang.