4
Na su kadtalu nu Samuil na nakapayapat kanu langun nu manga taw a Israil.
Su Kinaagaw kanu Kaun nu Kapasadan
Na saleta kanu entu ba a timpu na su manga taw a Israil na inimbunua nilan su manga taw a Pilistin. Na lu migkampu su manga taw a Israil sa Ibinisir enggu su manga taw menem a Pilistin na lu migkampu sa Apik. 2 Na nia pinggula nu manga taw a Pilistin na migkuyug-kuyug silan sa kanu kambunua nilan. Na guna su nakapagumaya den silan na tinabanan su manga taw a Israil taman sa pinatayan silan sa manga pat ngibu i kadakel'in a taw. 3 Na guna makambalingan kanu kampu su manga nakalipuas a manga taw a Israil na nia nadtalu nu 'gkangaunutan nu manga taw a Israil na “Ngintu ka inisugut'u Kadenan a Mapulu i katabanan tanu nu manga taw a Pilistin? Na nia guna mapia na kuan tanu su Kaun nu Kapasadan lu sa Silu ka enggu tanu tapiden nu Kadenan a Mapulu ka asal'a malipuas tanu kanu kapegkagaga nu manga kuntela tanu.” 4 Guna su maitu na inipakua nilan lu sa Silu su Kaun nu Kapasadan nu Kadenan a Mapulu a Barakat sa Langun a pebpapayag kanu luk'u dua timan a entu a buntal'a malaikat. Na su dua kataw a wata ni Ili a si Hupni enggu Pinihas na lu bun silan kanu nabetadan nu Kaun nu Kapasadan.
5 Na guna su lu den su Kaun nu Kapasadan nu Kadenan a Mapulu kanu kampu na su manga taw a Israil na nakalalis silan sa matanug sa kinapia na ginawa nilan taman sa kinemegkel su lupa. 6 Na guna makineg'u manga taw a Pilistin su ingel'u kabpelalis na nia nilan nadtalu na “Ngin guna i maena nu matanug a benal a kabpelalis lu kanu kampu nu manga taw a Hibru?” Na guna nilan katawi i su Kaun nu Kapasadan nu Kadenan a Mapulu i nakauma kanu kampu nu manga taw a Israil 7 na nangagilekan a benal silan taman sa nia nilan nadtalu na “Aden guna nakauma a manga kadenan kanu kampu nilan. Na duan-duan tanu den ka nia pan a nanggula i nia sia. 8 Na panun tanu den, entain i lemipuas sa lekitanu kanu kapegkagaga nu manga kadenan a nia a barakat? Na nia ba a manga kadenan i mininasa kanu manga taw a Egypt sa ukit'a embalang-balang a tiuba lu kanu tawan-tawan a dalepa. 9 Na pakawalaw kanu enggu pakamama kanu manga taw a Pilistin ka enggu tanu di maulipen nu manga taw a Hibru a mana su kinapakaid tanu sa kanilan. Na mapakamama tanu ka matu tanu.”
10 Na minatu mambu su manga taw a Pilistin taman sa tinabanan nilan menem su manga taw a Israil. Na sangat a pinatayan su manga taw a Israil ka manga telupulu ngibu i minatay kanilan. Na su manga nasama na nakapalalaguy kanu manga walay nilan. 11 Na su Kaun nu Kapasadan nu Kadenan na naagaw enggu su dua kataw a wata ni Ili a si Hupni enggu Pinihas na minatay.
Su Kinapatay ni Ili
12 Na kanu entu bun ba a gay na aden isa a mama a tupu nu Buniamin i nakauma lu sa Silu ebpun kanu kinambunua. Na sabap kanu kalugkug'in na kinisi nin su balegkas'in enggu binetadan nin sa lupa su ulu nin. 13 Na saleta sa entu na si Ili na 'bpagagayan kanu ayanan nin kanu ligid'u lalan ka 'bpangangapa sa katigan kagina 'gkaliduan nin sa ginawa su Kaun nu Kapasadan. Na guna edtalua nu mama su nanggula na su langun nu taw a lu sa Silu na namelalis. 14 Na guna makineg'i Ili su entu na nia nin pidtalu na “Ngin i pakaingel a nan?” Na namagayas lemu su mama a entu a tupu nu Buniamin ka pidtalu nin su nanggula a entu. 15 Na kanu entu a timpu na siyaw pulu enggu walu lagun den si Ili enggu di den pakailay. 16 Na nia pidtalu nu mama a entu kani Ili na “Nakapalalaguy aku ebpun kanu kinambunua.” Na nia pidtalu ni Ili sa lekanin na “Ngin i betad'u kinambunua, dua na manga wata?” 17 Na nia inisumpat'u mama na “Tinabanan su manga taw a Israil enggu madakel a benal i minatay. Minatay bun su dua kataw a wata nengka a si Hupni enggu Pinihas taman sa naagaw su Kaun nu Kapasadan nu Kadenan.”
18 Na endaw i kinakineg'i Ili makapantag kanu Kaun nu Kapasadan nu Kadenan na natekaw sekanin natapaya kanu 'bpagagayanan nin lu kanu ligid'u bengawan nu dalepa a Silu. Daka minatay sekanin ka nalepu i lig'in kagina masebud a benal sekanin enggu matua den. Na nakasaut sa patpulu lagun i kinapangukum'in kanu manga taw a Israil.
Su Kinapatay nu Kaluma ni Pinihas
19 Na saleta sa entu na su mamanugang kani Ili a kaluma ni Pinihas na magingay a benal. Na guna nin katawi i naagaw su Kaun nu Kapasadan nu Kadenan enggu minatay su panugangan nin apeg'u kaluma nin na nakadukum sekanin ka ginedam'in su tian nin taman sa nakambata sekanin sa dikena pan timpu. Na napasangan a benal sekanin kanu kinambata nin a entu. 20 Na guna su pebpaya den sekanin na nia pidtalu nu manga walian sa lekanin na “Da ka 'gkagilek, nakambata ka sa wata a mama.” Ugaid'a dala sekanin sumpat atawa ka da nin ipamamantag su entu. 21 Na binedtuan nin su wata nin sa Ikabud a nia nin maena na “Su sigay kanu manga taw a Israil na dala den,” kagina naagaw su Kaun nu Kapasadan nu Kadenan enggu minatay su panugangan nin apeg'u kaluma nin. 22 Na pidtalu nin pamun i “Su sigay kanu manga taw a Israil na dala den kagina naagaw den su Kaun nu Kapasadan nu Kadenan.”