Su Kinabaluy nu Kadenan kanu Samuil a Nabi
3
Na kanu entu a timpu a kabpananabangan nu Samuil kani Ili kanu galebekan kanu Kadenan a Mapulu na da den gaid pebpayagan nu Kadenan kanu kadtalu nin enggu da den gaid 'gkaalung pantag kanu Kadenan. 2 Na si Ili mambu kanu entu a timpu na di den gaid pakailay. Na 'bpagiga sekanin lu kanu 'bpagigan nin. 3 Na saleta mambu na su palitan kanu adapan nu Kadenan na pegkaleg pamun. Na su Samuil menem na 'bpagiga lu kanu walay a pedsimban kanu Kadenan a Mapulu a nabetadan nu Kaun nu Kapasadan nu Kadenan. 4 Na daka tinawag sekanin nu Kadenan a Mapulu sa “Samuil! Samuil!” Na nia nin inisumpat na “Nia aku bun.” 5 Na namagayas sekanin lemu kani Ili ka nia nin pidtalu na “Ngintu ba? Tinawag aku nengka?” Na nia inisumpat'i Ili na “Da ku seka matawag, tulug ka den lu 'bpaluman.” Na mimbalingan mambu sekanin kanu 'bpagigan nin.6 Na tinawag menem sekanin 'bpaluman nu Kadenan a Mapulu sa “Samuil!” Na mimbangun menem sekanin ka linemu menem kani Ili sa nia nin pidtalu na “Ngintu ba? Tinawag aku nengka?” Na nia nin menem inisumpat na “Manga dua na wata, da ku seka matawag. Na tulug ka lu 'bpaluman.”
7 Na kanu entu ba a timpu na su Samuil na di nin pamun kilala su Kadenan a Mapulu kagina dala pamun sekanin 'bpayagi nu Kadenan sia nakanggulalan kanu suala nin sa ukit'a kambitiala nin lun.
8 Na kanu ikatelu a kinatawag'u Kadenan a Mapulu kanu Samuil na sinemupeg menem su Samuil kani Ili ka nia nin pidtalu na “Ngintu ba? Tinawag aku nengka?” Daka naimamanan ni Ili i su Kadenan a Mapulu i pedtawag kanu Samuil 9 tembu nia pidtalu ni Ili kanu Samuil na “Embalingan ka lu miga, na amaika tawagen ka 'bpaluman na nia ka edtalu na ‘Hu Kadenan a Mapulu, edtalu ka den ka 'bpakikineg su panunugun nengka.’ ” Na miniga den sekanin 'bpaluman. 10 Na guna su maitu na sinemupeg su Kadenan a Mapulu ka tinawag'in menem sekanin sa “Samuil! Samuil!” Na nia inisumpat'u Samuil na “Edtalu ka den ka 'bpakikineg su panunugun nengka.”
11 Na nia pidtalu nu Kadenan kanu Samuil na “Ilay ka, di den mauget na aden enggulan ku sia sa Israil a apia entain i makakineg lun na matiagka enggu matay na gilek. 12 Na kanu entu ba a gay na enggulan ku su langun nu pidtalu ku a manggula nu muliataw ni Ili. 13 Na pidtalu ku man sa lekanin i siksan ku su muliataw nin taman sa taman, kagina katawan nin su kabaladusan nu manga wata nin na da nin demun silan sapali kanu kinasakutu nilan a entu. 14 Tembu inidsapa ku man i di mapunas'a apia ngin a kurban su kabaladusan nu sakambinabatan ni Ili taman sa taman.”
15 Na guna su maitu na mimbalingan den sekanin temulug taman sa mapita. Na guna sekanin makagedam na inukan nin su pintuan nu walay a pedsimban kanu Kadenan a Mapulu. Na di 'gkadtalu nu Samuil kani Ili su manga inipayag sa lekanin nu Kadenan a Mapulu ka 'gkagilekan sekanin. 16 Ugaid'a tinawag sekanin ni Ili sa “Samuil, dua na manga wata.” Na nia nin inisumpat na “Ngin i entu ba?” 17 Na nia pidtalu ni Ili sa lekanin na “Ngin i pidtalu nu Kadenan a Mapulu sa leka? Di aku nengka 'bpamagenai ka siksan ka nu Kadenan amaika di nengka edtalun sa laki su langun nu pidtalu nin sa leka.” 18 Daka pidtalu mambu sa lekanin nu Samuil su langun nu entu, dala inipamagena nin lun. Na nia pidtalu ni Ili na “Sekanin su Kadenan a Mapulu. Enggulan nin u ngin i makasuat sa lekanin.”
19 Na saleta mambu na pegkasela-pegkasela bun su Samuil a pedtapiden nu Kadenan a Mapulu. Na su langun nu pedtalun nin na 'gkatuman. 20 Tembu naimamanan nu langun nu manga taw a Israil iganat sa dalepa a Dan taman sa Birsiba i su Samuil na saben-sabenal a nabi nu Kadenan a Mapulu. 21 Na kanu nia ba a timpu na tatap den pebpapayag su Kadenan a Mapulu lu sa Silu ka pebpapayagan nin su Samuil sia pakanggulalan kanu suala nin.